ជាតិ
ក្រសួងពាណិជ្ជកម្ម អនុម័ត E-Commerce Strategy ដើម្បីជំរុញកំណើនសេដ្ឋកិច្ច លោក ប៉ាន សូរស័ក្តិ ក្នុងកិច្ចប្រជុំពិនិត្យនិងអនុម័ត E-Commerce Strategy ថ្ងៃទី២៣ កក្កដា ២០២០។ (រូបពីទំព័រហ្វេសប៊ុកក្រសួងពាណិជ្ជកម្ម)
× ភ្នំពេញ៖ ក្រសួងពាណិជ្ជកម្ម បានអនុម័តនូវយុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក(E-Commerce Strategy) ដើម្បីជំរុញភាពប្រកួតប្រជែង របស់សហគ្រាសពាណិជ្ជកម្ម និងដំណើនការអាជីវកម្ម ក្នុងបដិវត្តន៍ឧស្សាហកម្ម៤.០។ បើតាមក្រសួងពាណិជ្ជកម្ម E-Commerce Strategy ក៏នឹងលើកកម្ពស់ផលិតភាព បង្កើតការនាំចេញ បង្កើតការងារ និងជំរុញកំណើនសេដ្ឋកិច្ចផង។
រដ្ឋាភិបាល បានរៀបចំខ្លួនចាប់យកកចក្ខុវិស័យវែងឆ្ងាយ គឺកាលានុវត្តភាព ពីបរិបទបដិវដ្តន៍ឧស្សាហកម្ម៤.០ ដើម្បីឆ្លើយតបគោលនយោបាយអភិវឌ្ឍន៍ឧស្សាហកម្ម ក្នុងការធ្វើពិពិធកម្មសេដ្ឋកិច្ច តាមរយៈការលើកកម្ពស់សមត្ថភាពរបស់សហគ្រាសធុនតូច និងមធ្យមក្នុងស្រុក ឲ្យផ្សារភ្ជាប់ទៅនឹងខ្សែច្រវាក់តម្លៃតំបន់ និងសកលលោក។ នេះបើតាមលោក ប៉ាន សូរស័ក្តិ រដ្ឋមន្រី្តក្រសួងពាណិជ្ជកម្ម ដែលថ្លែងក្នុងកិច្ចប្រជុំអន្តរក្រសួង ដើម្បីប្រកាសអនុម័តយុទ្ធសាស្ត្រ (E-Commerce Strategy) នៅថ្ងៃទី២៣ ខែកក្កដា។
បើតាមការចេញផ្សាយលើទំព័រហ្វេសប៊ុក របស់ក្រសួងពាណិជ្ជកម្ម នៅថ្ងៃទី២៤ កក្កដា ក្រសួងពាណិជ្ជកម្ម បានរៀបចំយុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក ដើម្បីជាផែនទីបង្ហាញផ្លូវដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិក ដែលជាវិស័យថ្មីមួយប្រកបដោយសក្តានុពលខ្ពស់ ក្នុងការបង្កើតប្រភពកំណើនថ្មី សម្រាប់សេដ្ឋកិច្ចកម្ពុជា។ យុទ្ធសាស្ត្រពាណិជ្ជកម្ម តាមប្រព័ន្ធអេឡិចត្រូនិក ត្រូវបានរៀបចំឡើង ដោយមានលក្ខណៈប្រទាក់ក្រឡា និងឆ្លើយតបទៅនឹងវិស័យពាណិជ្ជកម្មផ្សេងៗទៀត រួមមានឯកសារយុទ្ធសាស្ត្រសមាហរណកម្មពាណិជ្ជកម្មកម្ពុជា ឆ្នាំ២០១៩-២០២៣។
ក្នុងកិច្ចប្រជុំ លោក ប៉ាន សូរស័ក្តិ បានលើកឡើងថា៖ «នៅដំណាក់កាលជំងឺកូវីដ-១៩ បានបង្ខំឲ្យសហគ្រាស និងអាជីវកម្មជាច្រើន ងាកមកប្រើប្រាស់បច្ចេកវិទ្យា និងការធ្វើពាណិជ្ជកម្មតាមប្រព័ន្ធអេឡិចត្រូនិក ដើម្បីរក្សាបានដំណើរការអាជីវកម្មរបស់ខ្លួន។ ហើយការងាកមកប្រើបច្ចេកវិទ្យា នឹងរឹតតែកើនឡើងនាពេលអនាគត ទោះបីជាការរាតត្បាត មានភាពស្រាកស្រាន្តក៏ដោយ»។
លោករដ្ឋមន្ត្រីពាណិជ្ជកម្ម បានបញ្ជាក់ថា យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ត្រូវបានរៀបចំឡើង ស្របពេលដែលកម្ពុជា មានច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ដែលត្រូវបានប្រកាសឱ្យប្រើប្រាស់ កាលពីថ្ងៃទី២ ខែវិច្ឆិកា ឆ្នាំ២០១៩ កន្លងទៅ។ លោកបន្តថា ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក នឹងបម្រើជាមូលដ្ឋានគតិយុត្ត ក្នុងការការពារផលប្រយោជន៍ និងកសាងទំនុកចិត្តខ្ពស់ដល់អតិថិជន ក៏ដូចជាទាក់ទាញវិយោគិន ទាំងក្នុងនិងក្រៅប្រទេស ដើម្បីវិនិយោគក្នុងវិស័យពាណិជ្ជកម្ម តាមប្រព័ន្ធអេឡិកត្រូនិកនៅកម្ពុជា។
យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកនេះ បានរៀបចំឡើងដោយក្រសួងពាណិជ្ជកម្ម ក្រោមការឧបត្ថម្ភហិរញ្ញប្បទាន ពីអង្គការក្របខណ្ឌពង្រឹងសមាហរណកម្ម (Enhanced Integrated Framework – EIF) តាមរយៈការពិភាក្សាជាមួយក្រសួងស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍៕
© រក្សាសិទ្ធិដោយ thmeythmey.com