អន្តរជាតិ
ស៊ូដង់ នឹងប្រគល់អតីតមេដឹកនាំផ្ដាច់ការ អាល់-បាសៀ ឲ្យតុលាការព្រហ្មទណ្ឌអន្តរជាតិ អតីតប្រធានាធិបតីស៊ូដង់ អូម៉ា អាល់-បាសៀ ដែលតុលាការព្រហ្មទណ្ឌកម្មជាតិ ស្វែងរកចាប់ខ្លួន។ រូបភាព AFP
× រដ្ឋអាហ្វ្រិកស៊ូដង់ បានយល់ព្រមប្រគល់ខ្លួនអតីតប្រធានាធិបតីរបស់ខ្លួន អូម៉ា អាល់-បាសៀ (Omar al-Bashir) ទៅឲ្យតុលាការព្រហ្មទណ្ឌអន្តរជាតិ ដែលចង់បានរូបលោកជាច្រើនឆ្នាំមកហើយដើម្បីកាត់ទោសបទល្មើសឧក្រិដ្ឋកម្មសង្គ្រាមនៅតំបន់ដាហ្វួ (Dafur) ។ នេះបើតាមការបញ្ជាក់របស់មន្ត្រីជាន់ខ្ពស់ស៊ូដង់នៅថ្ងៃទី១១ ខែកុម្ភៈ។ ក្រៅពីលោក អាល់-បាសៀ អតីតមន្ត្រីដែលស្ថិតក្រោមដីកាចាប់ខ្លួនរបស់តុលាការអន្តរជាតិ ក៏នឹងត្រូវបញ្ជូនទៅប្រឈមមុខច្បាប់ដែរ។
«អ្នកដែលត្រូវបានចោទប្រកាន់ដោយ ICC ពួកគេត្រូវតែទៅទីនោះ។» នេះជាការលើកឡើងរបស់លោក Mohamed Hassan Al-Taishay សមាជិកក្រុមប្រឹក្សាអធិបតេយ្យដែលកំពុងដឹកនាំស៊ូដង់ក្រោយការផ្ដួលរំលំរបបដឹកនាំលោក អូម៉ា អាល់-បាសៀ ដោយសំដៅដីកាចាប់ខ្លួនរបស់តុលាការព្រហ្មទណ្ឌអន្តរជាតិ (ICC) លើបុគ្គលដែលពាក់ព័ន្ធវិនាសកម្ម និងអំពើហិង្សាដែលបង្កជាវិបត្តិមនុស្សជាតិធ្ងន់ធ្ងរនៅរដ្ឋដាហ្វួអំឡុងឆ្នាំ២០០៣ ។
ក្រោយមក លោក Mohamed ប្រាប់អ្នកសារព័ត៌មានដោយចំហរថា ស៊ូដង់នឹងបញ្ជូនលោក អាល់-បាសៀ ដែលស្ថិតក្រោមការឃុំខ្លួនក្រោយអស់តំណែងក្នុងរដ្ឋប្រហារឆ្នាំ២០១៩ រួមទាំងមនុស្សជំនិតបីនាក់របស់លោកទៀត ទៅកាន់តុលាការអន្តរជាតិដើម្បីកាត់ទោស។ បើតាមទីភ្នាក់ងារព័ត៌មាន AFP លោកបញ្ជាក់បែបនេះក្រោយជំនួបជាមួយប្រតិភូក្រុមឧទ្ទាមមកពីរដ្ឋដាហ្វួនៅរដ្ឋធានីហ្សូបារបស់ស៊ូដង់ខាងត្បូងនៅថ្ងៃទី១១ ខែកុម្ភៈ។
លោក អាល់-បាសៀ និងមន្ត្រីថ្នាក់បីនាក់ទៀត ត្រូវបានតុលាការព្រហ្មទណ្ឌអន្តរជាតិចោទប្រកាន់ពីបទឧក្រិដ្ឋកម្មសង្គ្រាម អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិដែលកើតឡើងនៅដាហ្វួចាប់តាំងពីឆ្នាំ២០០៣មក។ ដ្បិតតុលាការគ្មានកម្លាំងអនុវត្តដីកាចាប់ខ្លួន លោក អាល់-បាសៀ មានសេរីភាពដើរហើរនៅជុំវិញពិភពលោកអស់ពេលជាច្រើនឆ្នាំ។ លោកថែមទាំងហ៊ានធ្វើដំណើរទៅកាន់អាហ្វ្រិកខាងត្បូងដែលជាសមាជិកតុលាការអន្តរជាតិទៀត។
ប៉ុន្តែក្បាលម៉ាស៊ីនដឹកនាំថ្មីនៅស៊ូដង់ដែលគ្រប់គ្រងរួមគ្នាដោយយោធា និងស៊ីវិល បានបញ្ជាក់ជំហរអនុវត្តតាមការសម្រេចរបស់ ICC ។ លោក Mohamed និយាយថា រដ្ឋាភិបាលសព្វថ្ងៃ និងក្រុមឧទ្ទាមនៅដាហ្វួរ ឯកភាពគ្នាអនុវត្តតាម ICC ហើយនឹងប្រគល់ឧក្រិដ្ឋជនបួននាក់ឲ្យ ICC កាត់ក្ដី។ យ៉ាងណាមិញ មន្ត្រីរូបនេះមិនបានបញ្ជាក់ទេថា អ្នកទាំងបួន នឹងត្រូវប្រគល់ឲ្យតុលាការអន្តរជាតិនៅពេលណាជាក់លាក់ឡើយ។
សូមបញ្ជាក់ថា ជម្លោះនៅដាហ្វួដែលមានទំហំប៉ុនប្រទេសបារាំង បានផ្ទុះឡើងក្រោយក្រុមប្រជាជនភាគតិចអាហ្វ្រិកងើបបះបោរប្រឆាំងរដ្ឋាភិបាលអារ៉ាប់របស់លោក អាល់-បាសៀ ដោយចោទថា រដ្ឋាភិបាលមិនខ្វលខ្វាយពីពួកគេ។ ICC ក៏ចោទលោក និងមន្ត្រីបីនាក់ទៀតចំពោះតួនាទីរបស់ពួកគេក្នុងអំពើហិង្សានៅទីនោះ។ លោក អាល់-បាសៀ បានទាត់ចោលការចោទប្រកាន់ទាំងអស់៕
Tag:
ស៊ូដង់
អូម៉ា អាល់-បាសៀ
ICC
© រក្សាសិទ្ធិដោយ thmeythmey.com