បោះឆ្នោតប្រធានាធិបតីឥណ្ឌូណេស៊ី៖ លោក វីដូដូ ឈ្នះឆ្នោតដើម្បីដឹកនាំប្រទេស៥ឆ្នាំទៀត

អន្តរជាតិ

បោះឆ្នោតប្រធានាធិបតីឥណ្ឌូណេស៊ី៖ លោក វីដូដូ ឈ្នះឆ្នោតដើម្បីដឹកនាំប្រទេស៥ឆ្នាំទៀត

21, May 2019 , 9:09 am

រូបភាព

លោក ចូកូ វីដូដូ (ឆ្វេង) បន្តដឹកនាំឥណ្ឌូណេស៊ី៥ឆ្នាំទៀត និងលោក Maruf Amin (ស្ដាំ) អនុប្រធានាធិបតីថ្មី។ រូបភាព AFP

ដោយ: តន ចាន់រិទ្ធារ៉ា

ទីបំផុត លោក ចូកូ វីដូដូ នៅតែអាចផ្ដួលគូប្រជែង ប្រាបូវ៉ូ សូប៊ីយ៉ាន់តូ ដដែល ហើយបន្តដឹកនាំឥណ្ឌូណេស៊ីរយៈពេលប្រាំឆ្នាំទៀត។ ក្នុងលទ្ធផលផ្លូវការដែលប្រកាសគណៈកម្មការរៀបចំការបោះឆ្នោតនៅថ្ងៃទី២១ ខែឧសភា សំឡេងឆ្នោតលោក វីដូដូ នាំមុខសំឡេងឆ្នោតលោក សូប៊ីយ៉ាន់តូ ក្នុងគម្លាតដល់ទៅ១១ភាគរយឯណោះ។ យ៉ាងណាមិញ លោក សូប៊ីយ៉ាន់ បានបដិសេធបរាជ័យនេះ និងត្រៀមតវ៉ាលទ្ធផលផង ព្រោះលោកក៏អះអាងពីជ័យជម្នះរបស់ខ្លួនដែរ។

លទ្ធផលផ្លូវការនៃការបោះឆ្នោតជ្រើសរើសប្រធានាធិបតីឥណ្ឌូណេស៊ី ត្រូវបានប្រកាសមុនកាលបរិច្ឆេទកំណត់មួយថ្ងៃ ប៉ុន្តែលទ្ធផលមិនប្រែប្រួលឡើយ។ គណៈកម្មការរៀបចំការបោះឆ្នោតឥណ្ឌូណេស៊ីប្រកាសថា លោក ចូកូ វីដូដូ ទទួលបានការគាំទ្រចំនួន៥៥,៥ភាគរយ ផ្ដួលគូប្រជែងស្រួចស្រាល់លោក ប្រាបូវ៉ូ សូប៊ីយ៉ាន់តូ ដែលទទួលបានការគាំទ្រចំនួន៤៤,៥ភាគរយប៉ុណ្ណោះ។ លោក វីដូដូ នឹងបន្តដឹកនាំឥណ្ឌូណេស៊ីរយៈពេលប្រាំឆ្នាំទៀត។

គណៈកម្មការរៀបចំការបោះឆ្នោតឥណ្ឌូណេស៊ី មិនបានបញ្ជាក់ហេតុផលពីការប្រកាសលទ្ធផលមុនថ្ងៃកំណត់ឡើយ ប៉ុន្តែការបញ្ចៀសបាតុកម្ម និងអំពើហិង្សាអាចជាមូលហេតុសំខាន់។ បព្វជិតសាសនា Ma'ruf Amin ដែលជាបេក្ខជនអនុប្រធានាធិបតីរបស់លោក វីដូដូ នោះ ក៏ជាប់ឆ្នោតដែរ។ ក្នុងការប្រកាសដែលផ្សាយផ្ទាល់តាមកញ្ចក់នៅថ្ងៃទី២១ ខែឧសភា ប្រធានគណៈកម្មការរៀបចំការបោះឆ្នោត Arief Budiman បញ្ជាក់ថា លទ្ធផលនេះ មានប្រសិទ្ធភ្លាមៗ។

តាមលទ្ធផលដដែល លោក វីដូដូ បានការគាំទ្រជាង៨៥លានសំឡេងពីអ្នកបោះឆ្នោតសរុប១៥៤លាននាក់ក្នុងប្រទេសដែលត្រូវបានចាត់ទុកជាប្រទេសប្រជាធិបតេយ្យធំទីបីរបស់ពិភពលោក។ គណៈកម្មការរៀបចំការបោះឆ្នោត បានទាត់ចោលការចោទប្រកាន់ទាំងឡាយពាក់ព័ន្ធការបន្លំសំឡេងឆ្នោតជាប្រព័ន្ធព្រោះគ្មាភស្តុតាងច្បាស់លាស់ ខណៈអ្នកតាមដានការបោះឆ្នោតជាច្រើនយល់ឃើញថា ការបោះឆ្នោតថ្ងៃទី១៧ ខែមេសា ធ្វើឡើងដោយសេរី និងយុត្តិធម៌។

យ៉ាងណាមិញ សមាជិកក្រុមយុទ្ធនាការរបស់លោក សូប៊ីយ៉ាន់តូ និងបក្សប្រឆាំង មិនបានចុះហត្ថលេខាលើលទ្ធផលផ្លូវការនេះឡើយ។ លោក Azis Subekti តំណាងក្រុមយុទ្ធនាការរបស់លោក សូប៊ីយ៉ាន់តូ និយាយថា ក្រុមរបស់លោកនឹងបោះបង់ការប្រឹងប្រែង ប្រឈមមុខការទង្វើអយុត្តិធម៌ កុហកបបោកប្រាស់ ហើយដែលប្រឆាំងប្រជាធិបតេយ្យបែបនេះឡើយ។ ប៉ុន្តែគេមិនទាន់ច្បាស់ថា លោក សូប៊ីយ៉ាន់តូ នឹងប្ដឹងតវ៉ាឬយ៉ាងណាឡើយ។

អតីតឧត្តមសេនីយ៍ក្រោមបង្គាប់លោក ស៊ូហារតូ រូបនេះ ធ្លាប់ប្រកាសហើយថា លោក នឹងតវ៉ា បើលោក វីដូដូ ដែលត្រូវបានស្គាល់ជាទូទៅថា ចូកូវី ឈ្នះឆ្នោតជាថ្មីនោះ។ លោក សូប៊ីយ៉ាន់តូ ធ្លាប់រងបរាជ័យក្រោមស្នាដៃលោក វីដូដូ ម្ដងហើយកាលពីឆ្នាំ២០១៤ ដែលកាលនោះលោកបានដាក់ពាក្យប្ដឹងដែរ តែចុងក្រោយក៏បរាជ័យទៀត។ បរាជ័យជាថ្មីនេះ អាចនាំឲ្យឥណ្ឌូណេស៊ីធ្លាក់ក្នុងបញ្ហា ព្រោះអ្នកគាំទ្រលោក សូប៊ីយ៉ាន់តូ មានផែនការធ្វើបាតុកម្មទៅហើយ៕