ជាតិ
CCJ៖ កង្វះខាតក្រមសីលធម៌ និងវិជ្ជាជីវៈអ្នកកាសែត ធ្វើឱ្យប៉ះពាល់តម្លៃ ខណៈបទចោទអាជ្ញាធរខ្លះ មិនទាន់ស្របច្បាប់ព័ត៌មាន
×![]()
ដោយ: ថ្មីៗ
ភ្នំពេញ៖ អ្នកសារព័ត៌មាន ភាគច្រើនកំពុងបំពេញការងារ និងតួនាទីតាមវិជ្ជាជីវៈបានយ៉ាងល្អ ខណៈដែលអ្នកសារព័ត៌មានមួយចំនួនតូច កំពុងធ្វើឱ្យប៉ះពាល់ដល់តម្លៃ ។ នោះក៏ព្រោះតែពួកគេនៅខ្វះខាតក្រមសីលធម៌ និងវិជ្ជាជីវៈ ។ រីឯអាជ្ញាធរខ្លះទៀត ក៏ចោទប្រកាន់អ្នកសារព័ត៌មាន មិនទាន់ស្របតាមច្បាប់ស្តីពីរបបសារព័ត៌មានដែរ។ នេះជាចំណុចវិជ្ជមាន និងអវិជ្ជមាន ក្នុងសេរីភាពសារព័ត៌មាន ដែលក្លិបអ្នកកាសែតកម្ពុជា (CCJ) បានមើលឃើញ។
ក្លិបអ្នកកាសែតកម្ពុជា ពិតជាមានមោទកភាព ដែលវិស័យសារព័ត៌មាននៅកម្ពុជា មានការរីកដុះដាលគួរឱ្យកត់សម្គាល់ទាំងសារព័ត៌មានបែបប្រពៃណី (កាសែត វិទ្យុ និងទូរទស្សន៍) និងសារព័ត៌មានបែបថ្មី(អនឡាញ) ដែលបានផ្ដល់ជម្រើសកាន់តែងាយស្រួល និងសម្បូរបែបដល់ប្រជាពលរដ្ឋ។ ទន្ទឹមនឹងភាពរីកដុះដាលនៃវិស័យសារព័ត៌មាននេះ ក្លិបអ្នកកាសែត ក៏បានសង្កេតឃើញទាំងផលវិជ្ជមាន និងអវិជ្ជមានរបស់អ្នកសារព័ត៌មាន រួមទាំងអាជ្ញាធរផងដែរ។
មុននឹងនិយាយពីភាពអវិជ្ជមាន ក្លិបអ្នកកាសែតបានសង្កេតឃើញថា អ្នកកាសែតទាំងអស់ បានបំពេញការងារយ៉ាងសកម្ម ដើម្បីបម្រើប្រជាពលរដ្ឋ និងសង្គមជាតិ ទោះបីជាកាលៈទេសៈដ៏លំបាកនៃការរាតត្បាតនៃជំងឺCOVID-19 ក៏ដោយ ក៏អ្នកសារព័ត៌មាន នៅតែពុះពារគ្រប់បែបយ៉ាង ដោយជម្នះគ្រប់ឧបសគ្គ ក្នុងបព្វហេតុរាយការណ៍ព័ត៌មានពិតជូនប្រជាពលរដ្ឋ។
ក្លិបអ្នកកាសែត បានចេញសេចក្តីថ្លែងការណ៍នៅថ្ងៃទី១ ឧសភា ក្នុងឱកាសទិវាសេរីភាពសារព័ត៌មានពិភពលោក ៣ ឧសភា ដូច្នេះថា៖«សារព័ត៌មានបានដើរតួនាទីយ៉ាងសំខាន់ ក្នុងការផ្ដល់ព័ត៌មានពិត ក៏ដូចជាជួយផ្សព្វផ្សាយសារអប់រំនានាស្តីពីCOVID-19 ជូនដល់ប្រជាពលរដ្ឋ»។
មិនតែប៉ុណ្ណោះប្រមុខរដ្ឋាភិបាល សម្ដេច ហ៊ុន សែន និងអ្នកនាំពាក្យរដ្ឋាភិបាល សុទ្ធតែបានផ្ដល់កិច្ចសហការ និងសម្របសម្រួលដល់អ្នកកាសែត ក្នុងការរៀបចំសន្និសីទកាសែត ដើម្បីឱ្យអ្នកកាសែតងាយស្រួលប្រមូលព័ត៌មានផ្សព្វផ្សាយពីជំងឺកូវីដ១៩ផងដែរ។នេះជាការមើលឃើញរបស់ក្លិបអ្នកកាសែតកម្ពុជា។
ក្លិបអ្នកកាសែតកម្ពុជា បានបញ្ជាក់ដូច្នេះថា៖«នេះជាសញ្ញាវិជ្ជមានដ៏គួរឱ្យលើកទឹកចិត្តដែលបានបើកលំហរសេរីភាពសារព័ត៌មាននៅកម្ពុជាឱ្យកាន់តែទូលំទូលាយថែមទៀត»។
ចូលដល់ចំណុចអវិជ្ជមានវិញ ក្លិបអ្នកកាសែតកម្ពុជា បានសង្កេតឃើញថា កង្វះខាតក្រមសីលធម៌ វិជ្ជាជីវៈរបស់អ្នកសារព័ត៌មានមួយចំនួន នៅតែជាចំណោចដ៏ធំ ដែលបង្កផលប៉ះពាល់ដល់តម្លៃសារព័ត៌មាននៅកម្ពុជា និងសណ្ដាប់ធ្នាប់សង្គម ស្របពេលដែលចំណាត់ការ ក៏ដូចជាបទចោទរបស់អាជ្ញាធរ និងភាគីពាក់ព័ន្ធមកលើអ្នកសារព័ត៌មាន នៅមិនទាន់សមស្របតាមច្បាប់ស្តីរបបសារព័ត៌មាននៅឡើយទេ។
«សូមអំពាវនាវដល់អ្នកសារព័ត៌មានទាំងអស់ត្រូវរួមគ្នាការពារ និងលើកស្ទួយសេរីភាពសារព័ត៌មាននៅកម្ពុជា តាមរយៈការគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈ ដែលជាតម្លៃមិនអាចខ្វះបានរបស់អ្នកសារព័ត៌មាន និងត្រូវរួមគ្នាការពារវិជ្ជាជីវៈរបស់ខ្លួនពីការបំពានគ្រប់រូបភាព។ ទន្ទឹមនឹងនេះ ក្លិបអ្នកកាសែតកម្ពុជាសូមអំពាវនាវដល់អាជ្ញាធរមានសមត្ថកិច្ច តុលាការ ក៏ដូចជាភាគីពាក់ព័ន្ធផ្សេងៗ សូមគោរពនិងផ្ដល់តម្លៃដល់អ្នកសារព័ត៌មាន និងសូមរួមគ្នាអនុវត្តច្បាប់ស្តីពីរបបសារព័ត៌មានឱ្យមានប្រសិទ្ធភាព»។ នេះជាការលើកឡើងរបស់ក្លិបអ្នកកាសែតកម្ពុជា។
© រក្សាសិទ្ធិដោយ thmeythmey.com
