ជាតិ
អ្នកជំនាញ ណែនាំកសិករប្រើប្រាស់ប្រព័ន្ធស្រោចស្រពដំណក់ទឹកលើដំណាំ រូបភាពពីនាយកដ្ឋានផ្សព្វផ្សាយកសិកម្ម
× ការប្រើប្រាស់ប្រព័ន្ធស្រោចស្រពដំណក់ទឹកលើដំណាំ ជាជម្រើសដ៏ឆ្លាតវៃមួយសម្រាប់កសិករ ព្រោះវាជួយសន្សំសំចៃច្រើន។ នេះជាការលើកឡើងរបស់លោក គង់ ពិសិដ្ឋ អនុប្រធាននាយកដ្ឋានសាវប្បកម្ម និងដំណាំគួបផ្សំ នៃអគ្គនាយកដ្ឋានផ្សព្វផ្សាយកសិកម្ម ប្រាប់សារព័ត៌មាន Thmeythmey25 ។
ដោយសង្កេតឃើញថា អ្នកប្រើប្រាប់ប្រព័ន្ធនេះមានតិចតួចនៅឡើយ អ្នកជំនាញរូបនេះ បានណែនាំឲ្យកសិករ គួរងាកមកប្រើប្រាស់ប្រព័ន្ធស្រោចស្រពដំណក់ទឹកលើដំណាំវិញ ព្រោះវាផ្ដល់អត្ថប្រយោជន៍ជាច្រើនដល់កសិករ ដូចជា ជួយការពារ ការសឹករិចរិលនៃដី កាត់បន្ថយកត្តាចង្រៃនៃសត្វល្អិត ផ្សិតលើដំណាំ និងកាត់បន្ថយស្មៅ។
រូបភាពពីនាយកដ្ឋានផ្សព្វផ្សាយកសិកម្ម
លោក គង់ ពិសិដ្ឋរៀបរាប់បន្ថែមប្រាប់Thmeythmey25 ថា ៖«វាជួយកាត់បន្ថយការប្រើប្រាស់ថ្នាំពុលកសិកម្ម កាត់បន្ថយការបាត់បង់ជាតិទឹក និងជីពីដំណាំ ជួយកាត់បន្ថយការប្រើប្រាស់កម្លាំងពលកម្មក្នុងការថែទាំ និងស្រោចស្រពដំណាំ និងសន្សំសំចៃទឹកបាន ៧០ភាគរយ»។
ទោះជាយ៉ាងនេះក្តី មុននឹងងាកមកប្រើប្រាស់ប្រព័ន្ធស្រោចស្រពលោក គង់ ពិសិដ្ឋ ក៏ប្រាប់កសិករ ឲ្យគិតគូរពីដើមទុនសម្រាប់ចំណាយលើការរៀបចំប្រព័ន្ធនេះដែរ ដ្បិតតែវានឹងត្រូវការទុនច្រើន ទៅតាមទំហំដីដាំដំណាំ។
សូមជម្រាបថា ដើម្បីរៀបចំប្រព័ន្ធស្រោចស្រពតំណក់ទឹកលើដំណាំនេះ កសិករត្រូវមានឧបករណ៍មួយចំនួនដូចជា ម៉ូទ័រ៖សម្រាប់បូបទឹកពីប្រភពណាមួយដោយផ្ដល់នូវសំពាធត្រឹមត្រូវ សម្រាប់នាំចូលក្នុងប្រព័ន្ធទុយោ។ វ៉ាល់៖ជាអ្នកបញ្ជាឲ្យប្រព័ន្ធទាំងមូលឈប់ ឬដំណើរការ។ ហ្វីថើ៖ជួយសម្អាតទឹក ហើយប្រភេទហ្វីថើសំណាញ់ជួយច្រោះខ្សាច់ និងចម្រាញ់ធាតុខនិច មួយចំនួនចេញពីទឹក។ ធុងជី៖ វាស់កម្រិតជី ចូលក្នុងទឹក អំឡុងពេលស្រោចស្រព និងPlastic Connector៖ ប្រើប្រាស់សម្រាប់ភ្ជាប់ទុយោលើរង ភ្ជាប់ទៅនឹងទុយោពីម៉ូទ័រ៕
© រក្សាសិទ្ធិដោយ thmeythmey.com