ប្រជាជនកម្ពុជារាប់ពាន់នាក់ មកពីភូមិចំនួន៣ អាចរស់នៅដោយមានសុវត្ថិភាព និងសុខភាពល្អប្រសើរជាងមុន បន្ទាប់ពីទទួលបានទឹកស្អាតប្រើប្រាស់ តាមរយៈការទទួលបានបច្ចេកវិទ្យាបន្សុទ្ធទឹក ក្រោមគំនិតផ្ដួចផ្ដើម 20by2020 របស់អេមីរ៉ាតអារ៉ាប់រួម។ គំនិតផ្ដួចផ្ដើមនេះ ជាផ្នែកមួយនៃពានរង្វាន់ Zayed Sustainability Prize ដែលបង្កើតនៅឆ្នាំ២០០៨ ។
ប្រជាជនចំនួន ៤,៤០០នាក់ ដែលទទួលបានទឹកស្អាត និងមានសុវត្ថិភាពប្រើប្រាស់ជាលើកដំបូង រស់នៅក្នុងភូមិឆ្នុកទ្រូ កំពង់ព្រះ និងសេះស្លាប់។ ឧបករណ៍បន្សុទ្ធទឹកដែលប្រើប្រាស់ថាមពលពន្លឺព្រះអាទិត្យនេះ ត្រូវបានបំពាក់ដោយក្រុមហ៊ុនបារាំង Safe Water Cube ដែលជាក្រុមហ៊ុនជាប់បេក្ខភាពចុងក្រោយផ្នែកទឹក នៃពានរង្វាន់ Zayed Sustainability Prize របស់ប្រទេសអេមីរ៉ាត់អារ៉ាប់រួម។
ពានរង្វាន់ Zayed Sustainability Prize បានបញ្ជាក់ក្នុងសេចក្ដីប្រកាសព័ត៌មានថា បច្ចេកវិទ្យាដែលបំពាក់នៅកម្ពុជានេះ ជួយឲ្យទឹកដែលចេញពីប្រភពនានា ដូចជាស្ទឹង បឹង ត្រពាំង អាចពិសាបាន តាមរយៈការបំបាត់វីរុស និងបាក់តេរី ដែលបង្កទៅជំងឺរាករូស រាកមួល គ្រុនចាញ់ និងរលាកថ្លើមជាដើម។ ឧបករណ៍ដែលត្រូវបានបំពាក់នេះ អាចបន្សុទ្ធទឹកដល់ទៅមួយពាន់លីត្រក្នុងមួយម៉ោង ដោយមិនត្រូវបានថាមពល ឬការថែទាំង ឬសាធាតុគីមីជំនួយឡើយ។
ក្រោមគំនិតផ្ដួចផ្ដើម 20by2020 សហគមន៍ខាងលើ និងសាលាឆ្នុកទ្រូ ព្រមទាំងមណ្ឌលសុខភាពផងនោះ អាចទទួលបានទឹកស្អាត ចៀសវាងការឆ្លងជំងឺផ្សេងៗដែលកើតចេញពីការពិសាទឹកកខ្វក់។ វាក៏ផ្ដល់ឱកាសថ្មី សម្រាប់ការទទួលបានអនាម័យ ពិសេសការមានទឹកស្អាតដើម្បីលាងដៃ សំដៅបង្ការការឆ្លងជំងឺ COVID-19 ដែរ។
រដ្ឋមន្ត្រីឧស្សាហកម្ម និងបច្ចេកវិទ្យាជឿនលឿនអេមីរ៉ាតអារ៉ាប់រួម និងជានាយក Zayed Sustainability Prize លោកបណ្ឌិត Sultan Al Jaber និយាយថា បច្ចេកវិទ្យាបន្សុទ្ធទឹកដ៏មាននវានុវត្តន៍នេះ មានឥទ្ធិពលវិជ្ជមានលើសុខភាព និងការរស់នៅរបស់ប្រជាជនកម្ពុជា នៅតាមជនបទ។ លោកបន្តថា៖ «តាមរយៈគំនិតផ្ដួចផ្ដើម 20by2020 យើងកំពុងបង្កើនអនុភាពដំណោះស្រាយ ប្រកបដោយចីរភាពរបស់អ្នកឈ្នះ និងបេក្ខជនវគ្គចុងក្រោយ នៃពានរង្វាន់ Zayed Sustainability Prize ក្នុងការជួយជីវិតជាច្រើន នៅលើពិភពលោក។»
លោក លឹម គានហោ រដ្ឋមន្ត្រីធនធានទឹក និងឧតុនិយម និងជាប្រធានអាជ្ញាធរទន្លេសាបកម្ពុជា បានស្វាគមន៍គំនិតផ្ដួចផ្ដើម 20by2020 ដែលវិភាគទានរបស់គំនិតផ្ដួចផ្ដើមនេះ ស្របតាមគោលដៅយុទ្ធសាស្ត្ររបស់អាជ្ញាធរទន្លសាប ដើម្បីជំរុញការទទួលបានស្អាតបរិភោគ នៅទីដាច់ស្រយាល នៅជុំវិញទន្លេសាប។ លោកបាន អរគុណពានរង្វាន់ខាងលើ និងដៃគូនៃគំនិតផ្ដួចផ្ដើម ដែលបានផ្ដល់ដំណោះស្រាយច្នៃប្រឌិតបែបនេះ។
ការទទួលបានទឹកស្អាតបរិភោគ ជាគោលដៅមួយ ក្នុងចំណោមគោលដៅទាំង១៧របស់គោលដៅអភិវឌ្ឍដោយចីរភាព របស់អង្គការសហប្រជាជាតិ។ នៅកម្ពុជា ការទទួលបានទឹកស្អាត នៅតែជាបញ្ហាប្រឈមមួយ ដោយប្រជាជនជាច្រើនខ្វះខាតទឹកស្អាត។ ជាមួយគម្រោងរបស់គំនិតផ្ដួចផ្ដើម 20by2020 វានឹងក្លាយជាជំហានដ៏សំខាន់ សម្រាប់ភូមិទាំង៣ ក្នុងការទទួលទឹកស្អាត៕
(អត្ថបទពាណិជ្ជកម្ម)