រដ្ឋបាលខេត្តពោធិ៍សាត់ បានរកឃើញអ្នកតេស្តវិជ្ជមានកូវីដ-១៩ ចំនួន ៧នាក់បន្ថែមទៀត នៅថ្ងៃទី១៦ឧសភា ខណៈអ្នកសះស្បើយ មាន២នាក់បន្ថែមដែរ។ តាមរបាយការណ៍របស់មន្ទីរសុខាភិបាលខេត្តពោធិ៍សាត់ ក្នុងចំណោមអ្នកឆ្លងថ្មីទាំង៧នាក់ មាន៣នាក់ជាអ្នកដំណើរពីរាជធានីភ្នំពេញ, ១នាក់ជាអ្នកដំណើរពីខេត្តព្រះសីហនុ និង៣នាក់ជាអ្នកដំណើរពីខេត្តកំពង់ស្ពឺ។ គិតត្រឹមថ្ងៃទី១៦ ឧសភា ខេត្តពោធិ៍សាត់មានអ្នកកើតកូវីដ-សរុប ៥៩នាក់ ក្នុងនោះ៦នាក់ជាសះស្បើយ និង២នាក់ បានបាត់បង់ជីវិត។ នេះបើតាមរបាយការណ៍របស់មន្ទីរសុខាភិបាលខេត្តពោធិ៍សាត់។ 

 

នៅឯខេត្តក្រចេះវិញ ក៏បានរកឃើញអ្នកវិជ្ជមានកូវីដ-១៩ ចំនួន២នាក់ផងដែរ លើស្ត្រីអ្នកដំណើរពីរាជធានីភ្នំពេញ។ តាមសេចក្តីជូនដំណឹងរបស់រដ្ឋបាលខេត្តក្រចេះ អ្នកទាំង២ជាបុគ្គលិកឱសថស្ថានអរុណរស្មី ផ្សារអូរឡាំពិក រាជធានីភ្នំពេញ និងមានអាសយដ្ឋាននៅភូមិរហារ៍ ឃុំស្រែចារ ស្រុកស្នួល ខេត្តក្រចេះ។

 

: 

 

តាមរបាយការណ៍របស់ក្រសួងសុខាភិបាល គិតត្រឹមថ្ងៃទី១៥ ឧសភា កម្ពុជាមានអ្នកកើតកូវីដ-១៩ ចំនួន ២២ ១៨៤នាក់ ដោយសះស្បើយមាន ១២ ១២០នាក់ និងស្លាប់១៥០នាក់៕