COVID-19
ជាតិ
Covid-19៖ ក្រសួងសុខាភិបាល រំឭកពលរដ្ឋកុំឲ្យភ្លេចខ្លួន និងមើលរំលងលទ្ធភាពឆ្លងក្នុងសហគមន៍ លោកស្រី ឱ វណ្ណឌីន ក្នុងសន្និសីទសារព័ត៌មានស្តីពីស្ថានភាពនៃជំងឺកូវីដ-១៩ នៅកម្ពុជា នាថ្ងៃទី២៧ មេសា ២០២០។
× ភ្នំពេញ៖ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានរំឭកពលរដ្ឋ កុំឲ្យភ្លេចខ្លួន ព្រោះលទ្ធភាពនៃការចម្លងវីរុសកូវីដ-១៩ ចូលសហគមន៌យើងមិនអាចមើលរំលងបានឡើយ ទោះជាករណីនាំចូលក៏ដោយ។ ការអំពាវនាវនេះ ធ្វើឡើងបន្ទាប់ពីកម្ពុជាបានរកឃើញវិជ្ជមានកូវីដ-១៩ ចំនួន២៣ករណីទៀត លើជនជាតិខ្មែរ១៩នាក់ និងជនជាតិឥណ្ឌូណេស៊ី៤នាក់។
ដ្បិតជាករណីនាំចូល និងមិនត្រូវចាត់ទុកថាជារលកទី២ ប៉ុន្តែលោកស្រី ឱ វណ្ណឌីន អំពាវនាវឲ្យពលរដ្ឋ ត្រូវប្រុងប្រយ័ត្នជានិច្ច ដោយសារលទ្ធភាពចម្លងក្នុងសហគមន៍អាចកើតមានគ្រប់ពេល។ លោកស្រី បានឆ្លើយនឹងសំណួររបស់សារព័ត៌មានថ្មីៗ នៅក្នុងក្រុមអ្នកសារព័ត៌មានតាមបណ្តាញតេឡេក្រាមថា៖ «លទ្ធភាពនៃការចម្លងវីរុសកូវីដ-១៩ ចូលសហគមន៍យើងមិនអាចមើលរំលងបានឡើយ...សូមកុំភ្លេចខ្លួន និងសូមកុំសន្តិភាពនិយម ជាមួយជំងឺកូវីដ-១៩ នេះឲ្យសោះ»។
លោកស្រីបានសង្កត់ធ្ងន់ ចំពោះពលរដ្ឋដែលមានដំណើរកម្សាន្ត ត្រូវប្រុងប្រយ័ត្នឲ្យបានខ្ពស់ ដោយសារហានិភ័យ នៃការឆ្លងកូវីដ-១៩អាចកើតមានគ្រប់ពេល។
រយៈពេលចុងក្រោយនេះ ចំនួនអ្នកឆ្លងកូវីដ-១៩ នៅកម្ពុជា មានការកើនឡើងជាបន្តបន្ទាប់។ គិតត្រឹមថ្ងៃនេះ កម្ពុជារកឃើញករណីវិជ្ជមានចំនួន២២៥ករណី ក្នុងនោះមានក្នុងនោះ ១៤៣នាក់បានជាសះស្បើយ និង៨២នាក់ កំពុងសម្រាកព្យាបាលនៅមន្ទីរពេទ្យ។ អ្វីដែលគួរឲ្យកត់សម្គាល់នោះ ក្នុងចំណោមអ្នកវិជ្ជមានទាង២៣នាក់ ដែលត្រូវបានប្រកាសដោយក្រសួងសុខាភិបាលនៅថ្ងៃទី២៥ ខែកក្កដានេះ មានអ្នកជំងឺ១៥នាក់ ត្រូវបានបញ្ជូនឲ្យទៅសម្រាកព្យាបាលនៅមន្ទីរពេទ្យបង្អែកខេត្តកំពង់ស្ពឺ។ ចំណែកនៅមន្ទីពេទ្យមិត្តភាពខ្មែរ-សូវៀត មានអ្នកសម្រាកព្យាបាល៦នាក់, មណ្ឌលសុខភាពចាក់អង្រែ មានអ្នកសម្រាកព្យាបាល ៥៩នាក់ និង២នាក់ទៀត សម្រាកព្យាបាលនៅស្ថានទូតអាមេរិកប្រចាំកម្ពុជា។ យ៉ាងណាក៏ដោយ អ្នកនាំពាក្យក្រសួងសុខាភិបាល មិនបានបញ្ជាក់ពីមូលហេតុនៃការបញ្ជូនអ្នកជំងឺទៅព្យាបាលនៅមន្ទីរពេទ្យបង្អែកខេត្តកំពង់ស្ពឺនោះទេ៕
© រក្សាសិទ្ធិដោយ thmeythmey.com