ជាតិ
សង្គមជាតិ
ក្រសួងទេសចរណ៍ឲ្យផ្អាកអាជីវកម្មបណ្តោះអាសន្នក្លឹបហាត់ប្រាណទាំងក្នុង និងក្រៅសណ្ឋាគារ រូបភាពក្លឹបហាត់ប្រាណ
× ភ្នំពេញ៖ ក្រសួងទេសចរណ៍បានណែនាំឲ្យម្ចាស់អាជីវកម្មក្លឹបហាត់ប្រាណទាំងក្នុង និងក្រៅសណ្ឋាគារទូទាំងរាជធានីខេត្តផ្អាកដំណើរការអាជីវកម្មមួយរយៈសិន ដើម្បីទប់ស្កាត់ការរាតត្បាតជំងឺកូវីដ-១៩តាមការណែនាំរបស់ក្រសួងសុខាភិបាល។ នេះបើយោងតាមលិខិតដែលក្រសួងទេសចរណ៍ផ្ញើទៅគណៈអភិបាលរាជធានីខេត្តនាថ្ងៃទី១១ ខែវិច្ឆិកា។
រោងភាពយន្ត សារមន្ទីរជាតិ ខារ៉ាអូខេ(KTV) មណ្ឌលកម្សាន្ត ម៉ាស្សា និងក្លឹបហាត់ប្រាណនៅទូទាំងប្រទេសក៏ក្រសួងសុខាភិបាលផ្អាកឲ្យដំណើរការផងដែរ។
គិតត្រឹមថ្ងៃទី១១ ខែវិច្ឆិកានេះ ទីតាំងខារ៉ាអូខេ១០៩កន្លែង បៀរហ្គាឌិន២១ទីតាំង ម៉ាស្សា១៨៥ទីតាំង និងស្ប៉ា៨ទីតាំង ដែលសរុបទាំងអស់មានប្រមាណជាង៣០០កន្លែងនៅរាជធានីភ្នំពេញ បានផ្អាកអាជីវកម្មរបស់ខ្លួនតាមការណែនាំរបស់ក្រសួងសុខាភិបាលនិងក្រសួងទេសចរណ៍។ នេះបើតាមលិខិតស្ថិតិបិទអាជីវកម្មមណ្ឌលកម្សាន្តរបស់មន្ទីរទេសចរណ៍ ដែលចុះលោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ។
រដ្ឋបាលរាជធានីភ្នំពេញក៏បានណែនាំដល់មន្ទីរទេសចរណ៍រាជធានីភ្នំពេញនិងរដ្ឋបាលខណ្ឌទាំង១៤ បន្តបិទ និងឃ្លាំមើលទីតាំងដែលនៅសេសសល់បន្តទៀត។ ចំពោះក្រសួងទេសចរណ៍ក៏ណែនាំអភិបាលរាជធានីខេត្តនីមួយអនុវត្តតាមសមត្ថកិច្ចរបស់ខ្លួនឲ្យមានប្រសិទ្ធភាពក្នុងការចុះណែនាំដល់អាជីវករក្លឹបហាត់ប្រាណនានាផងដែរ។
ដើម្បីទប់ស្កាត់កុំឲ្យជំងឺកូវីដ-១៩ឆ្លងចូលក្នុងសហគមន៍ ក្រសួងអប់រំក៏បានផ្អាកដំណើរការសាលារៀននៅក្នុងរាជធានីភ្នំពេញ និងនៅខេត្តកណ្តាល រួមទាំងសាលាបឋមសិក្សាមួយចំនួននៅខេត្តព្រះសីហនុរយៈពេល២សប្តាហ៍ ក្រោយពីក្រសួងបានរកឃើញថាមាន២៤អង្គភាពបានប្រាស្រ័យទាក់ទងផ្ទាល់ និងប្រយោលជាមួយនឹងលោក Peter Szijjartoនៅថ្ងៃទី៣ ខែវិច្ឆិកាដែលបានផ្ទុកវិជ្ជមានកូវីដ-១៩ នៅពេលលោកបានទៅដល់ប្រទេសថៃ។
បច្ចុប្បន្នក្រសួងសុខាភិបាលបានធ្វើតេស្តអ្នកដែលបានប្រាស្រ័យទាក់ទងផ្ទាល់ និងប្រយោលជាមួយនឹងរដ្ឋមន្ត្រីការបរទេសហុងគ្រីចំនួន១៦៧៦នាក់ ក្នុងចំណោមនោះមានអ្នកឆ្លងជំងឺកូវីដ-១៩ចំនួន៤នាក់ ដោយ១នាក់ជាអង្គរក្សខ្មែរដែលការពាររដ្ឋមន្ត្រីការបរទេសហុងគ្រី ១នាក់ជាតំណាងរាស្ត្រ ១នាក់ជាមន្ត្រីកសិកម្ម និង១នាក់ទៀតជាឯកអគ្គរដ្ឋទូតហុងគ្រីប្រចាំកម្ពុជា៕
Tag:
ក្លឹបហាត់ប្រាណ
កីឡា
© រក្សាសិទ្ធិដោយ thmeythmey.com