រដ្ឋមន្ត្រីការពារជាតិជប៉ុន៖ ជប៉ុន អាចនឹងរៀបចំបោះឆ្នោតថ្នាក់ជាតិមុនអាណត្តិ

អន្តរជាតិ

រដ្ឋមន្ត្រីការពារជាតិជប៉ុន៖ ជប៉ុន អាចនឹងរៀបចំបោះឆ្នោតថ្នាក់ជាតិមុនអាណត្តិ

10, Sep 2020 , 10:29 pm

រូបភាព

រដ្ឋមន្រ្តីការពារជាតិជប៉ុន លោក តូរ៉ូ កូណូ។ រូបភាព៖ Kyodo

ដោយ: ធៀន ភារិន្ទ

ប្រមុខការពារជាតិជប៉ុន លោក តារ៉ូ កូណូ នៅថ្ងៃទី៩ ខែកញ្ញា បានព្រលយពាក្យថា ការបោះឆ្នោតថ្នាក់ជាតិនៅជប៉ុន អាចនឹងរៀបចំនៅក្នុងខែតុលាខាងមុខនេះ បន្ទាប់ពីនាយករដ្ឋមន្ត្រីថ្មីចូលកាន់តំណែង។ ការលើកឡើងរបស់រដ្ឋមន្ត្រីការពារជាតិជប៉ុនបែបនេះ ធ្វើឡើងស្របពេលមានពាក្យចរាមអារ៉ាមថា នាយករដ្ឋមន្ត្រីថ្មី ប្រហែលជាស្នើឲ្យមានការបោះឆ្នោតសភាតំណាងរាស្ត្រមុនអាណត្តិផងដែរ។

ថ្លែងនៅក្នុងកម្មវិធីមួយរៀបចំវិទ្យាស្ថានយុទ្ធសាស្ត្រ និងសិក្សាអន្តរជាតិតាមប្រព័ន្ធអនឡាញ លោក តារ៉ូ កូណា រដ្ឋមន្ត្រីការពារជាតិជប៉ុន បានលើកឡើងថា លោករំពឹងការបោះឆ្នោតថ្នាក់ជាតិ ប្រហែលជារៀបចំក្នុងខែតុលាខាងមុខ។ យ៉ាងណាក៏ដោយ រដ្ឋមន្ត្រីជប៉ុនរូបនេះ មិនបានបញ្ជាក់ពីហេតុផលច្បាស់លាស់ឡើយជុំវិញការរៀបចំការបោះឆ្នោតថ្នាក់ជាតិនេះ។

«ខ្ញុំគិតថា វានឹងមានឱកាសតូចណាស់សម្រាប់ការបោះឆ្នោតថ្នាក់ជាតិ។ ដូច្នេះ នាយករដ្ឋមន្ត្រីថ្មី នឹងក្តាប់យកឱកាសតូចទាំងនោះ ហើយអ្នកនឹងមាននាយករដ្ឋមន្ត្រីថ្មី ដែលបោះឆ្នោតដោយប្រជាជន មុខពេលបោះឆ្នោតប្រធានាធិបតីនៅអាមេរិក»។ នេះបើតាមការបញ្ជាក់របស់លោក កូណូ នៅថ្ងៃទី៩ ខែកញ្ញា ដែលផ្សាយដោយទីភ្នាក់ងារព័ត៌មាន Kyodo ។

ប្រសិនគ្មានការប្រែប្រួលទេ ការបោះឆ្នោតជ្រើសរើសប្រធានបក្ស ប្រជាធិបតេយ្យសេរី (LDP) នឹងធ្វើឡើងនៅថ្ងៃទី១៤ ខែកញ្ញា និងការបោះឆ្នោតជ្រើសរើសនាយករដ្ឋមន្ត្រីជប៉ុននៅសភា នឹងធ្វើនៅថ្ងៃទី១៦ ខែកញ្ញាខាងមុខ។ បេក្ខជនប្រជែងតំណែងនេះ មាន៣រូបដូចជា លោក លោក យូស៊ីហ៊ីដេ ស៊ូហ្កា ប្រធានលេខាធិការដ្ឋានគណៈរដ្ឋមន្ត្រី, លោកស៊ីហ្កេរូ អ៊ីស៊ីបា អតីតរដ្ឋមន្ត្រីការពារជាតិ និងលោកហ្វូមីអូ គីស៊ីដា អតីតរដ្ឋមន្ត្រីការបរទេស។

ក្នុងការជ្រើសរើសនាយករដ្ឋមន្ត្រីជប៉ុនថ្មីនេះ ប្រធានបក្សប្រជាធិបតេយ្យសេរី មានភាគរយខ្ពស់ក្នុងការកាន់តំណែងនេះ ដោយសារសម្លេងរបស់បក្សនៅសភាតំណាងរាស្ត្រ មានគ្រប់គ្រាន់។ នាយករដ្ឋមន្ត្រីថ្មី នឹងកាន់តំណែងដែលនៅសល់ ពីនាយករដ្ឋមន្ត្រី លោកស៊ិនហ្សូ អាបេ ពោលគឺត្រូវកាន់តំណែងដល់ខែកញ្ញា ឆ្នាំ២០២១ខាងមុខ។

តាមប្រភពព័ត៌មានខាងលើ នាយករដ្ឋមន្ត្រីថ្មី អាចនឹងស្នើឲ្យមានការបោះឆ្នោតថ្នាក់ជាតិមុនអាណត្តិ ដើម្បីទាញយកប្រជាប្រិយភាព ក្នុងអំឡុងពេលផ្លាស់ប្តូរមេដឹកនាំជប៉ុននេះ។ យ៉ាងណាមិញ គណបក្ស Komeito ដែលជាដៃគូក្នុងសភារបស់បក្ស LDP ប្រកាសជំហរមិនចង់ឲ្យមាការបោះឆ្នោតមុនអាណត្តិឡើយ។

សូមបញ្ជាក់ថា នាយករដ្ឋមន្ត្រីជប៉ុន លោកស៊ិនហ្សូ អាបេ បានប្រកាសលាលែងពីតំណែងជានាយករដ្ឋមន្ត្រីក្រោមហេតុផលជំងឺដំបៅក្រពះ។ ប៉ុន្តែលោកអាបេ នៅតែបន្តកាន់តំណែងជានាយករដ្ឋមន្ត្រីសិន រហូតដល់មានអ្នកមកស្នងតំណែងរបស់លោក៕