ជាអ្នកស្រុកគងពិសី ខេត្តកំពង់ស្ពឺ ខ្ញុំបានក្លាយជាអ្នកកាសែតហាត់ការងារដំបូងក្នុងឆ្នាំ២០១៧ អំឡុងពេលខ្ញុំរៀនឆ្នាំទី២ ជំនាញ សិល្បៈ និងការសិក្សាអំពីព័ត៌មាន នៅសាកលវិទ្យាល័យកម្ពុជា។ បញ្ចប់ភារកិច្ចជានិស្សិតហាត់ការងារ ខ្ញុំ បានបន្តការសិក្សាជំនាញ ផលិតវីដេអូ និងទំនាក់ទំនង នៅសាកលវិទ្យាល័យ Universitas Diponegoro ប្រទេសឥណ្ឌូណេស៊ី មួយឆមាស។ 

 

ក្រោយមក ខ្ញុំបានត្រឡប់មកបន្តការសិក្សាជំនាញដដែលវិញ និងបានធ្វើការងារក្រៅម៉ោងផ្នែក ផលិតវីដេអូ រយៈពេល២ឆ្នាំ។ នៅឆ្នាំ២០១៩ ខ្ញុំ មានឱកាសចូលបម្រើការងារនៅសារព័ត៌មានឌីជីថលថ្មីៗ ផ្នែកផលិតវីដេអូ និងបទយកការណ៍។ ថ្នាក់ដឹកនាំ បានផ្ដល់ឳកាសឱ្យខ្ញុំក្លាយជាប្រធានផ្នែកវីដេអូ នៅដើមឆ្នាំ២០២១។ បច្ចុប្បន្ន ខ្ញុំ ជានិពន្ធនាយករងសារព័ត៌មានថ្មីៗ២៥ រាជធានី-ខេត្ត ដែលផ្ដោតលើកសិកម្ម ទេសចរណ៍ និងវប្បធម៌។ 

 

ខ្ញុំជាអ្នកចូលចិត្តមាតិកាទាក់ទងវប្បធម៌ខ្មែរ។ ក្រៅពីសរសេរព័ត៌មានសង្គមទូទៅ ខ្ញុំ បានចូលរួមផលិតវីដេអូ និងព័ត៌មានផ្សេងៗ អំពីរមណីយដ្ឋានអង្គរ។ លើសពីនេះ ខ្ញុំ ក៏បានចូលរួមផលិតវីដេអូឯកសារអំពីរមណីយដ្ឋានអង្គរផងដែរ៕