កីឡាករនិងគ្រូ Real នឹងកាត់ប្រាក់ខែពី១០ទៅ២០ភាគរយ ក្នុងគ្រាលំបាកដោយ COVID-19

COVID-19

កីឡាអន្តរជាតិ

អន្តរជាតិ

កីឡាករនិងគ្រូ Real នឹងកាត់ប្រាក់ខែពី១០ទៅ២០ភាគរយ ក្នុងគ្រាលំបាកដោយ COVID-19

09, Apr 2020 , 2:25 pm

រូបភាព

ដោយ: ទេព ពិទូរ្យ

កីឡាករ គ្រូបង្វឹក និងប្រធានផ្នែកគ្រប់គ្រងរបស់ក្រុម Real Madrid នឹងកាត់បន្ថយប្រាក់ឈ្នួលពី ១០ ទៅ ២០ ភាគរយនៅឆ្នាំនេះ ស្របពេលក្លិបកំពុងឈានទៅរកវិបត្តិដោយសារផលប៉ះពាល់នៃជំងឺរាតត្បាត COVID-19។

លីគកីឡាបាល់ទាត់គ្រប់កម្រិតនៅប្រទេសអេស្ប៉ាញបានផ្អាកបណ្តោះអាសន្នដោយគ្មានពេលកំណត់ឡើងចាប់តាំងពីខែមីនាមក ក្រោយប្រទេសនេះត្រូវបានបិទ ដ្បិតបារម្ភពីការរាលដាលនៃជំងឺឆ្លងសកលដែលបានសម្លាប់មនុស្សយ៉ាងច្រើននៅជុំវិញពិភពលោក។

គិតត្រឹមថ្ងៃទី៩ ខែមេសានេះ COVID-19 បានសម្លាប់ប្រជាជនអេស្ប៉ាញជិត១៥០០០នាក់ ក្នុងចំណោមអ្នកឆ្លងជិត១៥ម៉ឺននាក់។

ក្លិបរហស្សនាមស្តេចសមួយនេះ បានប្រាប់ពីការសម្រេចចិត្តក្នុងការកាត់បន្ថយប្រាក់ឈ្នួលរបស់កីឡាករ គ្រូបង្វឹក និងថ្នាក់ដឹកនាំថា គឺដើម្បីសម្រួលដល់ក្លិប និងបញ្ចៀសមិនឲ្យមានការតក់ស្លុតដែលប៉ះពាល់ដល់ប្រាក់ឈ្នួលបុគ្គលិក និងកម្មកររបស់ក្លិប។

សេចក្តីប្រកាសរបស់ Real Madrid បន្ថែមទៀតថា ការសម្រេចចិត្តនេះនឹងជួយកាត់បន្ថយការធ្លាក់ចុះប្រាក់ចំណូលក្លិបពីការផ្អាកការប្រកួតដែលនៅសេសសល់រដូវកាលនេះ និងការខាតបង់ថ្លៃផ្សាយពាណិជ្ជកម្មដែលជាប្រភពចំណូលដ៏ធំផងនោះ។

ការសម្រេចរបស់ក្រុមដែលដឹកនាំដោយអ្នកចាត់ការទូទៅលោក Zinedine Zidane នេះ ធ្វើឡើងក្រោយការប្រកាសរបស់ក្រុម Barcelona កាលពីខែមុន ដែលថាកីឡាកររបស់ពួកគេ នឹងកាត់បន្ថយប្រាក់ឈ្នួលចំនួន៧០ភាគរយដើម្បីសម្រួលដល់ក្លិបអំឡុងពេលវិបត្តិជំងឺរាតត្បាត COVID-19 និង ធានាថា បុគ្គលិកមិនធ្វើការនៅផ្នែកកីឡា នឹងបានទទួលប្រាក់ឈ្នួលពេញលេញតាមធម្មតា។

ក្រៅពីក្រុមបាល់ទាត់ ក្រុមកីឡាបាល់បោះ Real Madrid ក៏បានយល់ព្រមកាត់បន្ថយប្រាក់ឈ្នួលដោយស្ម័គ្រចិត្តដូចគ្នាផងដែរ៕