អន្តរជាតិ
មេដឹកនាំប្រឆាំងវ៉េណេស៊ុយអេឡា ស្នើយោធាគាំទ្រការធ្វើពហិការក្នុងការបោះឆ្នោតខែធ្នូ
×
ដោយ៖កង ម៉េងហុង
មេដឹកនាំបក្សប្រឆាំងរបស់វ៉េណេស៊ុយអេឡាលោក ហ័ន ក្វៃដូ (Juan Guaido) បានអំពាវនាវឲ្យយោធាគាំទ្រការធ្វើពហិការការបោះឆ្នោតស្ទង់ជ្រើសរើសសមាជិកសភា និងចូលរួមក្នុងការដាក់សម្ពាធរបស់អន្តរជាតិលើលោកប្រធានាធិបតី នីកូឡាស់ ម៉ាឌុយរ៉ូ ។
លោក ហ័ន ក្វៃដូ នៅតែបោះដៃរកក្រុមយោធាដែលជាខ្នងបង្អែករឹងមាំរបស់ប្រធានាធិបតី នីកូឡាស់ ម៉ាឌុយរ៉ូ ។ ក្នុងការថ្លែងតាមបណ្ដាញសង្គមនៅថ្ងៃទី៧ ខែកញ្ញា លោក មេដឹកនាំប្រឆាំងរូបនេះ បានជំរុញឲ្យយោធាជាន់ខ្ពស់ចូលរួមជាមួយក្រុមប្រឆាំងដើម្បីបង្អាក់ការបោះឆ្នោតសភាដែលធ្វើនៅថ្ងៃទី៦ ខែធ្នូខាងមុខ។
«ឈប់លាក់ខ្លួននៅពីក្រោយមេដឹកនាំផ្តាច់ការ និងឈប់ព្រងើយកន្តើយចំពោះការពិតនៅវេណេហ្ស៊ុយអេឡា។ ពួកយើងសុខចិត្តអង្គុយចុះហើយពិភាក្សាគ្នាម្តងទៀតជាមួយអ្នកណាដែលចង់បានការផ្លាស់ប្តូរ»។ នេះជាសម្តីរបស់លោក ក្វៃដូ ក្នុងសារទៅកាន់មេបញ្ជាការជាន់ខ្ពស់យោធាវ៉េណេស៊ុយអេឡាដែលផ្សាយដោយសារព័ត៌មាន TRT ។
លោក ក្វៃដូ ដែលជាមេដឹកនាំប្រឆាំងនោះ ក៏ចាត់ទុកខ្លួនឯងជាប្រធានាធិបតីបណ្ដោះអាសន្នរបស់វ៉េណេស៊ុយអេឡាដែរ ដោយចោទលោក ម៉ាឌុយរ៉ូ ថា លួចបន្លំលទ្ធផលបោះឆ្នោតឆ្នាំ២០១៨ ។ ចាប់ពីដើមឆ្នាំ២០១៩ មក ក្រុមប្រឆាំងបានព្យាយាមបណ្ដេញលោក ម៉ាឌុយរ៉ូ ប៉ុន្តែមិនជោគជ័យឡើយដែលក្នុងនោះរួមមានទាំងការបះបោរយោធាដែលរៀបចំឡើងដោយលោក ក្វៃដូ ក្នុងខែមេសាឆ្នាំ ២០១៩ ហើយត្រូវបានបរាជ័យដោយសារមិនបានទទួលការគាំទ្រច្រើន។
ក្រុមប្រឆាំងរបស់លោក ក្វៃដូ ក៏ធ្វើយុទ្ធនាការដើម្បីធ្វើឲ្យរាំងស្ទះការបោះឆ្នោតខែធ្នូ ហើយប្រកូកប្រកាសឲ្យប្រជាជនចូលរួមក្នុងយុទ្ធនាការរបស់ខ្លួន។ ចលនានេះ ទទួលបានការគាំទ្រពីអ្នកនយោបាយក្នុងស្រុកខ្លះ ប៉ុន្តែក៏មានមតិមិនពេញដែរ។ សមាជិកសភារបស់បក្សប្រឆាំងលោក Stalin Gonzales លើកឡើងថា ការកៀរគរសម្លេងឆ្នោតអោយបក្សប្រឆាំង មានឥទ្ធិពលជាងការធ្វើពហិការការបោះឆ្នោត៕
Tag:
ហ័ន ក្វៃដូ
វ៉េណេស៊ុយអេឡា
© រក្សាសិទ្ធិដោយ thmeythmey.com