ភ្នំពេញ៖ អង្គការអ្នកកាសែតគ្មានព្រំដែន និងសម្ព័ន្ធអ្នកកាសែតកម្ពុជា (Camboja) ស្នើឱ្យអាជ្ញាធរដោះលែង និងទម្លាក់បទចោទលោក សុវណ្ណ រិទ្ធី ចាងហ្វាងTVFB ដែលរងបទចោទបទញុះញង់ឱ្យប្រព្រឹត្តបទល្មើសជាអាទិ៍ តាមមាត្រា ៤៩៥ ។ លោក សុវណ្ណ រិទ្ធី ត្រូវបានសមត្ថកិច្ចចាប់ខ្លួន ពាក់ព័ន្ធនឹងការសរសេរលើហ្វេសប៊ុកដោយស្រង់ពាក្យសម្តីសម្ដេច ហ៊ុន សែន ដែលបាននិយាយថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ» រួមទាំងមានការបកស្រាយនៅក្នុងវីដេអូទៀតផង។
អង្គការអ្នកកាសែតគ្មានព្រំដែន ទាមទារឱ្យអាជ្ញាធរដោះលែងលោក សុវណ្ណ រិទ្ធី ដែលស្រង់សម្តីនាយករដ្ឋមន្ត្រី ហ៊ុន សែន ចុះផ្សាយនេះ ជាបន្ទាន់ ។ ជាពិសេសអនុញ្ញាតឱ្យអង្គភាពTVFB និង FBTV ដែលត្រូវបានលុបអាជ្ញាប័ណ្ណនោះ បើកដំណើរការធម្មតា។
«ការចាប់ខ្លួនអ្នកកាសែតដាក់ពន្ធនាគារ ដោយសារស្រង់សម្តីនាយករដ្ឋមន្ត្រី យកមកចុះផ្សាយនោះ វាមិនមែនជារឿងសមហេតុផលឡើយ»។ នេះជាការលើកឡើងរបស់អង្គការអ្នកកាសែតគ្មានព្រំដែន កាលពីថ្ងៃទី៨ មេសា។
លោក សុវណ្ណ រិទ្ធី ចាងហ្វាងTVFB រងបទចោទបទញុះញង់ឱ្យប្រព្រឹត្តបទល្មើសជាអាទិ៍ តាមមាត្រ ៤៩៥ ពាក់ព័ន្ធនឹងការសរសេរលើហ្វេសប៊ុកដោយស្រង់ពាក្យសម្តីសម្ដេច ហ៊ុន សែន ដែលបាននិយាយថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ» រួមទាំងមានការបកស្រាយនៅក្នុងវីដេអូទៀតផង។ នេះបើតាមលោក ប្លង់ សុផល អយ្យការអមសាលាដំបូងរាជធានីភ្នំពេញ។
ជុំវិញបញ្ហានេះលោក ណុប វី នាយកប្រតិបត្តិសម្ព័ន្ធអ្នកកាសែតកម្ពុជា ស្នើឱ្យអាជ្ញាធរពិចារណាឡើងវិញ ចំពោះការដាក់បទចោទលើលោក សុវណ្ណ រិទ្ធី នេះ ពោលគឺមិនត្រូវមានការចាប់ខ្លួនបែបនេះទេ ប៉ុន្តែអាជ្ញាធរអាចស្នើឱ្យមានការកែតម្រូវរាល់ការចុះផ្សាយវិញ តាមច្បាប់ស្តីពីសេរីភាពសារព័ត៌មាន។ «ជាការពិតបើសិនជាគាត់(សុវណ្ណ រិទ្ធី) បានចុះផ្សាយ ឬសាបព្រោះព័ត៌មាននេះ អាជ្ញាធរគួរតែប្រើច្បាប់សារព័ត៌មានអនុវត្តលើអ្នកកាសែត ដែលបានបង្កើតកំហុសនៅក្នុងការផ្សព្វផ្សាយ និងចែកចាយព័ត៌មានរបស់ពួកគេ ហើយម្យ៉ាងវិញទៀតអាជ្ញាធរក៏អាចស្នើឱ្យអ្នកកាសែតកែតម្រូវឡើងវិញ នូវកំហុសខុសឆ្គងទាំងនោះដែរ»។ នេះជាការបញ្ជាក់របស់លោក ណុប វី។
តែយ៉ាងណាអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមឃឿន បានប្រាប់សារព័ត៌មានថ្មីថា សំណេររបស់លោក សុវណ្ណ រិទ្ធី នេះ ជាការបំប៉ោង និងបំពុលសង្គម ដែលធ្វើឱ្យពលរដ្ឋយល់ច្រឡំលើសម្ដេច ហ៊ុន សែន។ លោក គឹមឃឿន ចាត់ទុកសំណេររបស់ចាងហ្វាងTVFB រូបនេះ ជាចេតនាបង្កើតឱ្យមានចលាចលក្នុងសង្គម។
«សម្ដេច ហ៊ុន សែន គាត់បានចេញវិធានការដោះស្រាយបញ្ហាពលរដ្ឋ ដែលជួបបញ្ហាប្រឈមនឹងជំងឺCOVID-19ហើយ ហើយគ្រាន់តែសម្ដេចនិយាយលេងមួយម៉ាត់ ពីរម៉ាត់សោះ បែរជាយកមកចុះផ្សាយ។ សម្ដេចគាត់គ្មានចេតនាដូចការចុះផ្សាយឯណា ព្រោះគាត់បានចេញវិធានការច្រើនមកហើយ»។ នេះជាការបញ្ជាក់របស់លោក ឆាយ គឹមឃឿន។
ជាមួយគ្នានេះ ក្រសួងព័ត៌មាន ក៏បានសម្រេចលុបចោលអាជ្ញាប័ណ្ណTVFB និង FBTV ក្រោមហេតុផលស្ថាប័ននេះ ផ្សព្វផ្សាយញុះញង់បង្កឱ្យប៉ះពាល់ដល់សន្តិសុខ សណ្ដាប់ធ្នាប់ និងសុវត្ថិភាពសង្គម។
ផ្ទុយពីការលើកឡើងរបស់អាជ្ញាធរនេះ លោក ណុប វី ដែលបានតាមដានករណីលោក សុវណ្ណ រិទ្ធី នេះ បាននិយាយថា ការផ្សព្វផ្សាយរបស់ចាងហ្វាងTVFBរូបនេះ ក៏មិនមានឥទ្ធិពលធ្ងន់ធ្ងរ ដែលនាំឱ្យប៉ះពាល់ និងបង្កចលាចលក្នុងសង្គមដែរ។ តាមរយៈការចុះផ្សាយរបស់សម្ព័ន្ធអ្នកកាសែតកម្ពុជា បានស្រង់សម្ដីលោក ណុប វី ដូច្នេះថា៖«អ្វីដែលជាចំណុចសំខាន់នោះ ខ្ញុំគិតថាការផ្សព្វផ្សាយរបស់លោក សុវណ្ណ រិទ្ធីនេះ ក៏មិនបណ្ដាលឱ្យបំផ្លាញដល់ផលប្រយោជន៍ជាតិ និងការរើសអើងនៅក្នុងសង្គមដែរ។ ដូច្នេះខ្ញុំស្នើឱ្យរដ្ឋាភិបាលពិចារណា និងពិនិត្យមើលលើបញ្ហានេះឡើងវិញ»។
ជុំវិញករណីខាងលើនេះ លោក សុវណ្ណ សុខា ឪពុកលោក សុវណ្ណ រិទ្ធី ក៏បានស្នើសុំឱ្យប្រមុខរដ្ឋាភិបាល អធ្យាស្រ័យនិងអនុគ្រោះលោក រិទ្ធី តាមរយៈវីដេអូសុំទោសជំនួសកូនផងដែរ ។ លោកអះអាងថា កូនរបស់ខ្លួន គ្មានចេតនាវាយប្រហារលើរដ្ឋាភិបាលឡើយ៕