ជាតិ
សង្គមជាតិ
ត្រាំ ទូលព្រះមហាក្សត្រថា អាមេរិក នៅតែជួយលើកកម្ពស់សន្តិភាពនិងវិបុលភាពនៅកម្ពុជា រូបពី AFP
× ប្រធានាធិបតីអាមេរិក លោក ដូណាល់ ត្រាំ បានសរសេរលិខិតថ្វាយព្រះករុណា ព្រះបាទសម្តេចព្រះបរមនាថ សីហមុនី ដើម្បីចូលរួមអបអរសាទរបុណ្យរម្លឹកខួប៦៧ឆ្នាំនៃការទទួលបានឯករាជ្យជាតិ។ នៅថ្ងៃទី៩ ខែវិច្ឆិកា ឆ្នាំ២០២០ កម្ពុជា ប្រារព្ធពិធីបុណ្យឯករាជ្យជាតិលើកទី៦៧។
ក្រៅពីអបអរសាទរបុណ្យឯករាជ្យជាតិ លោកប្រធានាធិបតី បានរំលេចសារក្នុងន័យបន្តជួយកម្ពុជា ជាពិសេសពាក់ព័ន្ធនឹងសន្តិភាព។ ក្នុងលិខិត ចុះថ្ងៃទី២ ខែវិច្ឆិកា ឆ្នាំ២០២០ លោកប្រធានាធិបតី ទូលព្រះមហាក្សត្រថា៖«អាមេរិក នៅតែប្តេជ្ញាចិត្តក្នុងការជួយលើកកម្ពស់សន្តិភាព [នៅកម្ពុជា] និងវិបុលភាពរបស់ប្រជាជនកម្ពុជា»។
ជាមួយគ្នានេះ ប្រធានាធិបតីនៃប្រទេសមហាអំណាចរូបនេះ ថ្វាយព្រះពរដល់ព្រះមហាក្សត្រឲ្យព្រះអង្គ មានព្រះរាជសុខភាពបរិបូរ ហើយក៏បានជូនពរឲ្យប្រជាជនកម្ពុជាគ្រប់រូប មានសុខភាពល្អផងដែរ។
លោក ម៉ៃ ប៉ុមប៉េអូ (Mike Pompeo) រដ្ឋមន្ត្រីការបរទេសអាមេរិក ក៏បានអបអរសាទរបុណ្យឯករាជ្យជាតិកម្ពុជាលើកទី៦៧ដែរ តាមរយៈសេចក្តីថ្លែងការណ៍របស់លោក កាលពីថ្ងៃទី៦ ខែវិច្ឆិកា ឆ្នាំ២០២០។ ប្រមុខការទូតអាមេរិក សរសេរថា៖«[…] យើង ទន្ទឹងរង់ចាំការឈានទៅមុខបន្ថែមទៀតនៃចំណងការទូតកម្ពុជា-អាមេរិក ដើម្បីជួយកសាងកម្ពុជា ឲ្យកាន់តែមានវិបុលភាព ប្រជាធិបតេយ្យ និង ឯករាជ្យកម្ពុជា»។
ក្នុងពិធីបុណ្យឯករាជ្យជាតិកម្ពុជា កាលពីឆ្នាំ២០១៩កន្លងទៅ លោកប្រធានាធិបតី ដូណាល់ ត្រាំ និងលោកប្រមុខការទូត ម៉ៃ ប៉ុមប៉េអូ ក៏បានផ្ញើសារអបអរសាទរ ដូចឆ្នាំ២០២០នេះដែរ។
ប្រទេសជាមិត្តផ្សេងទៀត ដូចជា វៀតណាម ជាដើម ក៏បានថ្វាយសារដល់ព្រះមហាក្សត្រនិងមេដឹកនាំកម្ពុជាដែរ ដើម្បីអបអរសាទរបុណ្យឯករាជ្យជាតិលើកទី៦៧។
នៅថ្ងៃទី៩ ខែវិច្ឆិកា មិនមែនគ្រាន់តែជាថ្ងៃបុណ្យឯករាជ្យជាតិទេ តែក៏ថ្ងៃរម្លឹកខួបនៃការបង្កើតកងយោធពលខេមរភូមិន្ទដែរ។ មកដល់ឆ្នាំ២០២០នេះ ការទទួលបានឯករាជ្យពីបារាំងនិងការបង្កើតកងយោធពលខេមរភូមិន្ទ គឺមានរយៈពេល៦៧ឆ្នាំដូចគ្នា៕
Tag:
កម្ពុជា-អាមេរិក
ព្រះមហាក្សត្រ
ត្រាំ
បុណ្យឯករាជ្យ
© រក្សាសិទ្ធិដោយ thmeythmey.com