COVID-19
អន្តរជាតិ
COVID-19៖ ពីរករណីដំបូងនៅអូទ្រីស និង១ករណីដំបូងនៅក្រូអាត លោកនាយករដ្ឋមន្ត្រី Andrej Plenkovic បានធ្វើសន្និសីទសារព័ត៌មាន
× អូទ្រីស និងក្រូអាត ក្លាយជាប្រទេសទី៣៥ និង៣៦ ដែលរកឃើញករណីឆ្លងជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19)។
តាមការផ្សាយរបស់ទីភ្នាក់ងារព័ត៌មាន APA អូទ្រីស រកឃើញករណី២ដំបូងនៅខេត្ត Tyrol។ នៅក្រូអាតឯណោះវិញ លោកនាយករដ្ឋមន្ត្រី Andrej Plenkovic បានធ្វើសន្និសីទសារព័ត៌មានដោយផ្ទាល់ ដោយអះអាងពីការរកឃើញករណីឆ្លងរបស់យុវជនម្នាក់ដែលធ្លាប់នៅក្រុង Milan របស់អ៊ីតាលី ដោយបច្ចុប្បន្នសម្រាកព្យាបាលនៅមន្ទីរពេទ្យក្នុងក្រុង Zagreb។
កន្លងមក ប្រទេសទាំង៣៤ដែលមានករណីឆ្លង COVID-19 រួមមាន ចិន (បញ្ចូលទាំងតំបន់រដ្ឋបាលពិសេសហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (+ករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អ៊ីស្រាអែល អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា និងស្រីលង្កា។
បណ្តាប្រទេសនៅអឺរ៉ុប មាន អ៊ីតាលី បារាំង អង់គ្លេស អាល្លឺម៉ង់ ស៊ុយអែត រុស្ស៊ី អេស្ប៉ាញ ហ្វាំងឡង់ និងបែលហ្ស៊ិក។ ក្រៅពីនោះ មាននៅ សហរដ្ឋអាមេរិក កាណាដា អូស្ត្រាលី និងអេហ្ស៊ីប៕
© រក្សាសិទ្ធិដោយ thmeythmey.com