អត្ថបទពាណិជ្ជកម្ម
Huawei បញ្ចេញកាណុងធំ ស្មាតហ្វូនដែលបត់បានជាមួយបច្ចេកវិទ្យា 5G
× ក្រុមហ៊ុន Huawei បានសម្ពោធស្មាតហ្វូនជំនាន់ថ្មីរបស់ខ្លួនដែលអាចបត់បាន និងដំណើរការបច្ចេកវិទ្យា 5G កាលពីថ្ងៃអាទិត្យ ក្នុងកម្មវិធីសន្និសីទទូរសព្ទពិភពលោក ( Mobile World Congress) នៅទីក្រុង Barcelona។ នេះជាការបង្ហាញសាច់ដុំទៅទីក្រុងវ៉ាស៊ីនតោន ដែលព្យាយាមរារាំងបច្ចេកវិទ្យា 5G របស់ខ្លួន ។
ការបង្ហាញស្មាតហ្វូនដែលអាចបត់បាននេះ ពិតជាបានទាក់ទាញការចាប់អារម្មណ៍ របស់អ្នកចូលរួមយ៉ាងខ្លាំង ក្នុងសន្និសីទទូរសព្ទពិភពលោកនេះ។ Huawei Mate X មានតម្លៃ $2,600 ហើយអេក្រង់របស់វាមានព័ទ្ធជុំវិញនៅផ្នែកខាងក្រៅ ដែលយើងនៅតែអាចមើលបាន ពេលដែលនៅបិទ។
គួររំលឹកផងដែរថា អាមេរិកបានដាក់សម្ពាធលើក្រុមហ៊ុន Huawei យ៉ាងខ្លាំង ដោយបានចោទប្រកាន់ថា Huawei បានប្រើឧបករណ៍បច្ចេកវិទ្យារបស់ខ្លួន ដើម្បីស៊ើបការសម្ងាត់ប្រទេសលោកខាងលិច។ មិនតែប៉ុណ្ណោះ អាមេរិកក៏អំពាវនាវឲ្យប្រទេសសម្ព័ន្ធភាពរបស់ខ្លួន កុំប្រើបច្ចេកវិទ្យារបស់ Huawei ផងដែរ។
ក្រុមហ៊ុន Huawei ដែលជាក្រុមហ៊ុនស្មាតហ្វូនធំបំផុតលំដាប់ថ្នាក់លេខពីរក្នុងពិភពលោក និងជាក្រុមហ៊ុនផ្គត់ផ្គង់ឧបករណ៍បច្ចេកវិទ្យាប្រព័ន្ធទូរសព្ទឈានមុខក្នុងពិភពលោក បានបដិសេធ និងច្រានចោលការចោទប្រកាន់ទាំងស្រុង ម្តងហើយម្តងទៀត ថាខ្លួនមិនបានប្រើឧបករណ៍បច្ចេកវិទ្យារបស់ខ្លួន ដើម្បីស៊ើបការរឿងសម្ងាត់របស់ប្រទេសណាមួយឡើយ។ ក្រុមហ៊ុន Huawei ចាត់ទុកការចោទប្រកាន់នេះ សុទ្ធតែជាហេតុផលនយោបាយរបស់អាមេរិក។
ក្នុងបទសម្ភាសជាមួយ BBC លោក Ren Zhengfei ស្ថាបនិកក្រុមហ៊ុន Huawei បានលើកឡើងថា៖ «អាមេរិកគ្មានផ្លូវអាចវាយបំបាក់យើងបានទេ។ ពិភពលោកពិតជាត្រូវការ Huawei។ ការដាក់សម្ពាធនេះ នឹងធ្វើឲ្យយើងកាន់តែខ្លាំង និងកាន់តែខិតខំប្រឹងប្រែងក្នុងការធ្វើឲ្យផលិតផល និងសេវារបស់យើងកាន់តែល្អជាងមុន។ ប្រសិនបើយើងមិនអាចដំណើរការអាជីវកម្ម នៅប្រទេសលោកខាងលិច យើងនៅតែដំណើរការបាននៅខាងកើត។ ប្រសិនបើប្រទេសលោកខាងជើងមិនស្វាគមន៍ទេ យើងនៅមានប្រទេសនៅលោកខាងត្បូងដែរ»។
រីឯលោក Guo Ping នាយកផ្នែក Rotating របស់ក្រុមហ៊ុន Huawei បានលើកឡើង ក្នុងការពិភាក្សារតុមូលជាមួយសារព័ត៍មាន កាលពីថ្ងៃអាទិត្យ នៅទីក្រុង Barcelona ថា លោកនៅតែមិនយល់សោះ ហេតុអ្វីបានជាប្រទេសមហាអំណាចមួយនេះ ព្យាយាមវាយប្រហារ និងចោទប្រកាន់ដោយគ្មានមូលដ្ឋាន ទៅលើ បច្ចេកវិទ្យាឈានមុខរបស់ Huawei។ លោកបានបន្ថែមទៀតថា៖« Huawei តែងតែគោរពតាមច្បាប់អាជីវកម្មរបស់ប្រទេសចិន និងប្រទេសនីមួយៗដែលខ្លួនធ្វើអាជីវកម្ម។ ដូច្នេះ Huawei មិនដែល និងមិនអាចធ្វើអ្វីមួយ ដែលផ្ទុយពីច្បាប់របស់ប្រទេសណាមួយបានឡើយ»។
បច្ចេកវិទ្យា 5G ឈានមុខរបស់ Huawei បានដាក់ឲ្យដំណើរការ មុនគូប្រកួតរបសខ្លួនដូចជា Sweden's Ericsson ឫ Finland's Nokia បានមុនរហូតដល់ 12 ខែ។
គួរបញ្ជាក់ផងដែរថា Huawei គឺជាម៉ាកដែលស្ថិតក្នុងលេខរៀងទី 68 ក្នុងចំណោមម៉ាកដែលមានតម្លៃបំផុតក្នុងពិភពលោក( Forbes World’s Most Valuable Brands) និងស្ថិតនៅលេខរៀងទី 12 ពី Brand Finance Global 500 នៅក្នុងឆ្នាំ 2019 ហើយគុណតម្លៃម៉ាក ( brand value) មានការកើនឡើង 63.7% បើប្រៀបធៀបពីឆ្នាំ2018 ទៅ2019។ មិនតែប៉ុណ្ណោះ Huawei លក់ស្មាតហ្វូនក្នុងទីផ្សារបានរហូតដល់ ២០០លាន គ្រឿងក្នុងឆ្នាំ 2018។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com