អន្តរជាតិ
លោក ស៊ី ជិនភីង ថា អរិយធម៌គ្មានខ្ពស់ទាបឡើយ
× ប្រធានាធិបតីចិន ស៊ី ជិនភីង នៅថ្ងៃទី១៥ ខែឧសភា បានអំពាវនាវដល់ប្រទេសនានាឲ្យគោរពអរិយាធម៌គ្នាទៅវិញទៅមក ព្រោះអរិយធម៌លើពិភពលោក គ្មានខ្ពស់ទាបអ្វីឡើយ។ សម្រាប់លោក ស៊ី ប្រទេសទាំងឡាយ ចាំបាច់ផ្លាស់ប្ដូរ បើកចំហ និងរៀនសូត្រពីអរិយធម៌គ្នាទៅមកដោយស្មើភាព ហើយក៏មិនត្រូវបង្ខំឲ្យអ្នកណាទទួលយកតម្លៃរបស់ខ្លួនដែរ។ ទោះនិយាយជាទូទៅក្ដី ការលើកឡើងរបស់លោក ស៊ី ហាក់ចង់សំដៅអាមេរិកដែលចាត់ទុកការប្រកួតជាមួយចិន ជាការប្រជែងអរិយធម៌ពីរ។
ថ្លែងក្នុងសន្និសីទស្ដីពីកិច្ចសន្ទនាអរិយធម៌អាស៊ីលើកទីមួយនៅថ្ងៃទី១៥ ខែឧសភា ប្រធានាធិបតីចិន ស៊ី ជិនភីង បានសង្កត់ធ្ងន់ពីសារសំខាន់នៃការគោរពគ្នាទៅវិញទៅមក និងការឲ្យតម្លៃស្មើគ្នារវាងអរិយធម៌ដ៏ច្រើនរបស់ពិភពលោក។ ទោះសម្បូរបែបយ៉ាងណាក្ដី អរិយធម៌គ្មានខ្ពស់ទាបអ្វីឡើយ ព្រោះបើអរិយធម៌មនុស្សផ្ដោតលើអរិយធម៌តែមួយនោះ ពិភពលោកនឹងក្លាយទៅជាទីគួរឲ្យធុញទ្រាន់ ហើយមិនទាក់អារម្មណ៍ផង។
ចំពោះមុខមេដឹកនាំអន្តរជាតិជាច្រើន និងភ្ញៀវអន្តរជាតិជាងពីរពាន់នាក់ទៀតនោះ លោក ស៊ី ក៏រំឭកពីដំណើរទស្សនកិច្ចនៅបរទេសរបស់លោកជាច្រើននៅពេលកន្លងមក ហើយអ្វីដែលបានទាក់ភ្នែកលោក គឺភាពខុសគ្នានៃអរិយធម៌ប្រទេសទាំងនោះ។ ប៉ុន្តែលោកបានព្រមានពីគ្រោះថ្នាក់ បើសិនប្រទេសខ្លះមានគំនិតថា អរិយធម៌មួយខ្ពង់ខ្ពស់ជាងអរិយធម៌មួយទៀត។
ការគិតថា ពូជសាសន៍ខ្លួនឯង និងអរិយធម៌ខ្លួនល្អជាងគេឯង និងការមានគំនិតចង់ផ្លាស់ប្ដូរអរិយធម៌មួយជំនួសដោយអរិយធម៌ខ្លួនឯង គឺជាការគិតដ៏ល្ងង់ខ្លៅ ហើយបើយកទៅអនុវត្តទៀត នឹងនាំមហន្តរាយ។ នេះជាការលើកឡើងរបស់ប្រធានាធិបតីចិនផ្សាយដោយទីភ្នាក់ងារព័ត៌មាន Xinhua ។ លោក ស៊ី មិនបាននិយាយចំឈ្មោះប្រទេសណាឡើយ តែពីរសប្ដាហ៍មុននេះ មន្ត្រីអាមេរិករងការរិះគន់ជុំវិញការលើកឡើងថា ការប្រកួតប្រជែងរវាងអាមេរិក និងចិន ជាការប្រកួតរវាងអរិយធម៌ពីរខុសស្រឡះ។
លោក Kiron Skinner នាយកផ្នែករៀបចំគោលនយោបាយនៃក្រសួងការបរទេសអាមេរិក ថែមទាំងមានគំនិតបែបប្រកាន់ពូជសាសន៍ទៅទៀត នៅពេលលោកនិយាយក្នុងវេទិកាសន្តិសុខមួយថា ស្ថានការណ៍បច្ចុប្បន្ន ជាលើកដំបូងដែលគូប្រជែងដ៏ធំរបស់អាមេរិកមិនមែនមកពីតំបន់កូកាស់។ ដ្បិតមិនចុចចំឈ្មោះអាមេរិក ប្រមុខរដ្ឋចិនអះអាងថា សព្វថ្ងៃគ្មានការប្រជែងអរិយធម៌អ្វីឡើយ ហើយរឿងសំខាន់ គឺការគោរពគ្នាទៅមក។
ក្នុងវេទិកាដដែល លោក ស៊ី ក៏ឆ្លៀតនិយាយលើកសរសើរអរិយធម៌ចិនដែលលោកជឿថា បានចូលរួមក្នុងការជំរុញការអភិវឌ្ឍអរិយធម៌មនុស្សជាតិ។ លោកបានលើកឡើងពីរបកគំហើញសំខាន់ៗរបស់ចិនមានការបង្កើតរំសេវ ត្រីវិស័យ ប្រក្រតីទិន ការបង្កើតក្រដាស និងទស្សនវិជ្ជា ដែលបានជះឥទ្ធិពលលើពិភពលោក ហើយតួនាទីយ៉ាងធំធេងក្នុងដំណើរការអភិវឌ្ឍអរិយធម៌នានា។ លោកប្ដេជ្ញាថា ចិននឹងបន្តបើកចំហអរិយធម៌របស់ខ្លួន និងរួមចំណែកក្នុងការអភិវឌ្ឍរបស់ពិភពលោកទៀត៕
Tag:
ចិន
អាមេរិក
ស៊ី ជិនភីង
© រក្សាសិទ្ធិដោយ thmeythmey.com