ជួយគ្នាក្នុងគ្រាកូវីដ-១៩! វប្បធម៌ចែករំលែកដល់អ្នកខ្វះខាតកាន់តែផុសផុលក្នុងសង្គមខ្មែរ

COVID-19

ជាតិ

សង្គមជាតិ

ជួយគ្នាក្នុងគ្រាកូវីដ-១៩! វប្បធម៌ចែករំលែកដល់អ្នកខ្វះខាតកាន់តែផុសផុលក្នុងសង្គមខ្មែរ

31, Mar 2020 , 9:39 pm

រូបភាព

ដោយ:

ភ្នំពេញ៖ ក្នុងគ្រាលំបាក អ្នកខ្លះឆ្លៀតទាញចំណេញ តាមរយៈការតម្លើងថ្លៃទំនិញ ប៉ុន្តែអ្នកខ្លះទៀតបង្ហាញកាយវិការដ៏គួរឲ្យគោរពតាមរយៈវប្បធម៌ចែករំលែក។ ការរាតត្បាតជំងឺ COVID-19 នៅលើពិភពលោក រួមទាំងកម្ពុជាផ្ទាល់ នាពេលបច្ចុប្បន្ននេះ ក៏លេចចេញនូវទង្វើទាំងនេះ ដំណាលគ្នាផងដែរ ប៉ុន្តែសារព័ត៌មានថ្មីៗ សូមបង្ហាញពីសកម្មភាពសប្បុរសដ៏ផុសផុលរបស់ប្រជាពលរដ្ឋ ក្រោមស្មារតីអ្នកធូរធា ជួយដល់អ្នកខ្វះខាត។

«ខ្ញុំសួរខ្លួនឯងថា ខ្ញុំលំបាកប៉ុណ្ណឹងហើយ ចុះពួកគាត់លំបាកប៉ុនណាទៅ? ពួកគាត់អត់មានស្មាតហ្វូន និងទូរសព្ទ សម្រាប់ទទួលបានព័ត៌មាន។ ពួកគាត់ពិតជាពិបាកខ្លាំងណាស់»។ នេះជាការរៀបរាប់របស់លោក អ៊ីវ សំណាង ដែលបានផ្តួចផ្តើមបង្កើតកម្មវិធីមូលនិធិ និងរៃអង្គាសសម្រាប់អ្នកធាក់ស៊ីក្លូ និងជនក្រីក្រ។

ថ្លែងប្រាប់សារព័ត៌មានថ្មីៗ តាមទូរសព្ទ លោក សំណាង បានអះអាងថា រូបលោក និងក្រុមការងារស្ម័គ្រចិត្តប្រមាណ១០នាក់ បន្តប្រមូលថវិកាពីសប្បុរសជន ដើម្បីជួយទៅដល់ក្រសួងសុខាភិបាលប្រឆាំងជំងឺកូវីដ-១៩ផង និងពលរដ្ឋដែលគ្មានទីកន្លែងសម្រាប់ពឹងពាក់អាស្រ័យច្បាស់លាស់ ជាពិសេសជាអ្នកដែលប្រើកម្លាំងពលកម្មសម្រាប់ដូរយកបាយក្នុងមួយថ្ងៃរស់មួយថ្ងៃ។

លោក អ៊ីវ សំណាង និងសមាជិកដទៃទៀតកំពុងតែដើរចុះចែកស្បៀងអាហារដល់អ្នកដែលខ្វះខាត

បន្ថែមពីលើនេះ លោក សំណាង និងក្រុមស្ម័គ្រចិត្តដទៃទៀត ចុះទៅផ្សព្វផ្សាយដល់អ្នកធាក់ស៊ីក្លូ និងជនក្រីក្រ អំពីការថែទាំសុខភាព និងស្វែងយល់ពីអាការរបស់ខ្លួន។ លោកបញ្ជាក់ថា៖ «យើងវាស់កម្តៅជូនពួកគាត់ដល់កន្លែង និងណែនាំពួកគាត់ពីរបៀបអនាម័យ និងប្រាប់គាត់ពីជំងឺកូវីដ-១៩ ដែលអាចនឹងបង្ការ និងការពារ ដើម្បីកុំឲ្យឆ្លងកូវីដ-១៩»។

សកម្មភាពផ្តល់ម៉ាស់ ទឹកអាល់កុល គ្រឿងឧបភោគ បរិភោគ ទឹក មីកញ្ចប់ ត្រីខ ក៏ដូចជាអង្ករ ជាដើមនោះ ក៏កាន់តែមានការផុសផុលផងដែរ ជាពិសេសពីសំណាក់ពលរដ្ឋដែលមានជីវភាពធូរធា ដោយពួកគាត់រៀបចំដាក់ថង់រួចជាស្រេច ហើយជូនដល់ពលរដ្ឋក្រីក្រដែលដើរកាត់មុខផ្ទះរបស់ខ្លួន ឬតាមដងផ្លូវ។

លោក ប៊ូ សារឿន និងក្រុមគ្រួសារ ដែលរស់នៅក្នុងរាជធានីភ្នំពេញ ក៏បានផ្តល់អំណោយតាមសទ្ធារបស់ខ្លួនសម្រាប់ អ្នកធាក់ស៊ីក្លូ មនុស្ស និងជនក្រីក្រមួយចំនួនផងដែរ។ លោកបានពន្យល់ថា៖ «ដោយមើលឃើញពីភាពខ្វះខាត និងការងាយប្រឈម នឹងការឆ្លងកូវីដ១៩ ទើបធ្វើឲ្យខ្ញុំ និងក្រុមគ្រួសារ ធ្វើសកម្មភាពបែបនេះ ដែលជាការរួមចំណែកតិចតួចមួយ។ ហើយគំនិតនេះ មានការគាំទ្រពីក្រុមគ្រួសារ និងមិត្តភក្តិ»។

លោក ប៊ូ សារឿន និងក្រុមគ្រួសារ បានរៀបចំជាជេលលាងទឹកសម្រាប់ចែកជូនដល់ពលរដ្ឋដែលរស់នៅរាជធានីភ្នំពេញ

សម្រាប់លោក សុទ្ធ សុធារៈ ដែលធ្លាប់បានដើរចែកម៉ាស់ និងទឹកអាល់កុលជូនដល់ពលរដ្ឋដែលរស់នៅតាមដងផ្លូវជាច្រើនដងរួចមកហើយនោះ លោកក៏បន្តចែកស្បៀងអាហារ និងចែកជាខិត្តបណ្ណអំពីរបៀបការពារជំងឺកូវីដ-១៩ ដល់គ្រួសារប្រមាណ២០០គ្រួសារបន្ថែមទៀត ដែលរស់នៅតាមតំបន់បឹងជើងឯក ច្បារអំពៅ និងស្ទឹងមានជ័យ។ លោក សុធារៈ រៀបចំជាអំណោយនេះ ដោយយល់ឃើញថា ពលរដ្ឋក្រីក្រមិនអាចមានលទ្ធភាពគ្រប់គ្រាន់ក្នុងការទិញស្បៀងអាហារ ដោយសារតែតម្លៃទំនិញឡើងថ្លៃនាអំឡុងពេលកូវីដ-១៩ កំពុងរាតដ្បាត។

លោក សុទ្ធ សុធារៈ កំពុងតែចែកម្ហូបអាហារដល់លោកអ៊ំំ ជាអ្នកធាក់ស៊ីក្លូ

«យើងនឹកឃើញដល់អ្នកដែលរស់នៅតាមផ្លូវ អ៊ំៗជាអ្នកធាក់ស៊ីក្លូ ជនអាណាថា និងអ្នកបោសសំអាត។ ជាទូទៅគាត់អត់មានលទ្ធភាពទិញឲ្យរបស់ហ្នឹងយកមកប្រើប្រាស់។ ដោយឃើញថារបស់ប្រើប្រាស់ហ្នឹងវាឡើងថ្លៃពេក សូម្បីតែខ្លួនយើងហ្នឹងក៏អត់មានលទ្ធភាពទិញដែរ ចុះទម្រាំដល់អ្នកអត់ទៀត។ យើងមានសមាជិកដល់ទៅ៥០នាក់ អ៊ីចឹងយើងអាចរៃអង្កាសថវិកាបានជិត៣ពាន់ដុល្លារ ដើម្បីជួយទិញរបស់ប្រើប្រាស់ ម្ហូបអាហារបន្តិចបន្តួច និងបោះខិតប័ណ្ណដល់ពួកគាត់។ ខ្ញុំឃើញម្នាក់ ចែកម្នាក់»។

ក្រៅពីមានសកម្មភាពចុះចែកអំណោយដល់ជនក្រីក្រ ក៏មានកន្លែងមួយចំនួនដាក់ជាស្បៀងអាហារដាក់នៅមុខផ្ទះ និងមុខហាង សម្រាប់ឲ្យអ្នកខ្វះខាតមកយកដោយខ្លួនឯង។ ក្នុងនោះមានទីតាំងមួយកន្លែងនៅក្បែរស្តុបកាណាឌីយ៉ាល់ បានដាក់អង្ករចំនួន១តោន និងទឹកសុទ្ធចំនួន២០០ជូរ សម្រាប់ចែកជូនដល់អ្នកក្រីក្រ។

សកម្មភាពពលរដ្ឋដែលខ្វះខាតមកយកអង្ករ និងទឹកសុទ្ធ

«បច្ចុប្បន្នភាពជំងឺនេះបានប៉ះពាល់ដល់អាជីវកម្មមួយចំនួនត្រូវបានបិទ អ៊ីចឹងអ្នកដែលប៉ះពាល់ខ្លាំងបំផុតនោះ គឺជាអ្នកធ្វើការ ដោយប្រើកម្លាំងពលកម្ម។ អ៊ីចឹងហើយបានខ្ញុំចំណាយថវិកាមួយចំនួនសម្រាប់ចែកដល់ពួកគាត់ខ្លះ។ ខ្ញុំបានត្រៀមអង្ករ២០០ប៉ាវ(មួយប៉ាវមានអង្ករ៥គីឡូ) និងទឹកសុទ្ធចំនួន២០០ជួរ ដោយយើងចែកជូនគាត់ម្នាក់៥គីឡូ និងទឹកសុទ្ធ១ជួរ សម្រាប់៣០នាក់ ក្នុងមួយថ្ងៃ សម្រាប់ចែកដល់ កម្មករសំណង់ អ្នកដើរសុំទាន និងអ្នកប្រមូលសំរាម»។ នេះជាការលើកឡើងរបស់ម្ចាស់អំណោយដែលមិនបញ្ចេញឈ្មោះម្នាក់ដែលបានប្រាប់ដល់អ្នកសារព័ត៌មានថ្មីៗតាមទូរសព្ទ។

ការអំពាវនាវជួយដល់អ្នកឆ្លង COVID-19 ផ្ទាល់ក៏មានផងដែរ ដែលក្នុងនោះអ្នកស្រី អ៊ីសា រ៉ហានី អ្នកយកព័ត៌មានថ្មីៗ ប្រចាំនៅខេត្តសៀមរាប បានមើលឃើញពីទុក្ខលំបាករបស់ គ្រួសារបុរសជនជាតិខ្មែរអាយុ៤០ឆ្នាំ រួមទាំង ប្រពន្ធ និងកូនប្រុសដែលសុទ្ធតែឆ្លង៕