COVID-19
ជាតិ
សាលារាជធានីបន្តចែកសម្ភារបង្ការជំងឺកូវីដ-១៩
× សាលារាជធានីភ្នំពេញបានផ្តល់ជំនួយសម្ភារ និងបរិក្ខារពេទ្យបង្ការការឆ្លងរាលដាលជំងឺកូវីដ-១៩ ដល់មណ្ឌលសុខភាពចាក់អង្រែដែលកំពុងព្យាបាលអ្នកជំងឺកូវីដ-១៩។ ដោយមានការចូលរួមពីដៃគូក្នុងវិស័យឯកជន ដៃគូជាស្ថាប័នអង្គការក្រៅរដ្ឋាភិបាលក្នុងស្រុក និងពីបរទេស ថ្នាក់ដឹកនាំសាលារាជធានីភ្នំពេញបានបន្តចែករំលែកសម្ភារសំខាន់ទាំងនោះ ដល់ប្រជាពលរដ្ឋទូទៅ និងដល់ក្រុមគ្រូពេទ្យ។
លោក នួន ផារ័ត្ន អភិបាលរងសាលារាជធានីភ្នំពេញបាននាំយកសម្ភារ និងបរិក្ខារពេទ្យ ទៅផ្តល់ជូនក្រុមគ្រូពេទ្យដែលប្រចាំការនៅមណ្ឌលសុខភាពចាក់អង្រែដែលកំពុងព្យាបាលអ្នកជំងឺកូវិដ-១៩។ សម្ភារ និងបរិក្ខាពេទ្យដែលមានតម្លៃសរុប ១២០០០ដុល្លារ រួមមាន៖ ម៉ាស៊ីនបាញ់ថ្នាំសម្លាប់វីរុសចល័ត(តូច&ធំ), ម៉ាស៊ីនលាងសម្អាតដៃដោយស្វ័យប្រវត្តិ, ម៉ាស៊ីនវ៉ាស់កម្តៅ, ម៉ាស៊ីនជំនួយការដកដង្ហើម, ម៉ាស៊ីនបាញ់អាល់កុលស្វ័យប្រវត្តិ, ម៉ាស៊ីនកុំព្យូទ័រ និងរួមទាំងម៉ាស់ផង។
លោក នួន ផារ័ត្ន ដែលតំណាងអភិបាលរាជធានីភ្នំពេញ លោក ឃួង ស្រេង បានថ្លែងប្រាប់សារព័ត៌មានថ្មីៗថា ជំនួយនេះត្រូវបានធ្វើឡើងនៅក្នុងក្របខណ្ឌនៃគម្រោងត្រៀមបង្ការ និងឆ្លើយតបចំពោះស្ថានភាពបន្ទាន់របស់សមាគមអភិបាលប្រើប្រាស់ភាសាបារាំង។ លោកអភិបាលរងបានបន្តបញ្ជាក់យ៉ាងដូច្នេះ៖«យើងសង្ឃឹមថា ជំនួយសម្ភារ និងបរិក្ខារពេទ្យទាំងនេះ គឺជាការចូលរួមចំណែកលើកទឹកចិត្ត និងលទ្ធភាពរបស់ក្រុមគ្រូពេទ្យក្នុងការអនុវត្តការងារប្រចាំថ្ងៃរបស់ពួកគេ ក្នុងការងារព្យាបាលអ្នកជំងឺកូវីដ-១៩»។
សាលារាជធានីភ្នំពេញបានចែកចាយសម្ភារបង្ការការឆ្លងរាលដាលជំងឺកូវីដ-១៩ ជាញឹកញាប់ដល់ពលរដ្ឋទូទៅនៅតាមមូលដ្ឋាន ដោយផ្ទាល់ផង និងតាមរយៈអាជ្ញាធរឃុំសង្កាត់ផង។ សាលារាជធានីភ្នំពេញ ក៏តែងអន្តរាគមន៍ និងសម្របសម្រួលឱ្យមានការចូលរួមពីដៃគូអង្គការ និងវិស័យឯកជនផងដែរ ដែលចង់ចូលរួមចំណែកក្នុងការងារទប់ស្កាត់ការឆ្លងរាលដាលនៃជំងឺកូវីដ-១៩ នៅកម្ពុជា៕
© រក្សាសិទ្ធិដោយ thmeythmey.com