អន្តរជាតិ
សិង្ហបុរីចង់ធ្វើជាមជ្ឈមណ្ឌលបច្ចេកវិទ្យា ការច្នៃប្រឌិតថ្មី និងពាណិជ្ជកម្មប្រចាំទ្វីបអាស៊ី
លោក ហេង ស្វីគៀត រដ្ឋមន្រ្តីហិរញ្ញវត្ថុសិង្ហបុរី (រូបភាព AFP)
×![]()
ដោយ: តន ចាន់រិទ្ធារ៉ា
រដ្ឋមន្ត្រីហិរញ្ញវត្ថុសិង្ហបុរី ហេង ស្វីគៀត និយាយថា សិង្ហបុរី អាចក្លាយជាមជ្ឈមណ្ឌលនៃបច្ចេកវិទ្យា ការច្នៃប្រឌិតថ្មី និងសហគ្រាសពាណិជ្ជកម្មនៅអាស៊ី។ លោក ហេង និយាយបែបនេះក្នុងកិច្ចពិភាក្សាមួយស្ដីពីសាកលភាវូបនីយកម្មនៅថ្ងៃទី២៣ ខែមករា ខាងក្រៅវេទិកាសេដ្ឋកិច្ចពិភពលោកនៅទីក្រុង Davos ។ បើតាមរដ្ឋមន្ត្រីរូបនេះ ក្រុមហ៊ុនធំៗអាចពង្រីកការរកស៊ីរបស់ខ្លួនទៅកាន់ប្រទេសផ្សេងទៀតនៅអាស៊ីបន្ទាប់ពីបោះទីស្នាក់ការនៅសិង្ហបុរី។
ក្នុងវេទិកាដែលរៀបចំដោយសាកលវិទ្យាជាតិសិង្ហបុរី និងសាកលវិទ្យាល័យជាតិបច្ចេកវិទ្យានៅឯទឹកដីស្វ៊ីស រដ្ឋមន្ត្រីហិរញ្ញវត្ថុសិង្ហបុរី ហេង ស្វីគៀត លើកឡើងថា សិង្ហបុរីចាំបាច់ធ្វើការច្រើនដើម្បីផ្លាស់ប្ដូរតួនាទីរបស់ខ្លួនក្នុងសម័យកាលសាកលភាវូបនីយកម្មជំនានទី៤ ។ លោកជឿថា សិង្ហបុរីអាចធ្វើជាបណ្ដុំនៃបច្ចេកវិទ្យា នវានុវត្តន៍ និងជាទីស្នាក់ការរបស់ក្រុមហ៊ុនធំៗប្រចាំតំបន់អាស៊ីផងដែរ ព្រោះសិង្ហបុរីមានកត្តាអំណោយផលច្រើន។
ចំពោះមុខអ្នកចូលរួមជាច្រើន អនាគតនាយករដ្ឋមន្ត្រីទីបួនរបស់សិង្ហបុរីរូបនេះរៀបរាប់ថា សិង្ហបុរីអាចជាទីតាំងល្អដើម្បីការវាតទីចូលទីផ្សារតំបន់ ហើយសិង្ហបុរីអាចជាទីប្រជុំសម្រាប់ក្រុមហ៊ុនអន្តរជាតិដែរ។ រដ្ឋមន្ត្រីសិង្ហបុរីរូបនេះក៏លើកហេតុផលទៀតថា សិង្ហបុរីជាប្រទេសនិយាយភាសាអង់គ្លេស ស្គាល់ពីតំបន់អាស៊ីបានច្បាស់ ហើយសិង្ហបុរី គឺជាទីតាំងល្អបំផុតសម្រាប់ក្រុមហ៊ុននានាដែលត្រៀមចូលទីផ្សារទ្វីបអាស៊ី។ នេះបើតាមការផ្សាយរបស់ទូរទស្សន៍ Channel NewsAsia ។
«យើងមានសង្គមដែលពហុសាសន៍ និងពហុវប្បធម៌ ក្មេងៗសិង្ហបុរីសុទ្ធតែអាចប្រើប្រាស់ភាសាពីរមានអង់គ្លេស និងភាសាដើមកំណើត ដែលនេះអនុញ្ញាតឲ្យយើងអាចតភ្ជាប់ជាមួយគ្រប់ផ្នែករបស់ពិភពលោក។» នេះជាការបញ្ជាក់របស់លោក ហេង ស្វីគៀត ដែលនឹងត្រូវបន្តតំណែងនាយករដ្ឋមន្ត្រីពីលោក លី សៀនឡុង ។ លោកបន្តថា អាស៊ីកំពុងរីកចម្រើនយ៉ាងរហ័ស ហើយសិង្ហបុរីមានទីតាំងពិសេសដែលអាចជំរុញកំណើននេះ។
ក្នុងការជជែកដដែល រដ្ឋមន្ត្រីសិង្ហបុរីក៏បាននិយាយដល់តួនាទីរបស់បច្ចេកវិទ្យាក្នុងការជំរុញគំនិតច្នៃប្រឌិតថ្មី និងកំណើនសេដ្ឋកិច្ច ដែលកត្តាទាំងនេះក៏នឹងជួយបង្កើតជីវភាពរស់នៅរបស់ប្រជាជនដែរ។ លោក ហេង បានប្រាប់ឲ្យប្រជាជនសិង្ហបុរីប្រកាន់គំនិតរៀនមួយជីវិតដើម្បីសម្រេចគោលដៅបែបនេះ ហើយត្រូវរៀនសូត្រពីមនុស្សគ្រប់គ្នានៅគ្រប់ពេលវេលាទៀតផង។
ការរៀនសូត្រនេះទៀតសោត បើតាមលោក ហេង ស្វីគៀត គឺរៀននៅពេលធ្វើការ រៀនពីអ្នកនៅជុំវិញខ្លួនទៀតផង។ លើសពីនោះ ការអប់រំក្មេងក៏ជារឿងសំខាន់ដែរ សំដៅធ្វើយ៉ាងណាឲ្យពួកគេមានសមត្ថភាពក្នុងការរៀន និងបង្កើតឱកាសបាន៕
Tag:
សិង្ហបុរី
ហេង ស្វីគៀត
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
