រដ្ឋមន្ត្រីអប់រំ៖ ការបើកសាលារៀនឡើងវិញ មិនមែនបើកទាំងប្រថុយប្រថានឡើយ

ជាតិ

សង្គមជាតិ

រដ្ឋមន្ត្រីអប់រំ៖ ការបើកសាលារៀនឡើងវិញ មិនមែនបើកទាំងប្រថុយប្រថានឡើយ

27, Aug 2020 , 9:29 pm

រូបភាព

លោក ហង់ជួន ណារ៉ុន រដ្ឋមន្ត្រីក្រសួងអប់រំ បាន ដឹកនាំ កិច្ចប្រជុំ ជាមួយនឹងមន្ទីរអប់រំ គ្រប់ ខេត្ត ក្រុង និងនាយកដ្ឋានពាក់ព័័ន្ធដើម្បីធានាឲ្យការ បើកសាលាប្រកបដោយសុវត្ថិភាពខ្ពស់ នាថ្ងៃទី២៦ ខែសីហា ឆ្នាំ២០២០

ដោយ:

ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួន ណារ៉ុន បានអះអាងថា ការសម្រេចឲ្យបើកសាលារៀនឡើងវិញ មិនមែនបើកទាំងប្រថុយប្រថានឡើយ ។ រដ្ឋមន្ត្រីអប់រំ ថ្លែងបែបនេះនៅក្នុងកិច្ចប្រជុំជាមួយនឹងមន្ទីរអប់រំ ខេត្ត-ក្រុង និងនាយកដ្ឋានពាក់ព័ន្ធ នាថ្ងៃទី២៦ ខែសីហានេះ។

លោក ហង់ ជួន ណារ៉ុន បានបញ្ជាក់ថា ការបើកដំណើរការគ្រឹះស្ថានសិក្សាវិញនេះ គឺអនុវត្តតាមស្តង់ដា សុវត្ថិភាព (SOP) តាមការណែនាំរបស់ក្រសួងសុខាភិបាល។ រដ្ឋមន្ត្រីអប់រំ បានសង្កត់ធ្ងន់ថា សាលារៀនត្រូវធានាបាននូវសុវត្ថិភាព អនាម័យ រៀបចំនូវហេដ្ឋារចនាសម្ព័ន្ធ សមស្រប ពិសេសធានានូវគម្លាតសុវត្ថិភាព ជៀសវាសកុំឱ្យសិស្សជួបជុំគ្នា ដោយមានការត្រួតពិនិត្យត្រឹមត្រូវ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩។

មុននឹងសាលារៀននីមួយៗបើកដំណើរការវិញ សាលារៀននីមួយៗត្រូវបាញ់ថ្នាំសម្លាប់មេរោគក្នុងបន្ទប់រៀន បរិវេណសាលា បណ្ណាល័យ អាហារដ្ឋាន បន្ទប់ទឹក សួនកុមារកម្សាន្តលេង និងសម្ភារចាំបាច់ផ្សេងៗទៀត។ សាលារៀននីមួយៗត្រូវរៀបចំទុកដាក់សំរាមឲ្យបានត្រឹមត្រូវ។ សាលាត្រូវរៀបចំតុ និងកៅអីឲ្យនៅឆ្ងាយពីគ្នា២ម៉ែត្រ ហើយត្រូវឲ្យសិស្សរៀនក្នុងមួយថ្នាក់តែ១៥ ទៅ២០នាក់។ សាលាត្រូវផ្អាកកន្លែងកម្សាន្ត ឬទីលានកីឡា និងផ្អាកកម្មវិធីជួបជុំ ឬព្រឹត្តការណ៍សហគមន៍ក្នុងនៅបរិវេណសាលារៀន។ រាល់ម៉ោងសិក្សាមិនត្រូវឲ្យមានអ្នកចេញចូលសាលាដោយគ្មានការអនុញ្ញាតឡើយ។ នេះបើតាមរដ្ឋមន្ត្រីអប់រំ។

លោករដ្ឋមន្ត្រី បានបញ្ជាក់ថា បើទោះបីសាលារៀនមួយចំនួនបើកឲ្យដំណើរការវិញ ក៏សិស្សានុសិស្សអាចរៀននៅសាលាបានតែ២ ទៅ៣ថ្ងៃក្នុងមួយសប្តាហ៍ ចំណែកប៉ុន្មានថ្ងៃទៀតត្រូវរៀនតាមអនឡាញវិញ ។

សូមបញ្ជាក់ថា សិស្សានុសិស្សបានផ្អាកទៅសាលារៀនអស់រយៈពេល៥ខែមកហើយ ដោយជំនួសឲ្យការរៀនតាមអនឡាញវិញ៕