COVID-19
អន្តរជាតិ
កូវីដ-១៩នៅអាមេរិក លើស៩លានករណី ខណៈពិភពលោកមានជាង៤៥,៥លានករណី
× គិតត្រឹមថ្ងៃទី ៣១ ខែតុលា សហរដ្ឋអាមេរិក មានករណីឆ្លងកូវីដ-១៩ លើស៩លានករណីហើយ ខណៈករណីឆ្លង បន្តកើនឡើងស្ទើរគ្រប់រដ្ឋទាំងអស់ក្នុងប្រទេសនេះ។ ចំណែក កូវីដ-១៩នៅទូទាំងពិភពលោកឡើងដល់ ៤៥,៥លានករណី។
យោងតាមទិន្នន័យរបស់សកលវិទ្យាល័យ Johns Hopkins សហរដ្ឋអាមេរិក រកឃើញជំងឺកូវីដ-១៩សរុប១លានករណី ក្នុងពេលត្រឹមតែ ២សប្ដាហ៍ចុងក្រោយប៉ុណ្ណោះ ដែលជាការហាក់ឡើងលឿនបំផុតមួយ ខណៈជំងឺកូវីដ-១៩ កើនពី៧-៨លានករណី ត្រូវការពេលរហូតដល់ជាង៣សប្ដាហ៍។
ករណីឆ្លងកូវីដ-១៩ ដែលត្រូវបានរកឃើញទាំងនេះ បន្តកើនឡើងក្នុង៤៧រដ្ឋរបស់សហរដ្ឋអាមេរិក ចំណែកករណីស្លាប់វិញ កើនឡើង១៤ភាគរយក្នុងពេល១៤ថ្ងៃចុងក្រោយ ដែលតួលេខមធ្យមជាង៨០០នាក់ក្នុងមួយថ្ងៃ។ បច្ចុប្បន្ន ជំងឺកូវីដ-១៩ បានសម្លាប់ពលរដ្ឋអាមេរិកជាង២២៩ ០០០នាក់ហើយ។
ករណីឆ្លងកូវីដ-១៩ ក៏បានហក់ឡើងខ្ពស់ផងដែរ សម្រាប់២ថ្ងៃជាប់គ្នានេះ។ ជាក់ស្ដែង កាលពីថ្ងៃសុក្រ ទី ៣០ ខែតុលា សហរដ្ឋអាមេរិក រកឃើញអ្នកឆ្លងកូវីដ-១៩រហូតដល់ ៩៤ ០០០នាក់ក្នុងពេល២៤ម៉ោង ។ នេះបើតាមសកលវិទ្យាល័យ Johns Hopkins ។
ខណៈសហរដ្ឋអាមេរិក បានរងគ្រោះការងើបឡើងខ្លាំងជាថ្មីនៃជំងឺកូវីដ-១៩ ចាប់តាំងពីពាក់កណ្ដាល ខែតុលាមក ការបោះឆ្នោតជ្រើសរើសប្រធានាធិបតីអាមេរិក នៅសស់តែ៤ថ្ងៃទៀតប៉ុណ្ណោះ។ ពលរដ្ឋអាមេរិកជាង៨០លាននាក់ហើយបានបោះឆ្នោតរួចរាល់។
គិតត្រឹមថ្ងៃទី៣១ ខែតុលា ពិភពលោក មានករណីឆ្លងកូវីដ-១៩សរុប៤៥,៥លានករណី ក្នុងនោះ ៣០,៦លាននាក់ ជាសះស្បើយ ខណៈ១,១៩បាត់បង់ជីវិតដោយសារជំងឺនេះ។ បច្ចុប្បន្ន ទ្វីបអឺរ៉ុប ជាតំបន់រងគ្រោះខ្លាំងបំផុតដោយសារជំងឺកូវីដ-១៩ ខណៈបារាំង និងអាល្លឺម៉ង់ ជាដើម ផ្ដើមដាក់ប្រទេសក្នុងគ្រាអាសន្នឡើងវិញដើម្បីទប់ទល់ការរាតត្បាត៕
© រក្សាសិទ្ធិដោយ thmeythmey.com