៥បទរបស់ មាស សុខសោភា ក្នុងកម្មវិធី«ស្នាដៃកូនខ្មែរសម្រាប់មាស សុខសោភា»សុទ្ធតែពីរោះ មិនធម្មតា

អត្ថបទពាណិជ្ជកម្ម

៥បទរបស់ មាស សុខសោភា ក្នុងកម្មវិធី«ស្នាដៃកូនខ្មែរសម្រាប់មាស សុខសោភា»សុទ្ធតែពីរោះ មិនធម្មតា

25, Feb 2019 , 5:41 pm

រូបភាព

ដោយ: ថ្មីៗ

ដើមឆ្នាំ២០១៩នេះ តារាចម្រៀងសំឡេងផ្អែមស្រទន់ មាស សុខសោភា បានសម្រុកបញ្ចេញបទចម្រៀងថ្មីរបស់ខ្លួនជាច្រើន មានទាំងបទមរតកដើម និងបទតែងនិពន្ធថ្មី។ ក្នុងនោះក៏មានផងដែរ បទចម្រៀង៥បទដែលស្ថិតក្នុងកម្មវិធី «ស្នាដៃកូនខ្មែរសម្រាប់មាស សុខសោភា»ផងដែរ ដែលត្រូវបានផលិតនៅក្រោមផលិតកម្មរបស់ខ្លួនផ្ទាល់ គឺផលិតកម្ម CAMTRAX និងមានការឧបត្ថម្ភដោយ ភេសជ្ជៈជំនួយដល់សម្រស់ និងសុខភាព OLATTE ។

ក្នុងចំណោមបទចម្រៀងទាំង៥នេះ ក៏នឹងត្រូវជ្រើសរើសមកប្រកួតប្រជែង ដើម្បីស្វែងរកជ័យលាភី ដើម្បីទទួលរង្វាន់ជាច្រើនផងដែរ។ លើសពីនេះ បទចម្រៀង៥បទនេះបានធ្វើឲ្យអ្នកគាំទ្ររបស់កញ្ញាជជែកវែកញែក ចង់ដឹងថាតើបទណា និងទទួលបានជ័យលាភី ទទួលប្រាក់រង្វាន់ពីកម្មវិធី។

ឥឡូវនេះចង្ងល់ទាំងអស់នេះបានស្រាយហើយ ដោយកាលពីល្ងាចថ្ងៃទី ២៤ខែធ្នូ នេះកញ្ញា មាស សុខសោភា បានបង្ហាញវត្តមាននៅ កម្មវិធី Olatte Concert ដែលធ្វើការផ្សាយផ្ទាល់តាមរយៈស្ថានីយ៍ទូរទស្សន៍ CTN ហើយបានលើកយក បទចម្រៀងទាំង៥បទ របស់បេក្ខជននៃកម្មវិធី «ស្នាដៃកូនខ្មែរសម្រាប់មាស សុខសោភា»បកស្រាយ ហើយបានប្រកាសជ័យលាភីភ្លាមៗ តែម្តង។ ជ័យលាភីលេខ១ បានទៅបទ«ព្រោះគេមនុស្សដំបូង» និពន្ធដោយ បេក្ខជនមកពីខេត្តខេត្តកណ្តាល ងឿយ ប៊ុនរត្ន័ (Ah Roman)។ ជ័យលាភីលេខ២ បានទៅបទ«ខ្ញុំកំពុងឈឺ»និពន្ធដោយ បេក្ខជនរាជធានីភ្នំពេញ ឆុន រ៉ាឆាត់ (Chhon Rachhat)។ ជ័យលាភីលេខ៣ បានបទ «ថ្ងៃជួបថ្ងៃព្រាត់» និពន្ធដោយបេក្ខជនរាជធានី ភ្នំពេញ រិន ឆោមវីរៈ និងសំណាង ឧត្តម។ ជ័យលាភីលេខ៤ គឺបទ«នៅក្រមុំមិនបានដើរលេង! និពន្ធដោយបេក្ខជនរាជធានី ភ្នំពេញ គង់ សំអននិងជ័យលាភីលេខ៥ បានទៅបទ «លង់ស្នេហ៍អ្នកបាត់ដំបង» និពន្ធដោយបេក្ខជនខេត្តពោធិ៍សាត់ ស៊ឹម សុភ័ណ្ឌ។

គួររំលឹកផងដែរថា កម្មវិធីប្រកួតប្រជែងនេះ គឺជាកម្មវិធីមួយថ្មី ក្រោមគំនិតផ្តួចផ្តើមរបស់កញ្ញាមាស សុខសោភា ផ្ទាល់ ហើយបានធ្វើឡើងតាំងពីខែតុលា ឆ្នាំ ២០១៨។ មានបទចម្រៀងជាង ២០០បទ របស់បេក្ខជន ជិត២០០នាក់ ដែលបានផ្ញើមកកាន់កម្មវិធីនេះ ហើយចុងក្រោយមាន តែ៥បទប៉ុណ្ណោះ ដែលបន្តប្រជែងគ្នានៅវគ្គចុងក្រោយនេះ។ យ៉ាងណាមិញ បេក្ខជនជ័យលាភី ទទួលបានប្រាក់រង្វាន់ ចំនួន៤លានរៀល និងទទួលបានពានដែលច្នៃដោយកូនខ្មែរ ពីក្រុមហ៊ុន AM-STAR Co.,Ltd៕