ក្រចេះ៖ ក្រសួងវប្បធម៌ទិញផ្ទះសសរ១០០ដែលមានអ្នករស់នៅតគ្នា៧ជំនាន់ ហើយរើទៅសង់នៅទីតាំងថ្មី

ជាតិ

ក្រចេះ៖ ក្រសួងវប្បធម៌ទិញផ្ទះសសរ១០០ដែលមានអ្នករស់នៅតគ្នា៧ជំនាន់ ហើយរើទៅសង់នៅទីតាំងថ្មី

24, Jun 2020 , 5:06 pm

រូបភាព

ទិដ្ឋភាពផ្ទះសសរ១០០ ដែលមានអាយុជាង១០០ឆ្នាំ នៅភូមិកោះកណ្តុរ ស្រុកឆ្លូង ខេត្តក្រចេះ ។ រូបផ្តល់ដោយ លោក ទេព វាសនា

ដោយ: ឡាយ សុភាវតី

ផ្ទះសសរ១០០ ដែលមានអាយុជាង១០០ឆ្នាំ នៅភូមិកោះកណ្តុរ ស្រុកឆ្លូង ខេត្តក្រចេះ ត្រូវបានក្រុមការងាររបស់ក្រសួងវប្បធម៌ និងវិចិត្រសិល្បៈ សម្រេចទិញផ្ទះនេះ យកទៅសាងសង់ឡើងវិញនៅក្នុងវត្តរកាកណ្ដាល សង្កាត់រកាកណ្ដាល ក្រុងក្រចេះ។ ការសម្រេចទិញនេះ ដោយសារម្ចាស់ផ្ទះមានបំណងរើផ្ទះ ព្រោះត្រូវយកដីចែកឲ្យកូនៗបន្តទៀត ខណៈផ្ទះនេះក៏មានសភាពចាស់ទ្រុឌទ្រោមផងដែរ។

ប្រធានមន្ទីរវប្បធម៌ខេត្តក្រចេះ លោក ទេព វាសនា ថ្លែងប្រាប់សារព័ត៌មានថ្មីៗតាមទូរស័ព្ទនៅថ្ងៃទី២៤ មិថុនានេះថា ក្រសួងវប្បធម៌និងមន្ទីរបានសុំទិញផ្ទះនេះ ក្នុងតម្លៃ៨ពាន់ដុល្លារ ដើម្បីឲ្យក្រុមជំនាញចុះរុះរើដោយផ្ទាល់និងរៀបឡើងវិញ ដើម្បីរក្សាទុកជាសម្បត្តិបេតិកភណ្ឌ។ បើតាមលោក វាសនា ការរៀបឡើងវិញនេះ ប្រើពេលយ៉ាងយូរចុងឆ្នាំ២០២០។

ប្រធានមន្ទីរវប្បធម៌រូបនេះ ថ្លែងថា៖ «ខាងក្រសួងបានបញ្ចុះបញ្ចូលមិនឲ្យគាត់រុះរើដែរ ប៉ុន្តែគាត់មិនព្រម ទើបស្នើសុំទិញក៏គាត់មិនលក់ ប៉ុន្តែចុងក្រោយបន្ទាប់ពីមានការពន្យល់ណែនាំ គាត់ក៏ព្រមលក់ ហើយក្រសួងបានប្រមូលថវិកាពីសប្បុរសជន៨ពាន់ដុល្លារក្នុងការទិញផ្ទះនេះ។ ផ្ទះនេះ នឹងសាងសង់ឡើងតាមទម្រង់ដើមទាំងស្រុងនិងជួសជុលកន្លែងបាក់បែកផងដែរ»។

ដោយសារចម្ងាយផ្លូវឆ្ងាយប្រមាណ២៨គីឡូម៉ែត្រ ពីទីតាំងផ្ទះសសរ១០០ទៅវត្តរកាកណ្ដាល ខណៈសភាពផ្ទះចាស់ទ្រុឌទ្រោម ដោយនៅសល់សសរត្រឹម៥០ផងនោះ ទើបក្រុមការងាររបស់ក្រសួងសម្រេចរុះរើទាំងស្រុង ហើយសាង់សង់ឡើងវិញ។ ក្រោយសាងសង់ហើយ ផ្ទះនេះ នឹងក្លាយទៅជាសារមន្ទីរ ដើម្បីទាក់ទាញភ្ញៀវទេសចរ។ ជាមួយគ្នានេះ នៅវត្តរកាកណ្ដាល ក៏មានព្រះវិហារជាសម្បត្តិបេតិកភណ្ឌ១ បានសាងសង់ឡើងនៅឆ្នាំ១៨៣៨ទៀតផង។ នេះបើតាមការបញ្ជាក់របស់ លោក វាសនា។

ផ្ទះសសរ១០០នេះ ចាប់ផ្ដើមរើ កាលពីថ្ងៃ២១ មិថុនា ប៉ុន្តែមកដល់ថ្ងៃនេះ រុះរើបានត្រឹមដំបូលមួយផ្នែក និងជញ្ជាំងមួយផ្នែកប៉ុណ្ណោះ ព្រោះផ្ទះពុកផុយធ្វើឲ្យក្រុមការងារពិបាករើ និងប្រើពេលយូរ។ ផ្ទះនេះ មិនមានការបរិច្ឆេទច្បាស់លាស់នោះទេ ខណៈម្ចាស់ផ្ទះ ដែលកំពុងរស់នៅបច្ចុប្បន្ននេះ គឺជាកូនចៅជំនាន់ទី៧ ហើយ។ ដោយសារតែផ្ទះរស់នៅតកូនចៅជំនាន់ទី៧នេះហើយ ទើបមន្ទីរវប្បធម៌ខេត្តក្រចេះ សន្មត់ថា ផ្ទះនេះ មានអាយុកាលជាង១០០ឆ្នាំហើយ។ នេះបើតាមប្រធានមន្ទីរវប្បធម៌ខេត្តក្រចេះ លោក ទេព វាសនា៕