អន្តរជាតិ
ស្កុតឡែនដាំដើមឈើ ២២លានដើមកាលពីឆ្នាំមុនដើម្បីទប់ទល់ការប្រែប្រួលអាកាសធាតុ រូបភាព៖ Unilad
×
ដោយ៖ យ៉ន សុខន
រដ្ឋបាលព្រៃឈើរបស់ស្កុតឡែនបានបង្ហាញថា ខ្លួនបានសម្រេចជោគជ័យលើសពីផែនការកំណត់ទុកក្នុងការដាំដើមឈើនៅឆ្នាំ២០១៨ ហើយយុទ្ធនាការនេះបានចូលរួមចំណែកយ៉ាងសំខាន់ក្នុងការទប់ទល់នឹងការប្រែប្រួលអាកាសធាតុសកល។
សារព័ត៌មាន The Scotsman បានផ្សាយថា ដើមឈើជាង២២លានរាប់លានដើមត្រូវបានដាំនៅលើផ្ទៃដី១១,២០០ ហិចតា កាលពីឆ្នាំ២០១៨កន្លងទៅ ដែលតួលេខនេះលើសពីផែនការរបស់រដ្ឋាភិបាលដែលកំណត់ត្រឹមតែ១០,០០០ ហិកតាប៉ុណ្ណោះ ។
តាមរយៈសុន្ទរកថាមួយ លោក Fergus Ewing ដែលជារដ្ឋមន្ត្រីសេដ្ឋកិច្ចជនបទរបស់ស្កុតឡែន បានចាត់ទុកព័ត៌មាននេះជាដំណឹងដ៏ល្អប្រពៃ។ លោកបានបន្តថា សមិទ្ធផលនេះគឺជាទឡ្ហីករណ៍ដ៏រឹងមាំដែលសបញ្ជាក់ពីការខិតខំប្រឹងប្រែងរបស់រដ្ឋាភិបាលក្នុងការផ្តល់អាទិភាពដល់វិស័យព្រៃឈើ និងការវិនិយោគ។
នៅក្នុងសុន្ទរកថាដដែល មន្ត្រីជាន់ខ្ពស់រូបនេះបាននិយាយអំពីស្ថានភាពស្ថិតនៅក្នុងហានិភ័យនៃបរិស្ថាននៅតាមបណ្តាប្រទេសផ្សេងៗទៀតនៅលើសកលលោក។
ក្នុងនោះលោកបានលើកឡើងថាគ្រាន់តែព្រៃឈើនៅស្កុតឡែនមួយ មានសមត្ថភាពក្នុងការស្រូបយកបរិមាណឧស្ម័នកាបូនឌីអុកស៊ីតដែលបញ្ចេញចោលទៅក្នុងបរិយាកាសប្រមាណ៩,៥លានតោនជារៀងរាល់ឆ្នាំ ។ នេះគឺជាឧទាហរណ៍ជាក់ស្តែងមួយ ដែលជំរុញឱ្យមនុស្សជាតិបង្កើនការដាំដើមឈើឡើងវិញ ក្នុងគោលបំណងទប់ស្កាត់ការប្រែប្រួលអាកាសធាតុសកល។
គួរបញ្ជាក់ផងដែរថា រដ្ឋាភិបាលស្កុតឡែនមានគម្រោងពង្រីកទំហំនៃការដាំដើមឈើឡើងវិញ ដោយបង្កើនផ្ទៃដីកំណត់រហូតដល់ទៅ១៥,000ហិកតាក្នុងមួយឆ្នាំ នៅក្នុងផែនការជាតិក្រោយឆ្នាំ២០២៤ ក្នុងគោលបំណងលើកស្ទួយការការពារបរិស្ថាន៕
ប្រភព thehill.com
© រក្សាសិទ្ធិដោយ thmeythmey.com