អន្តរជាតិ
ឥណ្ឌាបញ្ចេញយានអវកាស «ចន្ទ្រយានទី២»សម្រាប់បេសកកម្មទៅកាន់ភពព្រះចន្ទ
×
ដោយ៖ យ៉ន សុខន
ភ្នាក់ងារអវកាសរបស់ឥណ្ឌាបានបង្ហាញយានអវកាសរបស់ខ្លួនដែលគ្រោងនឹងដាក់ឱ្យដំណើរការនៅខែក្រោយនេះ នៅក្នុងក្តីរំពឹងថា វានឹងចុះចតនៅលើភពព្រះចន្ទនៅដើមខែកញ្ញាផងដែរ។
បើទទួលបានជោគជ័យ ឥណ្ឌានឹងក្លាយជាប្រទេសទីបួននៅលើពិភពលោកដែលមានយានអវកាសចុះចត នៅលើផ្ទៃព្រះចន្ទ បន្ទាប់ពីសហរដ្ឋអាមេរិក អតីតសហភាពសូវៀត និងចិន។
បើតាមសារព័ត៌មាន BBC «ចន្ទ្រយានទី២» នឹងក្លាយជាយានបេសកកម្មទីពីររបស់ឥណ្ឌា ខណៈដែលយានបេសកកម្មទីមួយមានឈ្មោះថា ចន្ទ្រយានទី១ បានដាក់ឱ្យដំណើរការតាំងពីឆ្នាំ២០០៨ម្ល៉៉េះ។
សូមទាញការចាប់អារម្មណ៍បន្តិចថា យានអវកាសទីមួយរបស់ឥណ្ឌាគឺជាផ្កាយរណបសម្រាប់ហោះក្រវែល ហើយមិនដែលបានធ្វើការចុះចតនៅលើផ្ទៃព្រះចន្ទម្តងណាឡើយ។
ចំណែកឯយានអវកាសទីពីរនេះវិញ មានផ្ទុកទាំងយានសម្រាប់រុករកនៅលើផ្ទៃព្រះចន្ទ ផ្កាយរណបសម្រាប់ហោះក្រវែល និងយានចំណតសម្រាប់ចុះចតនៅលើភពព្រះចន្ទ។ បេសកកម្មលើកទីពីរនេះនឹងផ្តោតជាចម្បងលើផ្ទៃព្រះចន្ទដើម្បីវិភាគទិន្នន័យដែលទទួលបានទាក់ទងនឹងរ៉ែ សិលា និងប្រភពទឹក។
ប្រសិនបើទទួលបានជោគជ័យដូចការគ្រោងទុក យានចំណត និងយានរុករក នឹងចុះចតហើយធ្វើប្រតិបត្តិការនៅលើប៉ូលខាងត្បូងរបស់ព្រះចន្ទនៅខែកញ្ញា។ បន្ថែមពីនេះ វានឹងក្លាយជាយានអវកាសទីមួយដែលបានចុះចតដំបូងនៅតំបន់ប៉ូលខាងត្បូងនោះ។ យានរុករក ត្រូវបានគេសង្ឃឹមថានឹងដំណើរការរយៈពេល១៤ថ្ងៃនៅលើផ្ទៃព្រះចន្ទ។
ប្រធានអង្គការស្រាវជ្រាវអវកាសឥណ្ឌា លោកស៊ីវ៉ាន បានថ្លែងប្រាប់កាសែត Times of India ថា យានរុករកនឹងវិភាគពីផ្ទៃនៃព្រះចន្ទហើយផ្ញើទិន្នន័យក៏ដូចជារូបភាពត្រឡប់មកភពផែនដីវិញ៕
© រក្សាសិទ្ធិដោយ thmeythmey.com