អន្តរជាតិ
លោក ឌូទើតេ ចង់ប្ដូរឈ្មោះហ្វីលីពីនទៅជា «មហាលីកា» (Maharlika)
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី១១ ខែកុម្ភៈ បានបង្ហាញជំហរផ្លាស់ប្ដូរឈ្មោះប្រទេសដោយឈប់ហៅថា ហ្វីលីពីន (Phillippines) ទៀត។ លោក ឌូទើតេ ចាត់ទុកឈ្មោះបច្ចុប្បន្ននេះជាកេរដំណែលសល់ពីអាណានិគមអេស្ប៉ាញ និងមិនជាប់ទាក់ទងអ្វីនឹងអត្តសញ្ញាណប្រទេសឡើយ។ សម្រាប់ឈ្មោះប្រទេសថ្មី លោកគាំទ្រគំនិតរបស់អតីតមេដឹកនាំផ្ដាច់ការ ហ្វែឌីណង់ ម៉ាកូស ដែលចង់ប្ដូរឈ្មោះទៅជា មហាលីកា (Maharlika) ។
ថ្លែងក្នុងពិធីចែកកម្មសិទ្ធិដីធ្លីនៅខេត្ត Maguindanao ប្រធានាធិបតីហ្វីលីពីន រ៉ូឌ្រីហ្គោ ឌូទើតេ និយាយថា វាជារឿងល្អដែលហ្វីលីពីនមានឈ្មោះថ្មី ហើយដែលឈ្មោះថ្មីនោះសមស្របនឹងអត្តសញ្ញាណម៉ាឡេរបស់ហ្វីលីពីន។ លោក ឌូទើតេ លើកឡើងថា ឈ្មោះហ្វីលីពីនតំណាងឲ្យស្ដេចរបស់អេស្ប៉ាញដែលជាអតីតម្ចាស់អាណានិគមរបស់ហ្វីលីពីន។
អេស្ប៉ាញ បានដាក់អាណានិគមលើរដ្ឋអាស៊ីអាគ្នេយ៍មួយនេះតាំងពីសតវត្សរ៍ទី១៥មក។ នៅសតវត្សរ៍ទី១៦ លោក ម៉ាសេឡង់ ក៏ទៅដល់ប្រជុំកោះនេះ ហើយក៏ដាក់ឈ្មោះថា ហ្វីលីពីន តែម្ដង ដោយហៅតាមព្រះនាមមហាក្សត្រហ្វីលីពទី២ របស់អេស្ប៉ាញនៅពេលនោះ។ បើតាមសារព័ត៌មានហ្វីលីពីន ABS-CBN អ្នករុករកអេស្ប៉ាញ Ruy Lopez de Villalobos ជាអ្នកហៅប្រជុំកោះនោះថា Las Islas Filipinas ។
លោក ឌូទើតេ ដែលរិះគន់អេស្ប៉ាញជាញឹកញយនោះ ចង់ប្ដូរឈ្មោះនេះចេញ។ លោកបានរំឭកពីការប៉ុនប៉ងរបស់លោក ហ្វែឌីណង់ ម៉ាកូស អតីតមេដឹកនាំរបស់ហ្វីលីពីនក្នុងការផ្លាស់ប្ដូរឈ្មោះនេះ តែមិនបានសម្រេច ដ្បិតលោកកាន់អំណាចផ្ដាច់ការនៅពេលនោះ។ លោក ឌូទើតេ គាំទ្រឲ្យប្ដូរឈ្មោះប្រទេសថ្មីទៅជា «សាធារណរដ្ឋមហាលីកា» វិញ ព្រោះវាបញ្ជាក់ពីអត្តសញ្ញាណម៉ាឡេ និងមានន័យទាក់ទងសន្តិភាព និងភាពស្ងប់ស្ងាត់។
នៅហ្វីលីពីន ពាក្យមហាលីកានេះ សំដៅដល់វណ្ណៈអ្នកប្រយុទ្ធក្នុងសម័យកាល Tagalog បុរាណនៅលើកោះ Luzon ប៉ុន្តែក្នុងសម័យកាលទំនើបនេះមានន័យពាក់ព័ន្ធនឹងអភិជនវិញ។ សម្រាប់ឬសគល់ម៉ាឡេវិញ លោក ឌូទើតេ បកស្រាយថា ឥស្លាមបានចូលដល់ហ្វីលីពីនមុនការមកដល់របស់អេស្ប៉ាញទៅទៀត ហើយជនជាតិហ្វីលីពីនមានដើមកំណើតម៉ាឡេដែរ ប៉ុន្តែសកម្មភាពរបស់អាណានិគម ធ្វើឲ្យអត្តសញ្ញាណម៉ាឡេបាត់បង់៕
Tag:
ហ្វីលីពីន
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com