ជាតិ
នយោបាយជាតិ
នាយករដ្ឋមន្ត្រី ព្រមានថា អ្នកអមលោក សម រង្ស៊ី មកខ្មែរ ក៏ប្រឈមជាប់គុកដែរ
×
សម្តេចនាយករដ្ឋមន្ត្រី ហ៊ុន សែន ធ្លាប់ប្រាប់គេឯងថា មិនលូកមាត់ជាមួយលោក សម រង្ស៊ី ទៀតទេ តែដោយសារលោក សម រង្ស៊ី នៅតែបន្តផ្ញើសារនយោបាយមិនឈប់ ជាពិសេសការប្រកាសធ្វើមាតុភូមិនិវត្តរបស់លោក សម្តេច ហ៊ុន សែន ក៏ទ្រាំមិនបាន ហើយក៏បង្ខំចិត្តឆ្លើយតបវិញ។
ដោយធុញទ្រាន់នឹងការប្រកាសជាដដែលៗរបស់លោក សម រង្ស៊ី នាយករដ្ឋមន្ត្រីកម្ពុជា បានពន្យុះថែម ឲ្យលោក សម រង្ស៊ី ឆាប់វិលមកកម្ពុជាវិញដូចការប្រកាសរបស់ខ្លួន។ ពីវេទិកាជួបសំណេះសំណាលជាមួយកម្មករ-កម្មការិនីនៅខេត្តកំពត នាព្រឹកថ្ងៃទី២៥ ខែមករា ឆ្នាំ២០១៩នេះ ប្រធានគណបក្សកាន់អំណាច និយាយចំអកថា ខ្លួនកំពុងរង់ចាំលោក សម រង្ស៊ី។
ប្រមុខរដ្ឋាភិបាល ព្រមានលោក សម រង្ស៊ី បែបនេះថា៖«ប្រកាសទៅ ផែនការរៀបចំយ៉ាងម៉េច ទៅពីព្រលានយន្តហោះណា អ្នកណា ទៅរង់ចាំកន្លែងណា ហើយអង្គការសហប្រជាជាតិ អមដំណើរពេលណា ធ្វើទៅ សូមអញ្ជើញ...តើហ៊ុន សែន ចាត់ការរបៀបណា»។
មេដឹកនាំរូបនេះ ផ្ញើសារទៅលោក សម រង្ស៊ី ថា៖«ខ្ញុំក៏ចង់ឲ្យអ្នកមកទីកន្លែង ដែលអ្នកត្រូវនៅ តាមសាលក្រមរបស់តុលាការ។ ខ្ញុំ រង់ចាំយ៉ាងអន្ទះសា។ ស្តាយណាស់ ដែលឲ្យអ្នកឯងរត់រួច ឥឡូវ បានអ្នកឯងមកវិញ គឺស្មើនឹងដើររកឧស ប្រទះឈើងាប់»។
បន្ទាប់ពីនិយាយបែបចំអកផងនិងព្រមានផងដាក់លោក សម រង្ស៊ី សម្តេច ហ៊ុន សែន ក៏មានសារសម្រាប់អ្នក ដែលចង់រួមដំណើរមកជាមួយលោក សម រង្ស៊ី ដែរ។ ប្រធានគណបក្សកាន់អំណាច ព្រមានយ៉ាងដូច្នេះថា៖«អ្នកមិនពាក់ព័ន្ធ មិនចង់ចូលគុក កុំចង់ចូលប្រថុយជាមួយ»។
សំឡេងនាយករដ្ឋមន្រ្តី ដែលថ្លែងនៅចំពោះមុខកម្មករ-កម្មការិនី៖
កាលពីថ្ងៃទី២០ ខែមករា ឆ្នាំ២០១៩ អតីតគណបក្សប្រឆាំង បានបើកកិច្ចប្រជុំគណៈកម្មាធិការអចិន្ត្រៃយ៍របស់ខ្លួន នៅសហរដ្ឋអាមេរិក ដោយមានការចូលរួមផ្ទាល់ពីលោក សម រង្ស៊ី និងថ្នាក់ដឹកនាំជាន់ខ្ពស់មួយចំនួនទៀត ដូចជា អ្នកស្រី មូរ សុខហួរ លោក អេង ឆៃអ៊ាង និងលោក អ៊ូ ច័ន្ទឫទ្ធិ ជាដើម ដើម្បីកំណត់ផែនការជាក់លាក់ពីការធ្វើមាតុភូមិនិវត្តរបស់លោក សម រង្ស៊ី។ ផែនការដ៏សំខាន់មួយ ដែលអតីតគណបក្សប្រឆាំង បានដាក់ចេញ គឺការបង្កើតក្រុមការងារ ដើម្បីរៀបចំកម្លាំង ត្រៀមទទួលលោក សម រង្ស៊ី។
យ៉ាងណា អតីតគណបក្សប្រឆាំង ពុំបានបញ្ជាក់ពីពេលវេលាច្បាស់លាស់នៃការវិលត្រឡប់របស់លោកសម រង្ស៊ី ឡើយ។ ប៉ុន្តែ លោក សម រង្ស៊ី ខ្លួនឯង ធ្លាប់ប្រកាសថា លោក នឹងមកកម្ពុជាវិញ នៅឆ្នាំ២០១៩នេះ។
ជុំវិញផែនការនៃការវិលត្រឡប់របស់លោក សម រង្ស៊ី លោក ផៃ ស៊ីផាន អ្នកនាំពាក្យរដ្ឋាភិបាល ក៏មានសារផ្តាំផ្ញើដែរ។ លោក បានចេញសេចក្តីថ្លែងការណ៍មួយនាពេលថ្មីនេះ ដោយបញ្ជាក់ថា រដ្ឋាភិបាល និង សមត្ថកិច្ច នឹងចាត់វិធានការ ចំពោះដំណើរវិលត្រឡប់របស់លោក សម រង្ស៊ី បើមានការស្នើសុំពីតុលាការ៕
Tag:
ហ៊ុន សែន
សម រង្ស៊ី
តុលាការ
© រក្សាសិទ្ធិដោយ thmeythmey.com