របបដឹកនាំលោក ម៉ាឌុយរ៉ូ ផ្ដាច់ចំណងការទូតជាមួយអាមេរិក តែអាមេរិកមិនយល់ព្រម

អន្តរជាតិ

របបដឹកនាំលោក ម៉ាឌុយរ៉ូ ផ្ដាច់ចំណងការទូតជាមួយអាមេរិក តែអាមេរិកមិនយល់ព្រម

24, Jan 2019 , 9:35 am

រូបភាព

លោក Juan Guaido ដែលតាំងខ្លួនជាប្រធានាធិបតីវ៉េណេស៊ុយអេឡា (រូបភាព AFP)

ដោយ: តន ចាន់រិទ្ធារ៉ា

ប្រធានាធិបតីវ៉េណេស៊ុយអេឡា នីកូឡា ម៉ាឌុយរ៉ូ នៅថ្ងៃទី២៣ ខែមករា បានប្រកាសផ្ដាច់ទំនាក់ទំនងការទូតជាមួយអាមេរិក បន្ទាប់ពីរដ្ឋបាលក្រុងវ៉ាស៊ីនតោនទទួលស្គាល់ប្រធានសភាវ៉េណេស៊ុអេឡា ជាមេដឹកនាំបណ្ដោះអាសន្ន។ លោក ម៉ាឌុយរ៉ូ បានទុកពេល៧២ម៉ោងឲ្យមន្ត្រីទូតអាមេរិកចាកចេញពីវ៉េណេស៊ុយអេឡា។ យ៉ាងណាមិញ អាមេរិកតបវិញថា ខ្លួននៅតែមានចំណងការទូតជាមួយវ៉េណេស៊ុយអេឡាដដែល តែមានជាមួយមេដឹកនាំថ្មី មិនមែនរដ្ឋាភិបាលលោក ម៉ាឌុយរ៉ូ ឡើយ។

សហរដ្ឋអាមេរិក មិនអើពើនឹងការប្រកាសផ្ដាច់ទំនាក់ទំនងការទូតរបស់ប្រធានាធិបតីវ៉េណេស៊ុយអេឡា នីកូឡា ម៉ាឌុយរ៉ូ ឡើយ។ ការប្រកាសរបស់លោក ម៉ាឌុយរ៉ូ ធ្វើឡើងបន្ទាប់ពីអាមេរិកទទួលស្គាល់លោក Juan Guaido ជាមេដឹកនាំស្របច្បាប់តែមួយគត់របស់វ៉េណេស៊ុយអេឡា។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានបដិសេធដកបេសកកម្មអាមេរិកពីរដ្ឋធានីការ៉ាកាស់ និងព្រមានចាត់វិធានការ បើបុគ្គលិក និងមន្ត្រីទូតអាមេរិកមានបញ្ហា។

ក្នុងសេចក្ដីប្រកាសថ្ងៃទី២៣ ខែមករា លោក ប៉ុមប៉េអូ និយាយថា អាមេរិកមិនដែលទទួលស្គាល់រដ្ឋាភិបាលលោក ម៉ាឌុយរ៉ូ ឡើយ ដូចនេះលោក ម៉ាឌុយរ៉ូ គ្មានអំណាចអ្វីដើម្បីផ្ដាច់ទំនាក់ទំនងការទូតទ្វេភាគីឡើយ។ មានន័យថា អាមេរិកនឹងនៅតែបន្តចំណងការទូតជាមួយវ៉េណេស៊ុយអេឡា ហើយអាមេរិកនឹងធ្វើការជាមួយរដ្ឋាភិបាលលោក Juan Guaido ដែលអាមេរិកទទួលស្គាល់ជា ប្រធានាធិបតីបណ្ដោះអាសន្នរបស់វ៉េណេស៊ុយអេឡា។

លោក Juan Guaido ដែលជាប្រធានសភានោះ បានប្រកាសខ្លួនឯងជាប្រធានាធិបតី ដោយមានអាមេរិក ប្រទេសនៅតំបន់អាមេរិកឡាទីនជាច្រើនទទួលស្គាល់ផង។ លោកប្រធានាធិបតី ដូណាល់ ត្រាំ ជាអ្នកប្រកាសទទួលស្គាល់ Guaido ជាសាធារណៈ និងត្រៀមជួយការបោះឆ្នោតផង។ អ្នកជិតខាងវ៉េណេស៊ុយអេឡាមានប្រេស៊ីល និងកូឡុំប៊ីក៏ដើរតាមអាមេរិកក្នុងការទទួលស្គាល់ភាពស្របច្បាប់របស់លោក Guaido ដែរ។

ទោះអាមេរិកមិនទទួលស្គាល់ រដ្ឋាភិបាលក្រុងការ៉ាកាស់ក៏មិនឯកោពេកដែរ។ ប្រទេសឆ្វេងនិយមនៅអាមេរិកមានបូលីវី និងគុយបា សុទ្ធតែគាំទ្រលោក ម៉ាឌុយរ៉ូ ខណៈម៉ិកស៊ិកអះអាងថា សម្រាប់បច្ចុប្បន្នខ្លួននឹងធ្វើការជាមួយវ៉េណេស៊ុយអេឡាដដែល។

លោក ម៉ាឌុយរ៉ូ ដែលទើបស្បថចូលកាន់តំណែងអាណត្តិទីពីរ បានចោទក្រុមប្រឆាំងថា ព្យាយាមធ្វើរដ្ឋប្រហារដោយមានអាមេរិកនៅពីក្រោយខ្នង។ ថ្លែងតាមកញ្ចក់ទូរទស្សន៍ ប្រធានាធិបតីរូបនេះអះអាងថា ក្រុមប្រឆាំងចង់គ្រប់គ្រងវ៉េណេស៊ុយអេឡាពីរដ្ឋធានីវ៉ាស៊ីនតោន ប៉ុន្តែជាប្រជាជនវ៉េណេស៊ុយអេឡានឹងការពារទឹកដីរបស់ខ្លួន។

នៅពេលនោះ វ៉េណេស៊ុយអេឡាកំពុងស្ថិតក្នុងស្ថានភាពនយោបាយមិនច្បាស់លាស់ ហើយនឹងមានរដ្ឋាភិបាលដល់ទៅពីរ មួយគឺរដ្ឋាភិបាលលោក ម៉ាឌុយរ៉ូ និងមួយទៀតរដ្ឋាភិបាលលោក Guaido ដែលគ្មានអំណាចក្នុងស្រុកដែលមានអន្តរជាតិជាច្រើនទទួលស្គាល់ ហើយប្រើប្រាស់ទឹកដីអាមេរិកដើម្បីតស៊ូ។ ក្នុងកាលៈទេសៈបែបនេះ ការផ្លាស់ប្ដូរអំណាចរដ្ឋាភិបាលនឹងពឹងផ្អែកលើកងទ័ពវ៉េណេស៊ុយអេឡាតែម្ដង។

បច្ចុប្បន្ននេះ កងទ័ពវ៉េណេស៊ុយអេឡានៅតែស្មោះត្រង់ប្ដូរផ្ដាច់នឹងលោក ម៉ាឌុយរ៉ូ ដដែល។ ប៉ុន្មានម៉ោងក្រោយលោក Guaido ប្រកាសខ្លួនជាប្រធានាធិបតីនោះ រដ្ឋមន្ត្រីការពារជាតិ Vladimir Padrino និយាយថា កងទ័ពវ៉េណេស៊ុយអេឡា មិនទទួលស្គាល់ប្រធានាធិបតីដែលមានអាមេរិកពីក្រោយខ្នងឡើយ ហើយកងទ័ពនៅតែប្ដេជ្ញាការពាររដ្ឋធម្មនុញ្ញ និងអធិបតេយ្យជាតិ៕