ជាតិ
បទយកការណ៍ / បទសម្ភាសន៍
យុវសិស្សស្រី ចាប់ផ្តើមរៀនជំនាញសរសេរកូដ ដើម្បីជាដើមទុនអភិវឌ្ឍផ្នែកបច្ចេកវិទ្យានៅថ្ងៃអនាគត
រូបភាពពីក្រសួងអប់់រំ យុវជន និងកីឡា
×![]()
ភ្នំពេញ៖ ក្រសួងអប់រំ យុវជន និងកីឡា បានបង្កើតកម្មវិធីថ្មីមួយមុនគេបង្អស់នៅកម្ពុជាគឺ «Sister of Code»សម្រាប់ផ្តល់ឱកាសឲ្យសិស្សស្រី ដែលរៀននៅតាមវិទ្យាល័យ រៀនពីរបៀបសរសេរកូដ ដែលជាបច្ចេកវិជ្ជាទំនើប សម្រាប់ជាដើមទុននៅថ្ងៃអនាគត និងដើម្បីជំរុញឲ្យបច្ចេកវិទ្យានៅកម្ពុជាកាន់តែទំនើប។
ជាសិស្សថ្នាក់ទី៨ នៃសាលារៀនជំនាន់ថ្មី នៅក្នុងវិទ្យាល័យព្រះស៊ីសុវត្ថិ យុវតី អិន អេមពិសីសុជាតា កំពុងរៀនជំនាញសរសេរកូដ ដែលជាចំណងចំណូលចិត្តរបស់នាងផង។ មុននឹងចុះឈ្មោះរៀនជំនាញនេះ សុជាត បានចាប់អារម្មណ៍ផ្នែកបច្ចេកវិទ្យាទំនើបៗរបស់អ្នកវិទ្យាសាស្ត្រជាច្រើន ដែលជាការជំរុញទឹកចិត្តនាងចង់ក្លាយជាអ្នកដែលបង្កើតអ្វីដែលថ្មី។ សុជាតា ជឿជាក់ថា កម្មវិធី«Sister of Code» ដែលជាកម្មវិធីថ្មីស្រឡាងនេះ នឹងអាចនាំផ្លូវឲ្យនាងសម្រេចគោលបំណង ដែលចង់ក្លាយជាអ្នកបង្កើត Program ដើម្បីការពារ Website និង Application បាននៅថ្ងៃអនាគត។
ថ្លែងប្រាប់សារព័ត៌មានថ្មីៗ យុវសិស្សថ្នាក់ទី៨រូបនេះ បាននិយាយដូច្នេះថា៖«បន្ទាប់ពីខ្ញុំបានមើលឃើញពីបច្ចេកវិទ្យាទំនើបៗមក ខ្ញុំចាប់ផ្តើមចង់ក្លាយជាអ្នកបង្កើតអ្វីដែលថ្មី រួចមកខ្ញុំក៏ចាប់ផ្តើមស្រាវជ្រាវជាបន្តបន្ទាប់ ចៃដន្យសាលាក៏មានបើកជំនាញនេះ ខ្ញុំក៏ចាប់ផ្តើមរៀនសរសេរកូដនេះតែម្តង»។
ស្ថិតនៅក្នុងបណ្ណាល័យសាលាជំនាន់ថ្មី នៃវិទ្យាល័យព្រះស៊ីសុវត្ថិ យុវតី ញ៉ូ តូម៉ានាថ ដែលសិក្សាជំនាញសរសេរកូដនេះ បាននិយាយថា ជំនាញមួយនេះ នឹងជួយជំរុញឲ្យសិស្សជំនាន់ក្រោយ អាចចាប់យកផ្នែកសរសេរកូដកាន់តែមានសន្ទុះខ្លាំងឡើង។ យុវតី តូម៉ានាថ ដែលធ្លាប់បង្កើតកម្មវិធី Game មួយជោគជ័យកន្លងមកនេះ យល់ឃើញថា កម្មវិធីរបស់ក្រសួងអប់រំនេះ នឹងជួយឲ្យខ្លួនមានការអភិវឌ្ឍកាន់ខ្ពស់បន្ថែមទៀត។ «លើកទឹកចិត្តឲ្យយុវតីដទៃដែលមានក្តីស្រមៃចង់ក្លាយជាអ្នកសរសេរកូដដ៏ពូកែ គឺកុំត្រូវបោះបង់ក្តីស្រមៃរបស់ខ្លួន ដោយពុំត្រូវគិតថាខ្លួនជាមនុស្សស្រីមិនអាចរៀនជំនាញនេះបាន គឺត្រូវគិតថាជំនាញនេះ អ្នកណាៗក៏អាចរៀនបានផងដែរ»។ នេះជាការលើកឡើងរបស់យុវតី ញ៉ូ តូម៉ានាថ។
លោក សម្យ កំសាន្ត នាយករងនៃសាលាជំនាន់ថ្មី បាននិយាយថា ក្រោយពីយុវសិស្សស្រី បានរៀនពីរបៀបសរសេរកូដអស់រយៈពេល៣អាទិត្យមកនេះ ពួកគេមានភាពស្វាហាប់ និងខិតខំរៀនសូត្រ ដោយគ្មាននរណាម្នាក់រួញរាក្នុងការរៀនជំនាញនេះឡើយ។ លោក សម្យ កំសាន្ត មានក្តីរំពឹងទុកយ៉ាងម៉ុតមាំថា ពួកគេទាំងអស់នោះនឹងអាចធ្វើការងារ ដែលប្រកបដោយគុណភាពខ្ពស់នៅថ្ងៃអនាគត។ បើតាមលោក សម្យ កំសាន្ត កម្មវិធីសិក្សានេះបង្កើតឡើងសម្រាប់តែសិស្សស្រីអាចទទួលបានចំណេះដឹង និង បញ្ចេញសមត្ថភាពលើជំនាញសរសេរកូដប៉ុណ្ណោះ។
លោកនាយករងនៅសាលាជំនាន់ថ្មី បានបញ្ជាក់ថា៖«យើងមានបច្ចេកវិជ្ជាទំនើបៗប្រើប្រាស់ហើយ ប្រសិនបើយើងខ្វះធនធានអ្នកដែលចេះប្រើប្រាស់ ក៏ការប្រើប្រាស់អត់មានតម្លៃដែរ។ ខ្ញុំចង់ឲ្យក្រសួងអប់រំពង្រីកវិសាលភាពផ្នែកមុខវិជ្ជានេះនៅគ្រប់វិទ្យាល័យទាំងអស់ ដើម្បីឲ្យពួកគេអាចរៀនសូត្រពីបច្ចេកវិទ្យាឲ្យទាន់សភាពការណ៍ នៅសតវត្សទី២១ រស់នៅជាមួយបច្ចេកវិទ្យា ដែលមនុស្សនឹងប្រើប្រាស់នៅថ្ងៃអនាគត»។
លោក ឌី ខាំបូលី អ្នកនាំពាក្យក្រសួងអប់រំ បាននិយាយថា មូលហេតុដែលក្រសួងអប់រំរៀបចំកម្មវិធី«Sister of Code» នេះ ដោយសារឃើញវត្តមានសិស្សស្រីនៅកម្ពុជា មិនទាន់មានឱកាសក្នុងការរៀនពីរបៀបសរសេរកូដឲ្យវិសាលភាព ឆ្លើយតបនឹងការវិវដ្តសម័យបច្ចេកវិទ្យានៅឡើយ។ ដូច្នេះតាមរយៈកម្មវិធីនេះ លោកជឿជាក់ថា សិស្សស្រីទាំងអស់ នឹងអាចយល់ដឹងបន្ថែមពីរបៀបសរសេរកូដ ដែលជាបច្ចេកវិទ្យាទំនើប សម្រាប់ជាមូលដ្ឋានគ្រឹះសិក្សានៅថ្នាក់មហាវិទ្យាល័យផងដែរ។
ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងអប់រំរូបនេះ បានបញ្ជាក់ដូច្នេះថា៖«យើងចង់លើកកម្ពស់ឲ្យសិស្សស្រីរៀនផ្នែកវិទ្យាសាស្ត្រឲ្យកាន់តែច្រើន ដោយសារចំនួនសិស្សស្រីដែលយល់ដឹងពីផ្នែកសរសេរកូដនេះ មានបរិមាណតិចជាងសិស្សប្រុស។ ដើម្បីឆ្លើយតបនឹងការអភិវឌ្ឍផ្នែកបច្ចេកវិទ្យាទំនើបនៅក្នុងសង្គមបច្ចុប្បន្ន យើងនឹងជំរុញឲ្យសិស្សស្រី មានជំនាញផ្នែកបច្ចេកវិទ្យា និងរៀនពីការអភិវឌ្ឍWebsite ឲ្យកាន់តែស៊ីជម្រៅបន្ថែមទៀត»។
ជាជំហានដំបូង ក្រសួងអប់រំចង់សាកល្បងបើកបង្រៀនវគ្គនេះ ចំនួនតែ៦ខែសិន ដោយរៀនតែមួយថ្ងៃប៉ុណ្ណោះក្នុងមួយសប្តាហ៍ គឺថ្ងៃអាទិត្យ ហើយរៀនរយៈពេល២ម៉ោងកន្លះក្នុងមួយថ្ងៃ។ កម្មវិធីរៀនទើបតែអនុវត្តនៅវិទ្យាល័យចំនួន២ ដូចជា វិទ្យាល័យព្រះស៊ីសុវត្ថិ និងវិទ្យាល័យ ហ៊ុន សែន សេរីភាព។ ប្រសិនជាកម្មវិធីនេះជោគជ័យ ក្រសួងនឹងរៀបចំឲ្យមានកម្មវិធីនេះ កាន់តែទូលំទូលាយបន្ថែមទៀតផង។ នេះជាការបញ្ជាក់របស់លោក ឌី ខាំបូលី។
«Sister of Code» គឺជាកម្មវិធីថ្មីមួយបន្ថែមលើមុខវិជ្ជាសិក្សារបស់សិក្សានុសិស្សដែលរៀននៅថ្នាក់វិទ្យាល័យ ដែលក្រសួងអប់រំនឹងផ្តល់ឱកាសឲ្យសិស្សស្រីអាចរៀនសូត្របន្ថែមពីរបៀបសរសេរកូដ។ កម្មវិធីនេះ អាចអនុញ្ញាតឲ្យសិស្សស្រីដែលមានអាយុចាប់ពី១០ឆ្នាំ ទៅ១៨ឆ្នាំ ទើបមានសិទ្ធិមកចុះឈ្មោះដោយរៀនឥតគិតថ្លៃ។ ក្រសួងអប់រំ បានសហការរួមគ្នាជាមួយគ្រឹះស្ថានបណ្តុះបណ្តាល IT Academy STEP Cambodia និងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា(STEM) បង្កើតកម្មវិធីនេះឡើង៕
Tag:
សិស្សស្រី
កូដ
បច្ចេកវិទ្យា
អប់រំ
© រក្សាសិទ្ធិដោយ thmeythmey.com
