ដោយ៖កង ម៉េងហុង
ប្រធានាធិបតីហ្សំប៊ី នៅដើមសប្តាហ៍នេះបានចូលរួមកាន់ទុក្ខជាមួយប្រជាជនទូទៅជាពិសេសនិស្សិតចំពោះការស្លាប់របស់ត្រីមួយក្បាលដែលគេចាត់ទុកថាជា «ត្រីនាំសំណាង»។
ការស្លាប់របស់ត្រីមួយក្បាលដែលរស់នៅក្នុងស្រះមួយក្នុងបរិវេណសកលវិទ្យាល័យ Copperbelt University (CBU) នៃប្រទេសហ្សំប៊ីក្លាយជារឿងមួយគួរឲ្យចាប់អារម្មណ៍ ព្រោះសូម្បីតែប្រមុខរដ្ឋហ្សំប៊ីលោក Edgar Lungu ចូលរួមកាន់ទុក្ខចំពោះការបាត់បង់ត្រីមួយក្បាលនេះដែរ។
យោងតាមសារព័ត៌មានអង់គ្លេស BBC ហេតុផលដែលធ្វើឲ្យត្រីនេះមានកេរឈ្មោះល្បាញល្បី គឺ ជំនឿរបស់សិស្សនិស្សិតនៃសាកលវិទ្យាល័យ CBU។ ពួកគេភាគច្រើនជឿថាត្រីនេះនាំមកនូវសំណាងល្អ បើសិនជាពួកគេបួងសួងសុំមុនពេលប្រលង។
ត្រីនេះត្រូវបានគេដាក់ឈ្មោះថា #Mafishi ហើយសិស្សនិស្សិតដែលធ្លាប់សុំសំណាងល្អពេលប្រលងក៏នាំគ្នារៀបចំពិធីបួងសួងឧទ្ទិសកុសល និងកាន់ទុក្ខចំពោះត្រីនេះដែរ។
តំណាងក្រុមនិស្សិតឈ្មោះ Lawrence Kasonde រៀបរាប់ថា Mafishi ដែលន័យថា « ត្រីធំ» តាមភាសាជាតិនោះអាចមានអាយុប្រហែល ២២ ឆ្នាំ។ លោកបន្តថា ត្រីនេះក៏បានរស់នៅក្នុងស្រះក្នុងបរិវេណសាកលវិទ្យាល័យអស់រយៈពេលជាង ២០ ឆ្នាំមកហើយដែរ។
ប្រធានសហព័ន្ធនិស្សិតរូបនេះ បានបន្ថែមទៀតថាការស្លាប់របស់ត្រីនេះកំពុងស្ថិតនៅក្រោមការស៊ើបអង្កេតនៅឡើយ ដើម្បីឈានទៅកំណត់មូលហេតុពិតនៃការស្លាប់។
«វាមិនទាន់ត្រូវបានគេបញ្ចុះនៅឡើយទេ យើងកំពុងរៀបចំចាក់សារធាតុគីមីដើម្បីរក្សាសាកសព»។ លោក Kasonde ថ្លែងបែបនេះ។
តាមពិតទៅកាន់កាន់ទុក្ខចំពោះការបាត់បង់ជីវិតរបស់ Mafishi ក៏ត្រូវបានរៀបចំទូទាំងប្រទេស។ ក្នុងសាររម្លែកទុក្ខរបស់ខ្លួន ប្រធានាធិបតី Lungu បានបង្ហាញភាពសោកស្តាយចំពោះការស្លាប់របស់សត្វត្រីនេះ ក៏ដូចជាកោតសរសើរសិស្សនិស្សិតហ្សំប៊ីដែលយកចិត្តទុកដាក់ចំពោះសត្វត្រីនេះដែរ។
មេដឹកនាំរូបនេះបានដកស្រង់សម្តីរបស់លោក មហាត្មៈ គន្ធី ថា៖ « ភាពអស្ចារ្យនៃប្រជាជាតិមួយ និងវឌ្ឍនភាពខាងសីលធម៌ក្នុងសង្គមមួយអាចត្រូវបានគេវិនិច្ឆ័យដោយទង្វើរបស់ពួកគេចំពោះសត្វ»។
មិនត្រឹមតែប្រធានាធិបតីប៉ុណ្ណោះទេដែលកាន់ទុក្ខ មេដឹកនាំគណបក្សប្រឆាំងហ្សំប៊ីឃើញ Hakainde Hichilema ក៏បានចេញសារមួយបង្ហាញស្មារតីសាមគ្គីភាព និងរម្លែកទុក្ខចំពោះការស្លាប់នៃត្រីនាំសំណាងរបស់សិស្សនិស្សិតនៃសាកលវិទ្យាល័យ CBC ដូចគ្នា៕