«ឆ្នេរតាឃួន» មានខ្សាច់សក្បុសធំល្វឹងល្វើយ និងអាចបោះតង់សម្រាកបាន

ជាតិ

«ឆ្នេរតាឃួន» មានខ្សាច់សក្បុសធំល្វឹងល្វើយ និងអាចបោះតង់សម្រាកបាន

26, Jan 2021 , 7:59 am

រូបភាព

រូបភាពដោយលោក ពិសិដ្ឋ ឌីណា

ដោយ:

ភ្នំពេញ៖ ឆ្នេរតាឃួន មានខ្សាច់សក្បុសធំល្វឹងល្វើយ មានរាងជាថ្នាក់ៗ ជាប់មាត់ទឹក ដែលសាកសមបំផុតសម្រាប់ការបោះតង់សម្រាក និងជាពិសេសសម្រាប់ទេសចរដែលចូលចិត្ត ដើរកម្សាន្តបែបស្ងប់ស្ងាត់។ កោះតាឃួន ស្ថិតក្នុងសហគមន៍អេកូទេសចរណ៍សម្រស់កោះហាន ក្នុងភូមិជាំធំ ឃុំកោះស្នែង ស្រុកបុរីអូរស្វាយសែនជ័យ និងមានចម្ងាយ ២២គីឡូម៉ែត្រពីក្នុងស្ទឹងត្រែង។

ឆ្នេរតាឃួន មានទំហំទទឹងប្រហែល ៧០ម៉ែត្រ និងបណ្តោយប្រហែល ១០០ម៉ែត្រ ដែលបង្ហាញពីឆ្នេរខ្សាច់សក្បុសធំល្វឹងល្វើយ។ ឆ្នេរតាឃួន កំពុងទាក់ទាញចិត្តទេសចរដែលចូលចិត្តការកម្សាន្តបែបស្ងប់ស្ងាត់ ព័ទ្ធជុំវិញដោយធម្មជាតិ ជាពិសេសដើមជ្រៃ ជាច្រើនគុម្ពដែលផ្ដល់ម្លប់ដល់ទេសចរ។ ទឹកទន្លេរាក់ៗ អំណោយផលដល់ទេសចរ ងូតលេងកម្សាន្ត ជាងនេះទៅទៀតទេសចរក៏អាចជិះទូកកៃយ៉ាក់តាមដងទន្លេផងដែរ។ ចំណែកឆ្នេរខ្សាច់វិញ មានរាងជាថ្នាក់ៗ តរៀងគ្នាដែលរំលេចសម្រស់យ៉ាងប្លែកភ្នែកគួរឲ្យទាក់ទាញ សម្រាប់ការថតរូប។ នេះបើតាមទំព័រហ្វេសប៊ុករបស់ក្រសួងទេសចរណ៍។

ទេសចរដែលបោះតង់សម្រាកនៅលើឆ្នេរតាឃួន អាចមើលឃើញថ្ងៃលិច និងថ្ងៃរះ ជះចូលផ្ទៃទឹករំលេចពណ៌មាស។ សត្វស្លាបជាច្រើនក៏បានបង្អួតសម្រស់របស់ខ្លួន ទាក់ទាញចិត្តទេសចរនៅកោះតាឃួននេះដែរ។ សម្រាប់ទេសចរដែលមិនចង់សម្រាកដោយការបោះតង់ សហគមន៍ក៏មានបម្រើសេវាកម្មស្នាក់នៅ ។ ទេសចរក៏អាចពិសាម្ហូប ក្នុងតំបន់ដែលមានការរៀបចំដោយប្រជាជនក្នុងសហគមន៍ផងដែរ។

ទេសចរដែលចង់ទៅកម្សាន្តនៅឆ្នេរតាឃួន អាចធ្វើដំណើរ តាមផ្លូវជាតិលេខ ៩ ដោយឆ្លងកាត់តាមស្ពានមេគង្គ ប្រហែល២៥ គីឡូម៉ែត្រ ដោយប្រើមធ្យោបាយ ឡាន ម៉ូតូ និងកាណូត ទេសចរនឹងទៅដល់ សហគមន៍អេកូទេសចរណ៍សម្រស់កោះហាន៕