អន្តរជាតិ
តុលាការតួកគី កាត់ទោសបុរសម្នាក់ជាប់គុក៤០ជីវិតចំពោះការបាញ់ប្រហារនៅក្លិបរាត្រីកាលពីឆ្នាំ២០១៧ ជនរងគ្រោះក្នុងការបាញ់ប្រហារនៅទីក្រុងអ៊ីស្តង់ប៊ុលកាលពីឆ្នាំ២០១៧ ។ រូបភាព Anadolu
×
ដោយ៖កង ម៉េងហុង
តុលាការតួកគី បានកាត់ទោសជនដៃដល់ Abdulkadir Masharipov ឲ្យជាប់ពន្ធនាគារអស់មួយជីវិតពីបទបាញ់វាយប្រហារដោយកាំភ្លើងទៅលើក្លឹបរាត្រីមួយនៅភាគខាងជើងនៃទីក្រុងអ៊ីស្តង់ប៊ុលដែលបណ្តាលឱ្យមនុស្ស ៣៩ នាក់ស្លាប់កាលពីឆ្នាំ ២០១៧។ រយៈពេលជាប់ពន្ធនាគារមួយជីវិតនេះ ស្មើនឹងការជាប់គុក៤០ជីវិត។
Abdulkadir Masharipov ជាជនជាតិអ៊ូបេគីស្ថានត្រូវបានកាត់ទោសឱ្យស្មើទៅនឹងទោសចំនួន ៤០ ដងនៃការដាក់ទោសក្នុងពន្ធធានាគារអស់មួយជីវិតក្នុងសវនាការថ្ងៃទី៧ ខែកញ្ញា។ ការកាត់ទោសនេះធ្វើឡើង បន្ទាប់ពីការជំនុំជម្រះអស់រយៈពេល ៣ ឆ្នាំលើការបាញ់ប្រហារមួយនេះ ដែលបានកើតឡើងតែប៉ុន្មាននាទីប៉ុណ្ណោះមុនថ្ងៃចូលឆ្នាំថ្មីឆ្នាំ២០១៧ នៅក្លឹបរាត្រីមួយឈ្មោះ Reina ក្នុងទីក្រុងអ៊ីស្តង់ប៊ុល។
បើតាមទីភ្នាក់ងារព័ត៌មានតួកគី Anadolu ពលរដ្ឋអ៊ីស្រាអែល បារាំង ទុយនេស៊ី លីបង់ ឥណ្ឌា បែលហ្ស៊ិក ហ្ស៊កដានី និង អារ៉ាប់ប៊ីសាអូឌីតស្ថិតក្នុងចំណោមជនរងគ្រោះដល់ជីវិត ហើយមនុស្សរាប់សិបនាក់បានរងរបួស។ ចំណែកក្រុមរដ្ឋឥស្លាម (IS) បាននិយាយថា ខ្លួនជាអ្នកទទួលខុសត្រូវចំពោះការវាយប្រហារនេះ។
អំឡុងពេលសវនាការ លោក Masharipov ត្រូវបានកាត់ទោសពីបទឃាតកម្មដោយចេតនា និងការរំលោភបំពានរដ្ឋធម្មនុញ្ញ ហើយនឹងមិនមានសិទ្ធិទទួលបានការដោះលែងនោះទេ។ លើសពីនេះទៅទៀត បុរសរូបនេះក៏បានទទួលទោសបន្ថែមចំនួន១៣៦៨ ឆ្នាំទៀតពីបទប៉ុនប៉ងធ្វើឃាតមនុស្ស ៧៩ នាក់ដែលបានរងរបួសក្នុងការវាយប្រហារ និងពីបទកាន់កាប់អាវុធដោយគ្មានអាជ្ញាបណ្ណផងដែរ។
ចំណែកឯបុរសម្នាក់ទៀតដែលមានឈ្មោះថា Ilyas Mamasaripov ក៏ត្រូវបានកាត់ទោសឱ្យជាប់គុកជាង ១៤០០ ឆ្នាំផងដែរពីបទជួយរៀបចំគំរោងក្នុងការបាញ់ប្រហារដ៏សាហាវនេះ។ ជាមួយគ្នានេះផងដែរ ប្រព័ន្ធផ្សព្វផ្សាយក្នុងស្រុកតួកគីខាងលើ បានរាយការណ៍ថា ជនជាប់ចោទចំនួន ៤៨ នាក់ត្រូវបានកាត់ទោសឱ្យជាប់គុកដោយសារពួកគេជាសមាជិកនៃអង្គការភេរវកម្ម ហើយ ១១ នាក់ទៀតត្រូវបានដោះលែង៕
© រក្សាសិទ្ធិដោយ thmeythmey.com