អន្តរជាតិ
ចំខួបទី៧០ថ្ងៃកំណើតទ័ពជើងទឹក លោក ស៊ី ជិនភីង ថា ចិនជាប្រទេសស្រឡាញ់សន្តិភាព ប្រធានាធិបតីចិន ស៊ី ជិនភីង ត្រួតពលទ័ពជើងទឹក។ រូបភាព Xinhua
× ប្រទេសចិន នៅថ្ងៃទី២៣ ខែមេសា បានរៀបចំពិធីអបអរយ៉ាងអធិកអធមមួយដើម្បីរំឭកខួបទី៧០ ថ្ងៃបង្កើតកងទ័ពជើងទឹករបស់ខ្លួន។ ប្រទេស៦១ បានបញ្ជូនប្រតិភូរបស់ខ្លួនឲ្យចូលរួមក្នុងកម្មវិធីដែលធ្វើនៅទីក្រុងមាត់សមុទ្រឈីងតៅ ខណៈនាវាចម្បាំងជាច្រើនចូលរួមក្នុងពិធីដង្ហែក្បួន។ ប្រធានាធិបតីចិន ស៊ី ជិនភីង បានស្នើឲ្យទ័ពជើងទឹកនៅជុំវិញពិភពលោកដើម្បីរក្សាសន្តិភាពលើលំហសមុទ្រ ហើយថា ប្រជាជនចិនជាប្រជនស្រឡាញ់សន្តិភាព។
ប្រធានាធិបតីចិន ស៊ី ជិនភីង បានធ្វើជាអធិបតីក្នុងពិធីដង្ហែក្បួនព្យុហយាត្រាជើងទឹកដើម្បីអបអរខួបទី៧០ នៃការបង្កើតកងទ័ពជើងទឹកចិននៅថ្ងៃទី២៣ ខែមេសា។ ប្រមុខកងទ័ពជើងទឹក និងប្រតិភូប្រទេសចំនួន៦១ មកពីជុំវិញពិភពលោកបានចូលរួមក្នុងកម្មវិធីនេះ ស្របពេលដែលនាវាចម្បាំងបរទេសចំនួន២១គ្រឿង បូកបញ្ចូលនាវាចិនចំនួន៣២គ្រឿងទៀត បានចូលរួមក្នុងពិធីដង្ហែដែលដឹកនាំដោយនាវាដឹកយន្តហោះទីមួយរបស់ចិន Liaoning ។
មុនពិធីដង្ហែក្បួន លោក ស៊ី បានជួបជាមួយមេទ័ពជើងទឹកបរទេស និងតំណាងយោធាជាច្រើនទៀត ដោយបានអំពាវនាវឲ្យមានការដោះស្រាយដោយសន្តិវិធី។ បើតាមទីភ្នាក់ងារព័ត៌មានរដ្ឋចិន Xinhua ចំពោះមុខមន្ត្រីយោធាជាន់ខ្ពស់ជាច្រើន លោក ស៊ី ដែលជាប្រធានគណៈកម្មការយោធាមជ្ឈិមដែរនោះ លើកឡើងថា ចិនជាប្រជាជាតិស្រឡាញ់សន្តិភាព ចង់បានសន្តិភាព និងបន្តដើរផ្លូវអភិវឌ្ឍដោយសន្តិភាពឥតងាករេអ្វីឡើយ។
លើសពីនោះ មេដឹកនាំចិនរូបនេះប្រកាសថា គោលនយោបាយការពារជាតិរបស់ចិន មានលក្ខណៈការពារខ្លួនសុទ្ធសាធ ហើយតស៊ូដើម្បីសន្តិសុខ កិច្ចសហប្រតិបត្តិការប្រកបដោយចីរភាព និងគ្រប់ជ្រុងជ្រោយ។ ក្នុងន័យយនេះ លោក ស៊ី អះអាងថា យោធាចិនប្ដេជ្ញាចិត្តបង្កើតបរិយាកាសសន្តិសុខដែលពោរពេញដោយសមធម៌ ការទុកចិត្តគ្នាទៅវិញទៅមក មានយុត្តិធម៌ ព្រមទាំងមានរក្សាប្រយោជន៍គ្នាទៅមកទៀតផង។
នាឱកាសខួបទី៧០នៃការបង្កើតទ័ពជើងទឹករបស់ខ្លួន ចិនបានបង្ហាញអាវុធថ្មីៗ និងនាវាចម្បាំងរបស់ខ្លួនជាច្រើនមុខជាលើកដំបូង។ យ៉ាងណាមិញ គេមិនឃើញវត្តមាននាវាចម្បាំងទីពីររបស់ចិន Type 001A ឡើយ។ ជំនួសមកវិញ នាវាពិឃាតធុន Type 055 នឹងក្លាយជាទីចាប់អារម្មណ៍វិញ។ នាវាពិជឃាតប្រភេទនេះមានទម្ងន់ជាង១២ពាន់តោន ហើយដើរតួសំខាន់ក្នុងការការពារនាវាដឹកនាំយន្តហោះ។ គេជឿថា Type 055 ជានាវាពិឃាតខ្លាំងជាងគេនៅអាស៊ី។
សូមបញ្ជាក់ថា យោធាជើងទឹកចិន បានប្រែមុខមាត់យ៉ាងខ្លាំងក្នុងរយៈពេលប៉ុន្មានឆ្នាំចុងក្រោយពេលដែលលោក ស៊ី ចាប់ផ្ដើមធ្វើទំនើបកម្មយោធា។ ក្រោមកំណែទម្រង់នេះ យោធាចិនដែលមិនសូវមានបទពិសោធប្រយុទ្ធច្រើន បានអភិវឌ្ឍសមត្ថភាពរបស់ខ្លួនតាំងពីការបង្កើនបរិមាណ និងគុណភាពយន្តហោះចម្បាំងរហូតដល់មាននាវាដឹកយន្តហោះចម្បាំងដល់ទៅពីរទៀតផង ហើយបច្ចុប្បន្នកំពុងសាងសង់មួយគ្រឿងទៀត៕
© រក្សាសិទ្ធិដោយ thmeythmey.com