អាមេរិកផ្តល់ប្រាក់២លានដុល្លារដល់CMAC សម្រាប់សម្អាតមីននៅខេត្តត្បូងឃ្មុំ

ជាតិ

អាមេរិកផ្តល់ប្រាក់២លានដុល្លារដល់CMAC សម្រាប់សម្អាតមីននៅខេត្តត្បូងឃ្មុំ

06, Mar 2019 , 3:55 pm

រូបភាព

រូបភាពបានពីទំព័រហ្វេសប៊ុក លោក ហេង រតនា ប្រធាន CMAC

ដោយ: អ៊ូ សុខមាន (OU Sokmean)

ភ្នំពេញ៖ រដ្ឋាភិបាលអាមេរិកបានផ្តល់ជំនួយ២លានដុលា្លរ ដល់មជ្ឈមណ្ឌលសកម្មភាពកម្ចាត់មីនកម្ពុជា(CMAC) ដើម្បីសម្អាតមីន នៅតំបន់គោលដៅ ក្នុងខេត្តត្បូងឃ្មុំ។ ថវិកាទាំងនេះ ត្រូវយកទៅអនុវត្តការងារក្នុងរយៈពេលមួយឆ្នាំ គឺចាប់ពីថ្ងៃទី១មីនា ឆ្នាំ២០១៩ ដល់ថ្ងៃទី២៨ កុម្ភ: ឆ្នាំ២០២០។នេះបើតាម លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា។

លោក ហេង រតនា បានបញ្ជាក់លើហ្វេសប៊ុករបស់ខ្លួនកាលពី៥មីនាថា វាជាឆ្នាំទី២ហើយ ដែលអាមេរិកផ្ដល់ថវិកាគាំទ្រសកម្មភាពដោះមីននៅកម្ពុជា តាមរយៈអង្គការNPA ។

កាលឆ្នាំទី១ រដ្ឋាភិបាលអាមេរិកបានផ្តល់ជំនួយ១,៦លានដុល្លារ ដើម្បីបោសសម្អាតមីន លើផ្ទៃដី២,២០០ហិចតា នៅខេត្តភាគខាងកើតប្រទេសកម្ពុជា។

ទាក់ទងនឹងសកម្មភាពបោសសម្អាតមីននេះ សម្តេច ហ៊ុន សែន ធ្លាប់បានបញ្ជាក់កន្លងមកថា កម្ពុជាត្រូវការថវិកាជាង៤០០លានដុល្លារទៀត សម្រាប់ការបោសសម្អាតមីន សំណល់ជាតិផ្ទុះ និងគ្រាប់បែក នៅលើផ្ទៃដីប្រមាណ១៩៧០គីឡូម៉ែត្រក្រឡា ឱ្យអស់នៅក្នុងឆ្នាំ២០២៥ ។

គិតមកដល់ពេលនេះ កម្ពុជា បានរកឃើញនិងកម្ទេចចោលគ្រប់មីនប្រឆាំងមនុស្សជាង១លានគ្រាប់, គ្រាប់មីនប្រឆាំងរថគ្រោះជាង២,៤ម៉ឺនគ្រាប់ និងសំណល់ជាតិផ្ទុះជាង២,៧លានគ្រាប់។ ចំនួនប្រជាជនដែលរងគ្រោះ បានធា្លក់ចុះពី២៣២០នាក់ ក្នុងឆ្នាំ១៩៩៦ មកនៅត្រឹម៥៨នាក់ ក្នុងឆ្នាំ២០១៨៕