អន្តរជាតិ
មិនទាន់មានករណីកូរ៉ូណាវីរុសឡើយ, ឥណ្ឌូណេស៊ីអះអាងថា ខ្លួនមិនបានលាក់បាំងអ្វីទេ មន្រ្តីសុខាភិបាលឥណ្ឌូណេស៊ី មើលអេក្រង់ម៉ាស៊ីនស្ទង់កម្ដៅដើម្បីត្រួតពិនិត្យសីតុណ្ហភាពអ្នកដំណើរនៅព្រលានយន្តហោះទីក្រុងហ្សាការតា។ រូបភាព AFP
× មកទល់ពេលនេះ ឥណ្ឌូណេស៊ី មិនទាន់មានករណីឆ្លងកូរ៉ូណាវីរុស (COVID-19) នៅឡើយទេ។ ការណ៍នេះ ធ្វើឲ្យមានងឿងឆ្ងល់យ៉ាងខ្លាំង និងសង្ស័យថា អាចមានករណីឆ្លងខ្លះដែលអាជ្ញាធរមិនដឹង ខណៈប្រទេសក្បែរខាងឥណ្ឌូណេស៊ីដូចជាម៉ាឡេស៊ី និងសិង្ហបុរី កំពុងមានករណីនេះ។ នៅថ្ងៃទី១១ ខែកុម្ភៈ រដ្ឋមន្ត្រីសុខាភិបាលឥណ្ឌូណេស៊ី បានចេញមុខបកស្រាយថា ឥណ្ឌូណេស៊ីគ្មានអ្វីត្រូវលាក់បាំងឡើយបើពិតជាមានករណីកូរ៉ូណាវីរុសនេះមែននោះ។
ស្របពេលដែលកូរ៉ូណាវីរុសរាលដាលនៅចិន និងប្រទេសជាច្រើននៅតំបន់អាស៊ាន ឥណ្ឌូណេស៊ីឯណោះ បែរជាមិនទាន់មានករណីឆ្លងសូម្បីតែមួយករណី។ កម្ពុជា វៀតណាម ថៃ ម៉ាឡេស៊ី ហ្វីលីពីន សិង្ហបុរី សុទ្ធតែបានបញ្ជាក់ការឆ្លងកូរ៉ូណាវីរុសនេះ។ ថៃ និងសិង្ហបុរី ជាប្រទេសដែលមានចំនួនករណីឆ្លងច្រើនជាងគេ។
ដោយសារមិនទាន់រកឃើញករណីឆ្លងបែបនេះ អ្នកវិទ្យាសាស្ត្រមួយក្រុមនៅសហរដ្ឋអាមេរិក ក៏បានដាក់សង្ស័យលើសមត្ថភាពទប់ស្កាត់របស់ឥណ្ឌូណេស៊ីដែលកន្លងមកមានជើងហោះហើរត្រង់ពីទីក្រុងវូហាន ខេត្តហ៊ូប៉ី ជាទីដែលកូរ៉ូណាវីរុសផ្ទុះដំបូង។ ជាមួយនឹងការស្នើឲ្យឥណ្ឌូណេស៊ីរឹតបន្តឹងវិធានការក្នុងស្រុក អ្នកស្រាវជ្រាវទាំងនោះ សង្ស័យថា មិនទាន់មានករណីកូរ៉ូណាវីរុសនេះ ទំនងជាបណ្ដាលមកការចាប់មិនបានករណីឆ្លង។
«យើងមានសម្ភារដើម្បីត្រួតពិនិត្យកូរ៉ូណា ហើយវាគឺមានលិខិបញ្ជាក់ត្រឹមត្រូវ។ ឥណ្ឌូណេស៊ីគ្មានអ្វីត្រូវលាក់បាំងឡើយ។» រដ្ឋមន្ត្រីសុខាភិបាលឥណ្ឌូណេស៊ី Terawan Agus Putranto ក្រោយកិច្ចប្រជុំគណៈរដ្ឋមន្ត្រី ដើម្បីឆ្លើយតបនឹងការសង្ស័យរបស់អ្នកស្រាវជ្រាវអាមេរិក។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
កន្លងមក ឥណ្ឌូណេស៊ី ក៏រកឃើញករណីសង្ស័យឆ្លងកូរ៉ូណាវីរុសនេះដែរ ប៉ុន្តែការធ្វើតេស្តឈាមទទួលបានលទ្ធផលអវិជ្ជមាន។ មន្ត្រីក្រសួងសុខាភិបាលឥណ្ឌូណេស៊ី Vivi Setiawaty ប្រាប់អ្នកសារព័ត៌មានថា វាមិនច្បាស់ហើយហេតុអ្វីឥណ្ឌូណេស៊ីគ្មានករណីឆ្លងកូរ៉ូណាវីរុសនេះ ប៉ុន្តែអាជ្ញាធរបានត្រៀមជាស្រេចហើយដើម្បីទប់ទល់ករណីឆ្លង ដោយរៀនសូត្រតាមវិធានការដែលប្រើក្នុងការទប់ទល់ផ្ដាសាយបក្សី H5N1 ក្នុងឆ្នាំ២០១៥ ។
ដើម្បីទប់ស្កាត់ការរាលដាល ឥណ្ឌូណេស៊ី ប្រកាសមិនទទួលអ្នកដំណើរទាំងឡាយណាដែលមានប្រវត្តិធ្វើដំណើរទៅចិនក្នុងរយៈពេល១៤ថ្ងៃ ហើយបានបិទការហោះហើរទៅមកចិនផងដែរ។ ជាមួយគ្នានោះ ឥណ្ឌូណេស៊ី ក៏ត្រៀមមន្ទីរពេទ្យចំនួន១០០នៅទូទាំងប្រទេសដើម្បីព្យាបាលអ្នកជំងឺណាម្នាក់។ ដោយឡែក ពលរដ្ឋឥណ្ឌូណេស៊ីប្រមាណ២៤០នាក់ដែលជម្លៀសពីវូហាន ក៏ត្រូវដាក់នៅលើកោះ Natuna ដើម្បីតាមដានសុខភាពផងដែរ៕
Tag:
ឥណ្ឌូណេស៊ី
កូរ៉ូណាវីរុស
© រក្សាសិទ្ធិដោយ thmeythmey.com