COVID-19
ជាតិ
អាជីវកម្ម និងមុខរបរ ដែលមានហានិភ័យឆ្លងកូវីដ-១៩ខ្ពស់ ត្រូវផ្អាកបណ្ដោះអាសន្ន ១៤ថ្ងៃ លោក ឃួង ស្រេង អភិបាលរាជធានីភ្នំពេញ (ឈរកណ្ដាល) ចុះពិនិត្យភូមិសាស្រ្ត និងទីតាំងចាក់វ៉ាកសាំងបង្ការកូវីដ-១៩ នៅព្រឹកថ្ងៃទី៣ មិថុនា ២០២១
× ភ្នំពេញ៖ អាជីវកម្ម និងសកម្មភាពការងារ ឬមុខរបរ ព្រមទាំងការជួបជុំ និងប្រមូលផ្ដុំលក្ខណៈឯកជន នៅក្នុងភូមិសាស្ត្ររាជធានីភ្នំពេញ ដែលមានហានិភ័យខ្ពស់នៃការឆ្លងកូវីដ-១៩ ត្រូវផ្អាកបណ្ដោះអាសន្ន ១៤ថ្ងៃ ដោយគិតចាប់ពីម៉ោងសូន្យ ថ្ងៃទី៣ ដល់១៦ មិថុនា។
សាលារាជធានីភ្នំពេញ បានបញ្ជាក់ថា អាជីវកម្ម និងសកម្មភាពការងារ ឬមុខរបរ ដែលចាត់ទុកមានហានិភ័យឆ្លងខ្ពស់ ហើយត្រូវផ្អាកសកម្មភាពនោះ រួមមាន សាលារៀន រួមទាំងសាលាបណ្ដុះបណ្ដាលវិជ្ជាជីវៈរដ្ឋ និងឯកជន លើកលែងតែសាលារៀន ដែលបណ្ដុះបណ្ដាលតាមប្រព័ន្ធអនឡាញ។ ចំណែកអាជីវកម្មក្លឹបកម្សាន្តគ្រប់ប្រភេទ ដូចជា ខារ៉ាអូខេ រង្គសាល បៀហ្គាឌិន កាស៊ីណូ រមណីដ្ឋាន សារមន្ទីរ សួនកម្សាន្ត រោងភាពយន្ត រោងសម្ដែងសិល្បៈ ក្លិបហាត់ប្រាណ មជ្ឈមណ្ឌលកីឡា និងកន្លែងម៉ាស្សានោះ គឺសុទ្ធតែស្ថិតនៅក្នុងវិធានការរដ្ឋបាល ដែលតម្រូវឱ្យផ្អាកសកម្មភាព។
សេចក្តីសម្រេចរបស់សាលារាជធានីភ្នំពេញ ចេញនៅយប់ថ្ងៃទី២ មិថុនា ត្រង់មាត្រា២ បានសង្កត់ធ្ងន់ដូច្នេះថា៖«ក្រៅពីសកម្មភាពការងារ មុខរបរ ឬអាជីវកម្ម ដែលត្រូវផ្អាកជាបណ្ដោះអាសន្ន ដូចបានកំណត់ខាងលើ រដ្ឋបាលរាជធានីភ្នំពេញ និងពិនិត្យសម្រេចផ្អាកសកម្មភាពការងារ មុខរបរ និងអាជីវកម្មផ្សេងទៀតទៅតាមស្ថានភាពវិវឌ្ឍន៍ជាក់ស្ដែង ដោយអនុលោមតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩»។
ចំពោះការជួបជុំ និងប្រមូលផ្ដុំលក្ខណៈឯកជន នៅអំឡុងពេលដាក់ចេញវិធានការរដ្ឋបាលនេះវិញ គឺត្រូវបានកំណត់មិនឱ្យលើសពី១៥នាក់ឡើយ ។ នេះបើតាមសាលារាជធានីភ្នំពេញ។
ប៉ុន្តែក៏មានលើកលែងតែករណីខ្លះ ជុំវិញការជួបជុំ ឬប្រមូលផ្ដុំដែរ ដូចជា ការជួបជុំក្នុងចំណោមសមាជិកគ្រួសារ និងរង្វង់សាច់ញាតិ ដែលរស់នៅក្នុងលំនៅដ្ឋាន ឬទីសំណាក់ជាមួយគ្នា ក្នុងកម្មវិធីប្រពៃណី និងសាសនាផ្សេងៗ។ ការរៀបចំពិធីបុណ្យសពដោយគោរពតាមការកំណត់របស់អាជ្ញាធរ និងក្រោយពេលយកសំណាកសាកសពទៅវិភាគរកមេរោគកូវីដ-១៩ ដែលទទួលបានលទ្ធផលអវិជ្ជមាន។ ការជួបជុំរបស់ស្ដាប័នសាធារណៈ ការប្រមូលផ្ដុំមនុស្ស និងការជួបជុំរបស់បុគ្គលិកសុខាភិបាល ដើម្បីអនុវត្តវិធានការសុខាភិបាល ជាអាទិ៍ ការយកសំណាកមកវិភាគរកមេរោគ និងការចាក់វ៉ាក់សាំងបង្ការជំងឺកូវីដ-១៩ ព្រមទាំងសកម្មភាពបុគ្គលិកសុខាភិបាល ដែលបំពេញការងារសង្គ្រោះបន្ទាន់ គឺត្រូវបានអនុញ្ញាត។
ជាមួយគ្នានេះ ក៏មានការលើកលែងលើការជួបជុំរបស់អាជ្ញាធរមានសមត្ថកិច្ច កងកម្លាំងការពារសន្តិសុខ និងសណ្ដាប់ធ្នាប់ រួមទាំងមន្ត្រីនគរបាលយុត្តិធម៌ ឬសាលាជម្រះក្តី និងមានផលប្រយោជន៍សាធារណៈ ដែលស្របតាមការកំណត់របស់អាជ្ញាធរ។ រីឯការជួបជុំ ឬប្រមូលផ្ដុំមនុស្ស ដើម្បីបំពេញការងារឱ្យសកម្មភាពការងារ អាជីវកម្ម ឬមុខរបរ ដែលមិនបានបែងចែងក្នុងមាត្រា២ ក៏ត្រូវបានលើកលែងដែរ។
ក្រៅពីករណីខាងលើ រដ្ឋបាលរាជធានីភ្នំពេញ និងពិនិត្យសម្រេចផ្អាកការជួបជុំ និងប្រមូលផ្ដុំលក្ខណៈឯកជនផ្សេងទៀតទៅតាមស្ថានភាពវិវឌ្ឍន៍ជាក់ស្ដែង ដោយអនុលោមតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩។
«ក្នុងករណីរកឃើញថា បុគ្គល ឬនីតិបុគ្គលទាំងឡាយណា ដែលបំពានវិធានការនេះ ត្រូវអនុវត្តទណ្ឌកម្មរដ្ឋបាល និងទណ្ឌកម្មច្បាប់ រួមទាំងការផ្សព្វផ្សាយជាសាធារណៈចំពោះបុគ្គលល្មើស ស្របតាមច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ផ្សេងៗ និងលិខិតបទដ្ឋានគតិយុត្តិពាក់ព័ន្ធជាធរមាន ដោយគ្មានការលើកលែងឡើយ»។នេះបើតាមអភិបាលរាជធានីភ្នំពេញ៕
© រក្សាសិទ្ធិដោយ thmeythmey.com