អន្តរជាតិ
រូបភាព The Nation
×![]()
ដោយ: តន ចាន់រិទ្ធារ៉ា
មេដឹកនាំរបបយោធាថៃ ប្រាយុទ្ធ ចន្ទអូចា នៅថ្ងៃទី២២ ខែមករា បានប្រកាសស្វាគមន៍បក្សនយោបាយណាដែលចង់ឲ្យលោកធ្វើជាបេក្ខជននាយករដ្ឋមន្ត្រីរបស់ពួកគេ។ ប៉ុន្តែលោក ប្រាយុទ្ធ ប្រកាសមុនថា លោកចូលរួមជាមួយបក្សដែលមិនគិតពីខ្លួនឯង ហើយបន្តអនុវត្តគោលនយោបាយរបស់រដ្ឋាភិបាលបច្ចុប្បន្នប៉ុណ្ណោះ។ លោកក៏ឆ្លៀតព្រមានបក្សនយោបាយខ្លះដែលសន្យាធ្វើអ្វីដែលមិនអាចទៅដែរ។
នាយករដ្ឋមន្ត្រីថៃ ប្រាយុទ្ធ ចន្ទអូចា បានប្រាប់ឲ្យបក្សនយោបាយទាំងឡាយណាដែលចង់ឲ្យលោកចូលរួមជាមួយ មកទាក់ទងរូបលោកដើម្បីជជែកគ្នា ប៉ុន្តែចូលរួមឬអត់នោះ លោកនឹងសម្រេចចិត្តតាមក្រោយ។ លោក ប្រាយុទ្ធ ប្រកាសបែបនេះ ខណៈដែលការស្ថានភាពនយោបាយនៅថៃតានតឹងជាថ្មីជុំវិញការកំណត់កាលបរិច្ឆេទបោះឆ្នោតផ្លូវការ។ កាលបរិច្ឆេទបោះឆ្នោតដែលគ្រោងធ្វើនៅថ្ងៃទី២៤ ខែកុម្ភៈ ទំនងជាមិនអាចកើតឡើងឡើយ។
ថ្លែងក្រោយកិច្ចប្រជុំគណៈរដ្ឋមន្ត្រីនៅថ្ងៃទី២២ ខែមករា លោក ប្រាយុទ្ទ អះអាងថា ប្រសិនបើលោកចង់បន្តការងារសព្វថ្ងៃ លោកត្រូវចូលរួមជាមួយបក្សនយោបាយណាមួយ ដែលមោះមុត មិនគិតប្រយោជន៍ផ្ទាល់ខ្លួន និងតាំងចិត្តផ្លាស់ប្ដូរដើម្បីភាពល្អប្រសើររបស់ជាតិ។ យ៉ាងណាមិញ បក្សដែលព្យាយាមកែប្រែគោលនយោបាយរបស់រដ្ឋាភិបាលសព្វថ្ងៃ នឹងមិនអាចទាក់ទាញលោកឡើយ ហើយការប្រឹងប្រែងផ្លាស់ប្ដូរកម្មវិធីរដ្ឋាភិបាលយោធា ជារឿងអត់ប្រយោជន៍។
កន្លងមក បក្សនយោបាយថ្មី Palang Pracharath បានប្រកាសគាំទ្រលោក ប្រាយុទ្ធ ធ្វើជាបេក្ខជននាយករដ្ឋមន្ត្រីសម្រាប់បក្សពួកគេ។ ប៉ុន្តែពេលសួរថា បក្សនេះមានទាក់ទងលោកឬនៅនោះ មេដឹកនាំរដ្ឋាភិបាលយោធារូបនេះឆ្លើយថា មិនទាន់ទេ។ បក្ស Palang Pracharath នេះ ត្រូវបង្កើតដោយរដ្ឋមន្ត្រីមួយចំនួនក្នុងគណៈរដ្ឋមន្ត្រីរបស់លោក ប្រាយុទ្ធ ហើយប្រកាសជាចំហថា គាំទ្ររបបដឹកនាំយោធាផងដែរ។ នេះបើតាមកាសែតបាងកកប៉ុស្តិ៍។
ជាមួយគ្នានេះ ប្រមុខរដ្ឋាភិបាលរូបនេះក៏ប្រាប់បក្សនយោបាយនានា កុំសន្យាហួសពេក និងពិបាកអនុវត្តក្នុងពេលកាន់អំណាច។ លោក ប្រាយុទ្ធ ព្រមានថា ការឃោសនាទាំងឡាយត្រូវពឹងផ្អែកលើច្បាប់ស្ដីពីហិរញ្ញវត្ថុ និងថវិកាដែលគ្រប់គ្រងការចំណាយរបស់ប្រទេស។ បើតាមកថាខណ្ឌ៥៧ ច្បាប់ស្ដីពីបក្សនយោបាយ គោលនយោបាយដែលពាក់ព័ន្ធហិរញ្ញវត្ថុ ត្រូវកំណត់ឲ្យច្បាស់ពីព័ត៌មានលម្អិត ថវិកាចំណាយ ផលប្រយោជន៍ដែលទទួលបាន ផលប៉ះពាល់ និងការប្រថុយប្រថានផង។
«អ្នកអាចនិយាយអ្វីក៏បាន តែខ្ញុំមិនច្បាស់ថា អ្នកធ្វើវាបានឬអត់ដែរ។ គណៈកម្មការប្រឆាំងអំពើពុករលួយមានបញ្ញត្តិជាច្រើនជុំវិញរឿងនេះ ហើយប្រសិនបើត្រូវគេប្ដឹង នោះការអនុវត្តនីតវិធីច្បាប់ក៏កើតឡើងដែរ។» នេះជាការបញ្ជាក់របស់លោក ប្រាយុទ្ធ ជុំវិញការសន្យារបស់បក្សនយោបាយទាំងអស់ដែលចូលរួមការបោះឆ្នោតនៅពេលខាងមុខ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
