អន្តរជាតិ
ប្រធានសភាអាមេរិក ព្រមានអង់គ្លេសរឿងពាណិជ្ជកម្ម បើសិនបំពានកិច្ចព្រមព្រៀង Brexit
លោកស្រី ណាន់ស៊ី ផេឡូស៊ី ប្រធានសភាតំណាងអាមេរិក។ រូបភាព៖ AFP
×![]()
ប្រធានសភាតំណាងអាមេរិក លោកស្រី ណាន់ស៊ី ផេឡូស៊ី នៅថ្ងៃទី៩ ខែកញ្ញា បានព្រមានអង់គ្លេសថា កិច្ចព្រមព្រៀងពាណិជ្ជកម្មរវាងអាមេរិក និងអង់គ្លេសនាពេលអនាគត នឹងមិនលេចរូបរាងឡើយ បើសិនជាអង់គ្លេសហ៊ានរំលោភកិច្ចព្រមព្រៀងចាកចេញពីសហភាពអឺរ៉ុប ដោយមិនខ្វល់ពីបញ្ហាអៀរឡង់ខាងជើង។
នៅក្នុងសេចក្តីថ្លែងការណ៍ថ្ងៃទី៩ ខែកញ្ញា លោស្រី ណាន់ស៊ី ផេឡូស៊ី ប្រធានសភាតំណាងរបស់អាមេរិកបានលើកឡើងចំៗថា កិច្ចព្រមព្រៀងពាណិជ្ជកម្មរវាងអង់គ្លេស និងអាមេរិកនាពេលអនាគត នឹងមិនអាចឆ្លងផុតសភាតំណាងឡើយ បើសិនជាអង់គ្លេសបំពានកិច្ចព្រមព្រៀងចាកចេញពីសហភាពអឺរ៉ុប។ អាមេរិក ជាគោលដៅរបស់អង់គ្លេសក្នុងការស្វែងរកកិច្ចព្រមព្រៀងពាណិជ្ជកម្ម ក្រោយការចាកចេញអឺរ៉ុបទាំងស្រុងនៅចុងឆ្នាំ២០២០ខាងមុខ
ការព្រមានរបស់លោកស្រី Pelosi ធ្វើឡើងបន្ទាប់ពីអង់គ្លេសដាក់សេចក្តីព្រាងច្បាប់ស្តីពីទីផ្សារទៅសភាអង់គ្លេសសម្រាប់ពេលចាកចេញពីសហភាពអឺរ៉ុប។ សេចក្ដីព្រាងច្បាប់នេះ នឹងផ្តល់អំណាចឲ្យរដ្ឋមន្ត្រីទទួលបន្ទុកកិច្ចការអៀរឡង់ខាងជើងរបស់ចក្រអង់គ្លេស មិនចាំបាច់ចេញក្រដាសពន្ធគយសម្រាប់ទំនិញពីអៀរឡង់ខាងជើងទៅទឹកដីអង់គ្លេស។ សេចក្តីព្រាងច្បាប់ ក៏កំណត់លទ្ធភាពរបស់សហភាពអឺរ៉ុបក្នុងការឧបត្ថម្ភធនដល់ជំនួញដែលមានផលិតផលផលិតនៅអៀរឡង់ខាងជើងដែរ។
ចំណុចខាងលើ ផ្ទុយពីកិច្ចព្រមព្រៀងចាកចេញពីអឺរ៉ុបរបស់អង់គ្លេស (Brexit) ដែលអនុញ្ញាតឲ្យអៀរឡង់ខាងជើងស្ថិតក្នុងទីផ្សាររួមរបស់សហភាពអឺរ៉ុបបន្តទៀត ហើយទំនិញចេញចូលអៀរឡង់ខាងជើងត្រូវបំពេញលិខិតស្នាមស្របតាមច្បាប់ពន្ធគយអឺរ៉ុប។ លើសពីនោះ សេចក្ដីព្រាងច្បាប់ខាងលើ ក៏ត្រូវអនុវត្ត បើសិនអង់គ្លេស និងអឺរ៉ុបគ្មានកិច្ចព្រមព្រៀងពាណិជ្ជកម្មនៅត្រឹមចុងឆ្នាំ២០២០ នេះ។
«បើសិនជាអង់គ្លេសបំពានសន្ធិសញ្ញាអន្តរជាតិ ហើយ Brexit ធ្វើឲ្យប៉ះពាល់ដល់កិច្ចព្រមព្រៀង Good Friday នោះ គ្មានឡើយឱកាសកិច្ចព្រមព្រៀងពាណិជ្ជកម្មជាមួយអង់គ្លេស»។ លោកស្រី ផេឡូស៊ី បញ្ជាក់បែបនេះ ជាមួយនឹងទទូចឲ្យអង់គ្លេស ធានាលំហូរចូលទំនិញដោយសេរីរវាងអៀរឡង់ខាងជើង និងអៀរឡង់។ កិច្ចព្រមព្រៀង Good Friday គឺជាកិច្ចព្រមព្រៀងសន្តិភាពសម្រេចបានក្នុងឆ្នាំ១៩៩៨ ដើម្បីបញ្ចប់ជម្លោះជាង៣០ឆ្នាំរវាងអៀរឡង់ខាងជើង និងអៀរឡង់។
អៀរឡង់ខាងជើង ជាផ្នែកមួយនៃចក្រភពអង់គ្លេសដូចគ្នារដ្ឋបួនទៀតមានស្កុតឡែន វែល និងអង់គ្លេស។
បើទោះបីជាចាកចេញពីសហភាពអឺរ៉ុបកាលពីខែមករាឆ្នាំនេះក្តី ក៏អង់គ្លេសបន្តស្ថិតនៅក្នុងទីផ្សារួមជាមួយសហភាពអឺរ៉ុបរហូតដល់ខែធ្នូឆ្នាំ២០២០ ហើយភាគីទាំងពីរកំពុងចរចាលើទំនាក់ទំនងពាណិជ្ជកម្ម និងសេដ្ឋកិច្ច មុនអង់គ្លេសចេញទាំងស្រុងចាប់ពីឆ្នាំ២០២១ ។ អង់គ្លេស បានគំរាមថា ខ្លួននឹងដើរចេញ បើសិនជាភាគីទាំង២មិនអាចរកកិច្ចព្រមព្រៀងដែលសមស្របមួយនោះ៕
Tag:
អាមេរិក
អង់គ្លេស
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
