មេដឹកនាំកូរ៉េខាងជើងជឿជាក់លើលោក ត្រាំ ដែលចង់ដោះស្រាយបញ្ហានុយក្លេអ៊ែរ

អន្តរជាតិ

មេដឹកនាំកូរ៉េខាងជើងជឿជាក់លើលោក ត្រាំ ដែលចង់ដោះស្រាយបញ្ហានុយក្លេអ៊ែរ

24, Jan 2019 , 2:28 pm

រូបភាព

ដោយ: តន ចាន់រិទ្ធារ៉ា

មេដឹកនាំកូរ៉េខាងជើង គីម ជុងអ៊ុន បង្ហាញក្ដីរីករាយជាខ្លាំង បន្ទាប់ពីទទួលបានសំបុត្រមួយពីប្រធានាធិបតីអាមេរិក ដូណាល់ ត្រាំ ខណៈមេដឹកនាំទាំងពីរគ្រោងជួបគ្នានៅចុងខែកុម្ភៈខាងមុខ។ គម្រោងនៃជំនួបនេះ នឹងផ្ដោតលើការពន្លឿនដំណើរការរំសាយនុយក្លេអ៊ែរដែលបានព្រមព្រៀងកាលពីជំនួបនៅសិង្ហបុរី។ បើតាមប្រព័ន្ធផ្សព្វផ្សាយកូរ៉េខាងជើង លោក គីម ក៏ជឿជាក់លើលោក ត្រាំ ដែលតាំងចិត្តដោះស្រាយបញ្ហារវាងប្រទេសទាំងពីរផង។

មេដឹកនាំកូរ៉េខាងជើង គីម ជុងអ៊ុន បានឲ្យលោក គីម យ៉ុងឈុល មន្ត្រីទទួលបន្ទុកការចរចាជាមួយអាមេរិក ចូលរាយការណ៍ជុំវិញជំនួបនៅរដ្ឋធានីវ៉ាស៊ីនតោនកាលពីសប្ដាហ៍មុន។ លោក គីម យ៉ុងឈុល បានប្រគល់សំបុត្រមួយច្បាប់របស់ប្រធានាធិបតី ដូណាល់ ត្រាំ ទៅឲ្យប្រមុខដឹកនាំកូរ៉េខាងជើង។ នេះបើតាមការផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី២៣ ខែមករា ប៉ុន្តែមិនបានរាយការណ៍ពីអត្ថន័យសំបុត្រឡើយ។

ទីភ្នាក់ងារព័ត៌មានរដ្ឋដដែលនេះផ្សាយថា លោក គីម ពិតជាពេញចិត្តខ្លាំងនៅពេលទទួលសំបុត្រលោក ត្រាំ ហើយក៏និយាយសរសើរប្រធានាធិបតីអាមេរិករូបនេះដែលមានឆន្ទៈដោះស្រាយបញ្ហាដើម្បីឈានទៅដល់ជំនួបអាមេរិក-កូរ៉េខាងជើងលើកទីពីរ។ លើសពីនោះ មេដឹកនាំកូរ៉េខាងជើងក៏បង្ហាញការជឿទុកចិត្តរបស់ខ្លួនទៅលើលោក ត្រាំ ខណៈប្រទេសទាំងពីរកំពុងដើរមួយជំហានម្ដងៗទៅកាន់គោលដៅដែលឯកភាពគ្នា។

នេះជាសេចក្ដីរាយការណ៍លើកដំបូងរបស់ប្រព័ន្ធផ្សព្វផ្សាយកូរ៉េខាងជើងជុំវិញដំណើរទស្សនកិច្ចរបស់មនុស្សជំនិតលោក គីម ជុងអ៊ុន ទៅកាន់អាមេរិកដើម្បីជជែកពីជំនួបមេដឹកនាំលើកទីពីរ។ នៅអាមេរិក លោក គីម បានជួបចរចាជាមួយរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ និងបន្ទាប់មកជួបលោក ត្រាំ នៅសេតវិមាន ហើយក៏បានប្រគល់សំបុត្ររបស់លោក គីម ឲ្យពេលនោះដែរ។

នាជំនួបជាមួយមន្ត្រីសំខាន់ៗដដែលនោះ លោក គីម ក៏បង្គាប់ដាក់ចេញគោលការណ៍ណែនាំដើម្បីការរៀបចំឲ្យស្រេចបាច់រៀបបវារៈសម្រាប់ជំនួបជាមួយលោក ត្រាំ នៅពេលខាងមុខ។ កាលពីសប្ដាហ៍មុន សេតវិមានប្រកាសជាសាធារណៈពីគម្រោងនៃជំនួបមេដឹកនាំអាមេរិក និងកូរ៉េខាងជើង ដែលត្រូវធ្វើនៅចុងខែកុម្ភៈ ប៉ុន្តែទីតាំងជំនួបមិនទាន់ត្រូវបានប្រកាសនៅឡើយទេ ទោះជាលោក ត្រាំ ថា បានកំណត់រួចរាល់ទៅហើយ។

វៀតណាម ត្រូវបានគេរំពឹងថា នឹងធ្វើជាម្ចាស់ផ្ទះជំនួបលើកទីពីរនេះ ដែលគេឯងសង្ឃឹមថា នឹងមានលទ្ធផលជាងជំនួបលើកទីមួយ។ នៅសិង្ហបុរី លោក ត្រាំ និងលោក គីម បានឯកភាពគ្នាលើការរំសាយនុយក្លេអ៊ែរ តែមិនបានកំណត់និយមន័យជាក់លាក់ទេ។ ក្រោយមក ដំណើរការលុបបំបាត់កជាប់គាំង ដោយភាគីម្ខាងៗទាមទារឲ្យដៃគូរបស់ខ្លួនធ្វើសកម្មភាពជាមុន ទើបខ្លួនធ្វើតាមក្រោយ។ ក្ដីសង្ឃឹមនៅតែមាន បើមេដឹកនាំទាំងពីរយល់ព្រមលើជំហានកាន់តែជាក់ស្ដែងក្នុងជំនួបលើកទីពីរនេះ៕