រុស្ស៊ី នឹងបង្កើតមូលដ្ឋានកងទ័ពនៅស៊ូដង់ ដើម្បីបង្កើនឥទ្ធិពលនៅអាហ្វ្រិក

អន្តរជាតិ

រុស្ស៊ី នឹងបង្កើតមូលដ្ឋានកងទ័ពនៅស៊ូដង់ ដើម្បីបង្កើនឥទ្ធិពលនៅអាហ្វ្រិក

17, Nov 2020 , 7:29 pm

រូបភាព

នាវាចម្បាំងរុស្ស៊ី។ រូបភាព៖ CNN

ដោយ:

ប្រធានាធិបតីរុស្ស៊ីលោក វ្ល៉ាឌីមៀ ពូទីន នៅថ្ងៃទី១៦ វិច្ឆិកាយល់ព្រមឲ្យបង្កើតមូលដ្ឋានកងទ័ពជើងទឹករុស្ស៊ីនៅស៊ូដង់ ដែលមានសមត្ថភាពក្នុងការផ្ទុកនាវាដែលដំណើរការដោយថាមពលនុយក្លេអ៊ែរ។ មូលដ្ឋានកងទ័ពរបស់រុស្ស៊ីថ្មីនេះ នឹងបើកផ្លូវឲ្យមហាអំណាចនេះពង្រីកឥទ្ធិពលរបស់ខ្លួននៅទ្វីបអាហ្វ្រិក ក្រោយអវត្តមានជាច្រើនឆ្នាំនៅក្នុងតំបន់នេះ។

ក្នុងក្រឹត្យដែលនឹងចុះហត្ថលេខាដោយលោក វ្ល៉ាឌីមៀ ពូទីន ផ្ទាល់ លោកប្រធានាធិបតីអនុញ្ញាតឲ្យរដ្ឋាភិបាលរុស្ស៊ីលើកជាសំណើក្នុងការបង្កើតមូលដ្ឋានយោធារុស្ស៊ីនៅស៊ូដង់ និងបញ្ជាឲ្យក្រសួងការពារជាតិរុស្ស៊ីចុះហត្ថលេខាជាមួយរដ្ឋាភិបាលស៊ូដង់ដើម្បីឲ្យមូលដ្ឋានយោធានេះលេចចេញជារូបរាង។

មូលដ្ឋានកងទ័ពជើងទឹករបស់រុស្ស៊ីនៅអាហ្វ្រិកនេះ នឹងសាងសាងនៅជាយទីក្រុងព័រស៊ូដង់ នឹងមានសមត្ថភាពផ្ទុកកងទ័ព និងមន្ត្រីយោធាច្រើនជាង៣០០នាក់។ មូលដ្ឋាននេះ នឹងបង្កើនសមត្ថភាពរបស់រុស្ស៊ីក្នុងប្រតិបត្តិការនៅសមុទ្រឥណ្ឌាផងដែរ។ មូលដ្ឋាននេះ មានសមត្ថភាពផ្ទុកនាវាច្រើនជាង៤គ្រឿង ហើយនឹងប្រើប្រាស់សម្រាប់ការជួសជុល និងផ្គត់ផ្គង់សម្រាប់ប្រតិបត្តិការនាវាជើងទឹករុស្ស៊ី។

ស៊ូដង់ដែលប្រទេសម្ចាស់ផ្ទះ នឹងមិនយកថ្លៃឈ្នួលក្នុងការបង្កើតមូលដ្ឋានយោធានេះឡើយ។ បន្ថែមពីនេះទៅទៀតរុស្ស៊ីមានសិទ្ធិក្នុងការនាំចូលអាវុធ គ្រាប់កាំភ្លើង និងសម្ភារចាំបាច់តាមរយៈព្រលានយន្តហោះ និងកំពង់ផែដើម្បីទ្រទ្រង់ដល់មូលដ្ឋានយោធាថ្មីនេះ។ នេះបើយោងតាមទីភ្នាក់ងារព័ត៌មាន Reuters។

នៅមិនឆ្ងាយពីស៊ូដង់ រុស្ស៊ីក៏មានមូលដ្ឋានដែលមានលក្ខណៈដូចគ្នានេះដែរនៅកំពង់ផែ Tartus ប្រទេសស៊ីរី។ នៅទីនោះ រុស្ស៊ីមានមូលដ្ឋានទ័ពអាកាស។ ទ្វីបអាហ្វ្រិកដែលមានប្រទេសចំនួន៥៤ ក្លាយទៅជាទីតាំងយុទ្ធសាស្ត្រសម្រាប់រុស្ស៊ីក្នុងការបង្កើនឥទ្ធិពលរបស់ខ្លួនដោយសារសម្បូរទៅដោយធនធានរ៉ែ និងអាចជាទីផ្សារដ៏មានសក្ដានុពលសម្រាប់រុស្ស៊ីក្នុងការលក់អាវុធដែរ។

ទីភ្នាក់ងារព័ត៌មានរដ្ឋរុស្ស៊ី TASS រាយការណ៍ថា មូលដ្ឋានយោធានៅស៊ូដង់នេះ នឹងសម្រួលដល់កងទ័ពជើងទឹករុស្ស៊ីសម្រាប់ប្រតិបត្តិការក្នុងសមុទ្រឥណ្ឌា ដោយអនុញ្ញាតឲ្យនាវាធ្វើដំណើរបានរយៈចំងាយឆ្ងាយ។ លើសពីនេះ រុស្ស៊ីអះអាងថា មូលដ្ឋាននេះ នឹងការពារដោយប្រព័ន្ធការពារដែនអាកាសដែលនឹងបង្កើតតំបន់គ្មានការហោះហើររាប់គីឡូម៉ែត្រនៅជុំវិញបន្ទាយ។

សូមបញ្ជាក់ថា បណ្តាប្រទេសក្នុងទ្វីបអាហ្វ្រិកមួយចំនួន បានក្លាយទៅជាទីតាំងយុទ្ធសាស្ត្រសម្រាប់ប្រទេសមហាអំណាចក្នុងការការពារផលប្រយោជន៍របស់ខ្លួន ក៏ដូចជាពង្រីកឥទ្ធិពលនៅទ្វីបមួយនេះ។ ជាក់ស្តែងវត្តមានរបស់រុស្ស៊ីនៅស៊ូដង់ នឹងបើកផ្លូវឲ្យប្រទេសនេះប្រកួតប្រជែងពង្រីកឥទ្ធិពល ក៏ដូចជាទីផ្សារទល់នឹងចិន និងបារាំង។

ជាសញ្ញាពង្រឹងឥទ្ធិពលនៅអាហ្វ្រិក នៅឆ្នាំ២០១៩ រុស្ស៊ីនិងប្រទេសអាហ្វ្រិកចំនួន៤៣ បានបើកកិច្ចប្រជុំកំពូលរុស្ស៊ី-អាហ្វ្រិកលើទី១ នៅទីក្រុងSochi ប្រទេសរុស្ស៊ី និងលើកទី២នៅអាហ្វ្រិកខាងត្បូងដែលពេលនោះរុស្ស៊ីបានបង្ហាញបណ្តារថ្នាក់ដឹកនាំអាហ្វ្រិកនូវនាវាចម្បាំងដើរដោយថាមពលនុយក្លេអែរ៕