ភ្នំពេញ៖ ក្រសួងសុខាភិបាល ប្រាប់ឱ្យអាជ្ញាធរមូលដ្ឋានគ្រប់រាជធានី-ខេត្ត ពង្រឹងការគ្រប់គ្រងចត្តាឡីស័ក និងការអនុវត្តវិធានការសុខភាពសាធារណៈ ដើម្បីទប់ស្កាត់ជំងឺកូវីដ-១៩។ នេះបើតាមសេចក្ដីជូនដំណឹងរបស់ក្រសួងសុខាភិបាល កាលពីថ្ងៃទី៧ ធ្នូ ដោយបញ្ជាក់ថា ចំពោះអ្នកមកពីបរទេស គឺមិនមានការលើកលែង និងមិនអនុញ្ញាតឱ្យមានការធានាធ្វើចត្តាឡីស័កខ្លីឡើយ។
ក្រសួងសុខាភិបាល បានបញ្ជាក់ថា «ព្រឹត្តិការណ៍សហគមន៍២៨ វិច្ឆិកា» គឺជាការឆ្លងវីរុសកូវីដ-១៩ ចូលក្នុងសហគមន៍ជាចង្កោម និងតាមកន្លែងមួយៗ ដែលមានហានិភ័យខ្ពស់ គួរឱ្យបារម្ភសម្រាប់ប្រទេសកម្ពុជា។ ដូច្នេះដើម្បីទប់ស្កាត់ ការចម្លងក្នុងសហគមន៍ ក្នុងទ្រង់ទ្រាយធំ ដែលអាចនឹងកើតមានឡើងក្នុងពេលណាមួយ អភិបាលនៃគណៈអភិបាលរាជធានី-ខេត្តទាំងអស់ ត្រូវយកចិត្តទុកដាក់ខ្ពស់ជាបន្តទៀត ក្នុងការគ្រប់គ្រងអ្នកធ្វើចត្តាឡីស័ក ចំនួន១៤ថ្ងៃ។
ក្រសួងសុខាភិបាល បង្គាប់ឲ្យអាជ្ញាធរទាំងអស់ ត្រូវគ្រប់គ្រងអ្នកដំណើរចូលមកកម្ពុជា តាមច្រកដីគោក ទឹក និងអាកាស តាមច្រកអន្តរជាតិ និងតាមច្រករបៀង ឱ្យបានហ្មត់ចត់ជាទីបំផុត។ ជាពិសេសត្រូវអប់រំផ្សព្វផ្សាយ និងបន្តការក្រើនរំលឹកអំពីការអនុវត្តវិធានការបង្ការជំងឺកូវីដ-១៩ ។
មិនតែប៉ុណ្ណោះអាជ្ញាធរ ត្រូវពង្រឹងវិធានការសំខាន់ៗ នៃការធ្វើចត្តាឡីស័កតាមសណ្ឋាគារ មណ្ឌលចត្តាឡីស័ក និងនៅទីកន្លែងដែលកំណត់ដោយក្រសួងសុខាភិបាល(ក្នុងករណីចាំបាច់) រយៈពេល១៤ថ្ងៃ ពេញលេញ សម្រាប់គ្រប់គ្រងបុគ្គលដែលតម្រូវឱ្យមានការធ្វើចត្តាឡីស័ក។ ចំពោះអ្នកមកពីបរទេស គឺមិនមានការលើកលែង និងមិនអនុញ្ញាតឱ្យមានការធានាធ្វើចត្តាឡីស័កខ្លីឡើយ ពោលគឺត្រូវធ្វើចត្តាឡីស័ក ឱ្យបានគ្រប់ចំនួន១៤ថ្ងៃ នៅតាមទីតាំងដែលបានកំណត់។ នេះបើតាមក្រសួងដដែល។
បន្ថែមពីនេះ ក្រសួង ក៏ប្រាប់ឲ្យអាជ្ញាធរមូលដ្ឋាន ត្រូវគ្រប់គ្រងឱ្យបានហ្មត់ចត់ ចំពោះការធ្វើចត្តាឡីស័កតាមផ្ទះ និងត្រូវផ្គត់ផ្គង់ប្រាក់ឧបត្ថម្ភ សម្រាប់គ្រួសារដែលធ្វើចត្តាឡីស័ក រយៈពេល១៤ថ្ងៃ នៅក្រោមដែនសមត្ថកិច្ចរបស់ខ្លួន។ ជាពិសេសអប់រំផ្សព្វផ្សាយ ឱ្យបានទូលំទូលាយ ក្នុងសហគមន៍ នូវសារអប់រំសុខភាពរបស់ក្រសួងសុខាភិបាល តាមរយៈអាជ្ញាធរថ្នាក់ក្រោមជាតិ ដោយមានការចូលរួមពីសហគម៍ ដូចជាការផ្សព្វផ្សាយតាមឧគ្ឃោសនស័ព្ទ ការបិទតាំងរូបភាពផ្ទាំងធំ ការចែកចាយខិតប័ណ្ណ ការផ្សព្វផ្សាយតាមទូរទស្សន៍ វិទ្យុ និងបណ្ដាញសង្គមដល់ប្រជាជន ជាពិសេសដល់សហគមន៍ងាយរងគ្រោះ និងសហគមន៍ក្រីក្រជាដើម។
អាជ្ញាធរ ភូមិ ឃុំ ស្រុក សមាគមនារី និងតំណាងសហគមន៍ ក៏ត្រូវតាមមើល និងណែនាំការអនុវត្តគម្លាតសុវត្ថិភាព បុគ្គលពីម្នាក់ទៅម្នាក់ឱ្យបាន១.៥ម៉ែត្រឡើងទៅ នៅតាមទីសាធារណៈនានា រួមទាំងហាមឃាត់ ឬកាត់បន្ថយឱ្យបានជាអតិបរមា នូវការជួបជុំគ្នាក្នុងសង្គម មិនឲ្យលើសពី២០នាក់ ដូចជាការរៀបអាពាហ៍ពិពាហ៍ ពិធីបុណ្យនានា ការជួបជុំក្នុងពិធីបុណ្យជាតិ ពិធីបុណ្យសាសនា ពិធីបុណ្យប្រពៃណី និងពិធីបុណ្យផ្សេងៗ។ ដោយឡែកការប្រគំតន្ត្រី ការដើរលេងជួបជុំ ការបរិភោគអាហារជាមួយមិត្តភ័ក្ដិខាងក្រៅផ្ទះ ការជួបជុំពិធីខួបកំណើត ការធ្វើពិធីឡើងផ្ទះ ក្នុងទ្រង់ទ្រាយធំ និងការធ្វើដំណើរកំសាន្តប្រមូលផ្ដុំគ្នាច្រើនជាដើម ក៏ត្រូវកាត់បន្ថយចំនួនមនុស្សដែរ។
សម្រាប់ម្ចាស់អាជីវកម្ម អ្នកគ្រប់គ្រង បុគ្គលិក និងអតិថិជន នៅតាមកន្លែងប្រកបអាជីវកម្មលក់ទំនិញ ឬផ្ដល់សេវាកម្ម ដូចជាផ្សារទំនើប ឱសថស្ថាន ហាងទំនិញ ធនាគារ សណ្ឋាគារ ភោជនីយដ្ឋាន ហាងកាត់សក់ ហាងកែសម្ភស្ស និងសំអាងមុខ-កាយ កន្លែងលក់ដូរ នៅក្នុងផ្សារនានា និងកន្លែងប្រកបអាជីវកម្មផ្សេងៗទៀត ត្រូវអនុវត្តវិធានការពារ ដើម្បីកាត់ផ្ដាច់ខ្សែចម្លងជំងឺកូវីដ-១៩ ចូលក្នុងសហគមន៍ទ្រង់ទ្រាយធំ។
ក្រសួងក៏ក្រើនរំឭកឲ្យប្រជាជនក្នុងសហគមន៍ ត្រូវរក្សាអនាម័យឱ្យបានស្អាតជានិច្ច ដោយលាងដៃជាមួយទឹកស្អាតនិងសាប៊ូ អាល់កុល ឬជែលលាងដៃឱ្យបានញឹកញាប់។ ប្រើប្រាស់ម៉ាស់ឱ្យបានត្រឹមត្រូវជាប្រចាំ(ឬនៅក្នុងករណីចាំបាច់) ឬប្រើកន្សែង ក្រម៉ា ឬក្រដាសជូតមាត់ និងច្រមុះពេលក្អក-កណ្ដាស់។ រីឯចាស់ជរា ជនដែលមានជំងឺប្រចាំកាយ ស្ត្រីមានផ្ទៃពោះ និងកុមារតូចៗជាដើម ចៀសវាងចេញពីផ្ទះ បើមិនចាំបាច់។ ពលរដ្ឋ ក៏មិនត្រូវទៅកន្លែងដែលបិទជិត គ្មានខ្យល់ចេញចូល ហើយប្រើម៉ាស៊ីនត្រជាក់ច្រើន។ ជាពិសេសកន្លែងដែលមានមនុស្សច្រើន ឬការជួបជុំគ្នាច្រើន ដោយកុំនៅជិត ឬក្បែរគ្នា ឬប៉ះពាល់គ្នា ឱបគ្នា កាន់ដៃគ្នា។ មិនតែប៉ុណ្ណោះ ត្រូវប្រើវិធីសំពះគ្នា លើកដៃជាសញ្ញា ឬងក់ក្បាល ហើយត្រូវរក្សាគម្ងាយពីគ្នា មួយម៉ែត្រកន្លះឡើងទៅ។
អាជ្ញាធរពាក់ព័ន្ធទាំងអស់ ត្រូវចាត់តាំងក្រុមការងារតាមដាន និងត្រួតពិនិត្យជាប់ជាប្រចាំ នូវការអនុវត្តវិធានការបង្ការការឆ្លងជាយថាហេតុ នូវកូវីដ-១៩ ដោយអាជីវករ និងអតិថិជនទាំងអស់ត្រូវពាក់ម៉ាស់ ចូលហាងទំនិញ(គ្មានម៉ាស់ហាមចូល)។ ប្រសិនបើម្ចាស់អាជីវកម្ម អ្នកគ្រប់គ្រង និងបុគ្គលិកណាមិនគោរព និងអនុវត្តតាមវិធានការទាំងអស់ខាងលើបានហ្មត់ចត់ នឹងត្រូវផ្អាកអាជីវកម្មជាបណ្ដោះអាសន្ត រហូតដល់មានការការអនុញ្ញាតជាថ្មី។ នេះជាការបង្គាប់របស់ក្រសួងសុខាភិបាល៕