អ្នកលក់ឆ្នើម ៣៥ រូប ទទួលរង្វាន់លើកទឹកចិត្តម៉ូតូម្នាក់១គ្រឿង ពីក្រុមហ៊ុន ជីប ម៉ុងអ៊ិនស៊ី

អត្ថបទពាណិជ្ជកម្ម

អ្នកលក់ឆ្នើម ៣៥ រូប ទទួលរង្វាន់លើកទឹកចិត្តម៉ូតូម្នាក់១គ្រឿង ពីក្រុមហ៊ុន ជីប ម៉ុងអ៊ិនស៊ី

27, Feb 2019 , 3:34 pm

រូបភាព

ដោយ: ថ្មីៗ

ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន (CMIC) នៅថ្ងៃទី ទី២៧ ខែកុម្ភៈ ឆ្នាំ ២០១៩នេះ បានរៀបចំពិធីប្រគល់រង្វាន់លើកទឹកចិត្ត គឺ ម៉ូតូហុងដា (Honda Dream) ស៊េរីឆ្នាំ ២០១៩ យ៉ាងស្រស់ស្អាត ម្នាក់ចំនួន ១ គ្រឿង ជូនដល់អ្នកលក់ឆ្នើមចំនួន ៣៥នាក់ ដែលមកពីគ្រប់ខេត្តក្រុងទូទាំងប្រទេស។ កម្មវិធីប្រគល់រង្វាន់នេះ ត្រូវបានធ្វើឡើងនៅមន្ទីរពិសោធន៍របស់ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ដែលមានទីតាំងស្ថិតនៅខាងក្នុងបុរី ជីប ម៉ុងឡេនផ្លូវ ២៧១។

លោក ឆុង យឿប ប្រធានផ្នែកលក់នៃក្រុមហ៊ុន ជីប ម៉ុងអ៊ីនស៊ី មានប្រសាសន៍ថា ព្រឹត្តិការណ៍ប្រគល់រង្វាន់ម៉ូតូទាំង ៣៥គ្រឿង ជូនដល់ដៃអ្នកលក់ឆ្នើមនៅក្នុងឱកាសនេះ គឺជាផ្នែកមួយរបស់ក្រុមហ៊ុន ជីប ម៉ុង អ៊ិនស៊ី ដើម្បីឆ្លើយតបនឹងកិច្ចខិតខំប្រឹងប្រែង ក៏ដូចជាការលើកទឹកចិត្តដល់ដៃគូ និងបណ្ដាញចែកចាយរបស់ខ្លួន នៅក្នុងប្រទេសកម្ពុជា។

លោក ឆុង យឿប បានបញ្ជាក់ដូច្នេះថា៖«យើងមានក្ដីសប្បាយរីករាយខ្លាំង ដែលមានដៃគូពេញដោយសមត្ថភាព។ មួយវិញទៀត យើងពិតជាមានទំនុកចិត្តថា ពួកយើងនឹងបន្តដំណើរទៅមុខទៀត បានកាន់តែប្រសើរ។ លោកក៏បានបន្ថែមទៀតថា៖«ចូលរួមទាំងអស់គ្នា ដើម្បីសាងសង់ដោយមោទនភាព»។

សូមជម្រាបថា ហ៊ុនជីប ម៉ុង អ៊ិនស៊ី ស៊ីមេន ខបភើរេសិន (CMIC) ត្រូវបានបង្កើតឡើង និងបានចុះបញ្ជីនៅប្រទេសកម្ពុជា ក្នុងឆ្នាំ២០១៥ និងជាការវិនិយោគរួមរវាងក្រុមហ៊ុន ជីប ម៉ុង គ្រុប នៅប្រទេសកម្ពុជា និងក្រុមហ៊ុនស៊ីម៉ងត៍ Siam City Cement នៅប្រទេសថៃ។ ក្រុមហ៊ុនជីប ម៉ុង អ៊ិនស៊ី ស៊ីមេន ខបភើរេសិន (CMIC) មានដើមទុនសរុបចំនួន២៦២ លានដុល្លារ។ ក្រុមហ៊ុននេះបានផលិតស៊ីម៉ងត៍ដែលមានគុណភាពខ្ពស់ សម្រាប់ទីផ្សារលក់រាយ និងទីផ្សារឧស្សាហកម្ម ដោយប្រើប្រាស់វត្ថុធាតុដើមក្នុងស្រុក មានគុណភាពខ្ពស់ ជាមួយនឹងការត្រួតពិនិត្យស្តង់ដារ និងធានាគុណភាពលំដាប់ពិភពលោក។

រោងចក្រនេះ អាចមានលទ្ធភាពផលិតស៊ីម៉ងត៍រហូតដល់ ៦,០០០តោន ក្នុងមួយថ្ងៃ។ ក្នុងនោះ ក្រុមហ៊ុនបានចាត់ទុកស៊ីម៉ងត៍អូដ្ឋ ជាផលិតផលសំខាន់ សម្រាប់ផ្គត់ផ្គង់លើទីផ្សារ ដោយវាត្រូវបានបែងចែកជា ២ប្រភេទ គឺស៊ីម៉ងត៍អូដ្ឋពណ៌ទឹកក្រូច មានគុណភាពល្អស័ក្ដសមសម្រាប់សំណង់រឹងមាំល្អ ក៏ដូចជាការប្រើប្រាស់ក្នុងគោលបំណងទូទៅ។ រីឯស៊ីម៉ងត៍អូដ្ឋពណ៌បៃតង មានគុណភាពពិសេស និងល្អបំផុតសម្រាប់ការងារបូក។ ស៊ីម៉ងត៍នេះ ក៏ត្រូវបានប្រើប្រាស់នៅទូទាំងប្រទេសរួមទាំងរចនាសម្ព័ន្ធសំខាន់ៗជាច្រើន ដូចជា អគារណាហ្គាវើល២ សណ្ឋាគារសុខាជ្រោយចង្វារ, បុរីជីប ម៉ុងលែន និងផាកសុនម៉លផងដែរ៕