COVID-19
អន្តរជាតិ
រូបភាព៖ AP
×![]()
ដោយ: ធៀន ភារិន្ទ
ក្រុមហ៊ុនវេជ្ជសាស្ត្រ Moderna នៅថ្ងៃទី១៦ ខែវិច្ឆិកា បានប្រកាសថា វ៉ាក់សាំងរបស់ខ្លួនមានប្រសិទ្ធភាពចំនួន ៩៤,៥ភាគរយក្នុងការប្រយុទ្ធប្រឆាំងជាមួយកូវីដ-១៩។ លទ្ធផលនេះ ជាទិន្នន័យបឋមដែលបានមកពីដំណាក់កាលចុងក្រោយ ក្នុងការសាកល្បងវ៉ាក់សាំង។ 
Moderna ជាក្រុមហ៊ុនអាមេរិកទី២ ហើយ ដែលបានប្រកាសថាវ៉ាក់សាំងប្រឆាំងកូវីដ-១៩ របស់ខ្លួនមានប្រសិទ្ធភាពលើសពី ៩០ភាគរយ ស្របពេលអាមេរិក កំពុងតែអុកឡុកដោយសារកូវីដ-១៩។ ករណីឆ្លងសរុបរបស់អាមេរិក បានកើនដល់ជាង ១១,៥លានករណី ខណៈអ្នកឆ្លងនៅថ្ងៃទី១៦ ខែវិច្ឆិកា មានជាង ១៥ម៉ឺននាក់។
បើតាមការប្រកាសរបស់ក្រុមហ៊ុនឱសថខាងលើ លទ្ធផលបឋមនេះ ជាលទ្ធផលវិភាគលើអ្នកចូលរួម៩៥នាក់ក្នុងចំណោមអ្នកចូលរួមប្រមាណ៣ម៉ឺននាក់ផ្សេងទៀត។ ក្នុងចំណោមអ្នកទាំង៩៥ មនុស្សចំនួន ៩០នាក់ត្រូវបានផ្តល់ថ្នាំប្រភេទសាកល្បង ខណៈមនុស្ស៥នាក់ផ្សេងទៀត ត្រូវបានចាក់វ៉ាក់សាំងចំនួន ២ដូសក្នុង២៨ថ្ងៃ។ លទ្ធផលមនុស្ស៥នាក់នេះ បានបង្ហាញថា វ៉ាក់សាំងមានប្រសិទ្ធភាពចំនួន ៩៤,៥ភាគរយ។
«យើងនឹងមានវ៉ាក់សាំង ដែលអាចបញ្ឈប់កូវីដ-១៩»។ ប្រធានក្រុមហ៊ុនModerna លោក Stephen Hoge បានលើកឡើងបែបនេះ។ ចំណែកលោកវេជ្ជបណ្ឌិត Anthony Fauci អ្នកជំនាញជំងឺឆ្លងអាមេរិកវិញ បានសាទរថា វ៉ាក់សាំងនេះ គឺសំខាន់ណាស់ នៅក្នុងពេលអាមេរិកស្ថិតក្នុងស្ថានភាពលំបាក។ បើទោះបីមានដំណឹងល្អបែបនេះក៏ដោយ ក៏អ្នកជំនាញជំងឺឆ្លងរូបនេះ នៅតែទទូចឲ្យប្រជាជនលាងដៃ និងប្រុងប្រយ័ត្នដដែល។
តាមការចុះផ្សាយរបស់ទីភ្នាក់ងារព័ត៌មាន Reuters វ៉ាក់សាំងរបស់ក្រុមហ៊ុន Moderna គឺខុសពីវ៉ាក់សាំងរបស់ក្រុមហ៊ុន Pfizer ដោយសារវាអាចផ្ទុកក្នុងសីតុណ្ណភាពធម្មតាបាន។ បើតាមការរំពឹងរបស់ក្រុមហ៊ុន Moderna វ៉ាក់សាំង អាចមានស្ថានភាពល្អនៅក្នុងសីតុណ្ណភាពចាប់ពី២ ទៅ ៨អង្សារសេ ក្នុងរយៈពេល ៣០ថ្ងៃ។ លើសពីនេះ វាអាចស្តុកទុករហូតដល់ ៦ខែ ក្នុងសីតុណ្ណភាព ដក២០ អង្សារសេ។
ប៉ុន្តែលក្ខខណ្ឌទាំងនេះ មិនអាចប្រើប្រាស់បានឡើយ តាមការដឹកជញ្ជូនតាមនាវា។ តាមការបញ្ជាក់របស់Moderna វ៉ាក់សាំង ត្រូវតែក្លាសេក្នុងសីតុណ្ណភាព ដក៧០អង្សាសេសម្រាប់ការដឹកជញ្ជូនតាមនាវា។ វាអាចស្តុកទុកបានរហូតដល់ ៥ថ្ងៃ នៅថ្ងៃក្នុងសីតុណ្ណភាព ដែលមានស្តង់ដារមួយ និងអាចរក្សាគុណភាព បានរហូតដល់ ១៥ថ្ងៃ ប្រសិនទុកក្នុងប្រអប់ ដែលមានវេចខ្ចប់ត្រឹមត្រូវ។
បើទោះបីជាមានលក្ខណៈខុសគ្នាមួយចំនួនក្តី ប៉ុន្តែវ៉ាក់សាំងរបស់ក្រុមហ៊ុនModerna និងក្រុមហ៊ុន Pfizer បានអភិវឌ្ឍជាមួយបច្ចេកវិទ្យាថ្មី mRNA ដែលមានប្រសិទ្ធភាពខ្ពស់ ក្នុងការទប់ស្កាត់កូវីដ-១៩ ខណៈពេលពិភពលោក កើនករណីឆ្លងសរុបដល់ជាង៥៥,៣ លានករណី និងអ្នកស្លាប់មានជាង ១,៣៣លាននាក់។
ទាក់ទិននឹងការផលិតវ៉ាក់សាំងនេះ ក្រុមហ៊ុនModerna រំពឹងថា ខ្លួននឹងអាចផលិតវ៉ាក់សាំង បានចំនួន២០លានដូស សម្រាប់អាមេរិកនៅក្នុងឆ្នាំនេះ ខណៈចំនួនវ៉ាក់សាំងជាច្រើនលានដូស ត្រូវបានក្រុមហ៊ុនផលិតរួចហើយ និងកំពុងរង់ចាំការផ្តល់អាជ្ញាបណ្ណពីទីភ្នាក់ងារសហព័ន្ធនៃរដ្ឋបាលឱសថ និងអាហារ(FDA)៕
Tag:
វ៉ាក់សាំង
កូវីដ-១៩
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
