ខេត្តស្វាយរៀង នៅថ្ងៃទី១០ មិថុនា បានរកឃើញមនុស្ស១៨នាក់ទៀត មានតេស្តវិជ្ជមានកូវីដ-១៩ និង២០នាក់បានជាសះស្បើយ។ ខេត្តរតនគិរី ក៏រកឃើញអ្នកឆ្លងថ្មី ១នាក់ ខណៈខេត្តកំពង់ចាម មានអ្នកជំងឺ១នាក់ បានស្លាប់។
ស្វាយរៀង៖ រកឃើញ១៨នាក់ទៀត និង២០នាក់ជាសះស្បើយ
ខេត្តស្វាយរៀង មានអ្នកឆ្លងកូវីដ-១៩ ចំនួន ១៨នាក់ទៀតនៅថ្ងៃទី១០ មិថុនា ខណៈអ្នកជំងឺ ២០នាក់ជាសះស្បើយ។ យោងតាមសេចក្តីប្រកាសព័ត៌មានរបស់រដ្ឋបាលខេត្ត ក្នុងចំណោមអ្នកឆ្លងថ្មីទាំង ១៨នាក់នោះ ភាកច្រើនជាកម្មកររោងចក្រ ដែលមាន៨នាក់ជាពលរដ្ឋរស់នៅស្រុកស្វាយទាប ខណៈស្រុកកំពង់រោទិ៍ និងក្រុងស្វាយរៀងមាន៣នាក់រៀងខ្លួន។ ស្រុកចន្ទ្រា មានអ្នកវិជ្ជមាន២នាក់ រីឯស្រុករំដួល និងស្រុកស្វាយជ្រំ មាន១នាក់រៀងខ្លួន។ បច្ចុប្បន្នខេត្តស្វាយរៀង មានករណីវិជ្ជមានកូវីដ-១៩ សរុប ១១៩២នាក់ក្នុងនោះ ៧៥៦នាក់បានជាសះស្បើយ ៧នាក់ស្លាប់ និង៤២៨នាក់ទៀតបន្តសម្រាកព្យាបាល។
រតនគិរី៖ រកឃើញ១នាក់ ជាអ្នកដំណើរពីរាជធានីភ្នំពេញ
ខេត្តរតនគិរី រកឃើញអ្នកឆ្លងកូវីដ-១៩ ម្នាក់បន្ថែមនៅថ្ងៃទី១០ ខែមិថុនា ដែលជាអ្នកដំណើរពីរាជធានីភ្នំពេញ។ យោងតាមសេចក្តីជូនព័ត៌មានរបស់រដ្ឋបាលខេត្ត អ្នកវិជ្ជមាន១នាក់នេះ មានវ័យ ២៥ឆ្នាំ មានអាសយដ្ឋាននៅភូមិព្រៃសំពៅ ឃុំប្រសិទ្ធិ ស្រុករលាប្អៀរ ខេត្តកំពង់ឆ្នាំង។ បច្ចុប្បន្ន ខេត្តរតនគិរី មានអ្នកវិជ្ជមានកូវីដ-១៩ សរុប ២៥នាក់ ក្នុងនោះ ៨នាក់បានជាសះស្បើយ ហើយអ្នកជំងឺ ១៧នាក់ទៀត បន្តព្យាបាលនៅមន្ទីរពេទ្យ។
កំពង់ចាម៖ គ្មានករណីថ្មី តែមានអ្នកជំងឺម្នាក់បានស្លាប់
ខេត្តកំពង់ចាម មិនបានរកឃើញអ្នកវិជ្ជមានកូវីដ-១៩ នោះទេ នៅថ្ងៃទី១០ មិថុនា ប៉ុន្តែបែរជាមានអ្នកជំងឺម្នាក់ បានស្លាប់ដោយសារជំងឺដ៏កាចសាហាវនេះ។ តាមសេចក្តីប្រកាសព័ត៌មានរបស់រដ្ឋបាលខេត្តកំពង់ចាម អ្នកជំងឺដែលស្លាប់នេះ ជាបុរសវ័យ ៣៨ឆ្នាំ ជាពលរដ្ឋរស់នៅភូមិព្រែកជីក ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។ បុរសរូបនេះ បានរកឃើញថាមានតេស្តវិជ្ជមានកូវីដ-១៩ នៅថ្ងៃទី៨ មិថុនា និងបានចូលសម្រាកនៅមន្ទីរពេទ្យមេគង្គកំពង់ចាម។ ដោយសារអ្នកជំងឺមានប្រវត្តិលើសឈាម ហើយការវិវត្តន៍ជំងឺចេះតែធ្ងន់ឡើង ជាមួយនឹងស្ថានភាពហត់ ដង្ហក់ខ្លាំង ដែលតម្រូវឱ្យគ្រូពេទ្យសង្គ្រោះតាមលក្ខណៈបច្ចេកទេស និងការប្រើម៉ាស៊ីនជំនួយដង្ហើមផង។ ទោះយ៉ាងណា អាការអ្នកជំងឺ មិនធូរស្រាល និងបាត់បង់ជីវិតនៅម៉ោង៣ទៀបភ្លឺ ថ្ងៃទី១០ មិថុនា។ ក្រុមគ្រូពេទ្យសន្និដ្ឋានថា ង្នកជំងឺស្លាប់ដោយសាររលាកសួតធ្ងន់ធ្ងរ ព្រោះកូវីដ-១៩ និងមកពីអ្នកជំងឺមានជំងឺលើសឈាមរ៉ាំរ៉ៃផង។
សៀមរាប៖ មាន៤៥នាក់បន្ថែម ក្នុងនោះ២៤ករណីនៅក្រុងសៀមរាប
រដ្ឋបាលខេត្តសៀមរាប រកឃើញអ្នកវិជ្ជមានកូវីដ-១៩ ចំនួន ៤៥នាក់បន្ថែមទៀត នៅថ្ងៃទី១០ ខែមិថុនា ដែលភាគច្រើនជាពលរដ្ឋរស់នៅក្នុងសង្កាត់ស្រង៉ែ ,សង្កាត់គោកចក និងសង្កាត់ស្លក្រាមក្រុងសៀមរាប។ នៅស្រុកសូទ្រនិគម និងស្រុកជីក្រែង ក៏មិនទាន់ថមថយ ខណៈពលករខ្មែរមកពីថៃ ៥នាក់ ក៏មានវិជ្ជមានដែរ។ ទន្ទឹមនឹងនោះ រដ្ឋបាលខេត្តក៏ប្រកាសថា មានអ្នកជំងឺចំនួន ១២នាក់ បានជាសះស្បើយផងដែរ។ តាមរដ្ឋបាលខេត្ត ក្នុងចំណោមអ្នកឆ្លងថ្មី ទាំង ៤៥នាក់នោះមាន ១៧នាក់ ជាពលរដ្ឋនៅសង្កាត់ស្រង៉ែ, ២នាក់នៅសង្កាត់គោកចក និង៥នាក់នៅសង្កាត់ស្លក្រាម ក្រុងសៀមរាប។ ពលរដ្ឋ ៦នាក់ ជាអ្នករស់នៅស្រុកសូទ្រនិគម, ៤នាក់នៅស្រុកជីក្រែង, ២នាក់នៅស្រុកពួក, ៤នាក់នៅស្រុកប្រាសាទបាគង, ៣នាក់នៅស្រុកក្រឡាញ់ ហើយស្រុកស្រីស្នំ និងស្រុកវ៉ារិនមាន១នាក់រៀងខ្លួន។ គិតត្រឹមថ្ងៃទី ១០មិថុនា ខេត្តសៀមរាប មានអ្នកវិជ្ជមានកូវីដ-១៩ សរុប ៣៤៤នាក់ ក្នុងនោះ ១០៦នាក់បានជាសះស្បើយ ២នាក់ស្លាប់ និង២៣៦នាក់ទៀត នៅបន្តព្យាបាល។
ព្រៃវែង៖ មាន៤២នាក់ទៀត ក្នុងនោះ១៩នាក់ជាអ្នកមកពីថៃ
រដ្ឋបាលខេត្តព្រៃវែង បានរកឃើញមនសុ្ស ៤២នាក់បន្ថែមទៀត វិជ្ជមានកូវីដ-១៩ ដែលមាន១៩នាក់ជាអ្នកត្រឡប់មកពីថៃ និងអ្នកដែលប៉ះពាល់នឹងអ្នកឆ្លងកន្លងមក ខណៈករណីមួយចំនួនមិនទាន់កំណត់ប្រភពឆ្លងបាននៅឡើយ។ តាមរដ្ឋបាលខេត្តព្រៃវែង ក្នុងចំណោមអ្នកឆ្លងថ្មីទាំង ៤២នាក់នេះ មាន៩នាក់នៅស្រុកព្រះស្តេច, ៨នាក់នៅក្រុងព្រៃវែង, ៧នាក់នៅស្រុកពារាំង។ ស្រុកស្វាយអន្ទរ កំចាយមារ និងស្រុកស៊ីធរកណ្ដាល រកឃើញ៤នាក់រៀងខ្លួន ខណៈដែលស្រុកពាមរក៍ មាន៣នាក់។ ស្រុកពោធិ៍រៀង មាន២នាក់ និងស្រុកកញ្ចៀច មានអ្នកឆ្លងថ្មី១នាក់។ គិតត្រឹមថ្ងៃទី ១០មិថុនា ខេត្តព្រៃវែង រកឃើញអ្នកវិជ្ជមានកូវីដ-១៩ សរុប ៨២៤នាក់ ក្នុងនោះ៣៥៦នាក់ជាសះស្បើយ ៨នាក់បានស្លាប់ និងអ្នកនៅបន្តព្យាបាលមានចំនួន៤៦០នាក់ទៀត។
បន្ទាយមានជ័យ៖ មាន៣៧ នាក់បន្ថែម និងសះស្បើយ ៣៧នាក់
ខេត្តបន្ទាយមានជ័យ បានរកឃើញអ្នកវិជ្ជមានថ្មីបន្ថែម ៣៧នាក់ទៀត ខណៈអ្នកសះស្បើយ ក៏មាន៣៧នាក់ដែរ។ សេចក្តីប្រកាសព័ត៌មានរបស់រដ្ឋបាលខេត្តបញ្ជាក់ថា ក្នុងចំណោមអ្នកឆ្លងថ្មីទាំង ៣៧នាក់នោះ ភាគច្រើនគឺជាអ្នកដែលត្រឡប់មកពីប្រទេសថៃ និងមួយចំនួនទៀតជាបុគ្គលិកក្រុមហ៊ុន កម្មកររោងចក្រ និងអ្នករត់ម៉ូតូឌុប។ ក្នុងចំណោមអ្នកឆ្លងថ្មីទាង ៣៧នាក់ មាន ១៨នាក់នៅក្រុងប៉ោយប៉ែត, ៦នាក់នៅស្រុកព្រះនេត្រព្រះ, ៥នាក់នៅស្រុកមង្គលបូរី, ៤នាក់នៅក្រុងសិរីសោភ័ណ, ២នាក់ស្រុកភ្នំស្រុក ខណៈស្រុកអូរជ្រៅ និងស្រុកម៉ាឡៃរកឃើញ១នាក់រៀងខ្លួន។
កំពត៖ ឆ្លងថ្មី ៣៤នាក់ និងមាន២នាក់បានស្លាប់
ខេត្តកំពតបានរកឃើញមនុស្ស ៣៤នាក់ទៀត វិជ្ជមានកូវីដ-១៩ នៅថ្ងៃទី១០មិថុនា ខណៈអ្នកជំងឺ២នាក់បានស្លាប់។ បើតាមសេចក្តីជូនដំណឹងរបស់រដ្ឋបាលខេត្តកំពត ក្នុងចំណោមអ្នកឆ្លងថ្មីនេះ មានទាំងកម្មកររោងចក្រ អាជីវករ កសិករ គ្រូបង្រៀន ស្ត្រីមេផ្ទះ និងសិស្ស។ ក្នុងចំណោអ្នកវិជ្ជមានទាំង ៣៤នាក់ មាន ១៦នាក់ជាពលរដ្ឋមានអាសយដ្ឋាននៅស្រុកដងទង់ , ៦នាក់ នៅស្រុកជុំគិរី, ៦នាក់នៅស្រុកឈូក ,២នាក់នៅស្រុកអង្គរជ័យ, ២នាក់នៅសង្កាត់កំពង់កណ្តាល ក្រុងកំពត និង២នាក់ទៀតនៅស្រុកទឹកឈូ។
ចំពោះករណីស្លាប់វិញ គឺលើបុរសវ័យ ៧៦ឆ្នាំ រស់នៅឃុំអង្គរសុភី ស្រុកកំពង់ត្រាច ។ បុរសរូបនេះបានស្លាប់ដោយជំងឺលើសសម្ពាធឈាម មុននឹងតេស្តឃើញវិជ្ជមានកូវីដ-១៩លើសាកសព។ ចំណែក១ករណីទៀត គឺជាបុរសវ័យ ៣៩ឆ្នាំ ដែលរស់នៅឃុំចំប៉ី ស្រុកអង្គរជ័យ។ បុរសរូបនេះ មានតេស្តវិជ្ជមានកូវីដ-១៩ និងបានចូលសម្រាកនៅមន្ទីរពេទ្យ នៅថ្ងៃទី៩មិថុនា ជាមួយនឹងអាការក្អកខ្លាំង ក្តៅខ្លួន ឈឺក្បាល ហៀរសំបោរ និងដង្ហក់ ដែលតម្រូវឱ្យគ្រូពេទ្យសង្គ្រោះតាមបច្ចេកទេសបន្ទាន់ភ្លាមៗ។ នៅព្រឹកថ្ងៃទី១០មិថុនា សភាពជំងឺក៏បានរើឡើងម្តងទៀត ហើយគាត់ក៏បានបាត់បង់ជីវិតទៅ។ គ្រូពេទ្យសន្និដ្ឋានថា អ្នកជំងឺស្លាប់ដោយសារវិបត្តិផ្លូវដង្ហើមធ្ងន់ធ្ងរ និងរលាកសួតទាំងសងខាងដោយសារជំងឺកូវីដ-១៩។
បាត់ដំបង៖ មាន ១៤នាក់បន្ថែម ក្នុងនោះ៩នាក់ជាពលករមកពីថៃ
ខេត្តបាត់ដំបង រកឃើញអ្នកវិជ្ជមានកូវីដ-១៩ ចំនួន១៤នាក់បន្ថែមទៀត ក្នុងនោះភាគច្រើនជាពលករមកពីប្រទេសថៃ ហើយក្រៅពីជាបុគ្គលិកកាស៊ីណូ , បុគ្គលិករោងចក្រ និងកម្មករសំណង់។ តាមសេចក្តីប្រកាសព័ត៌មានរបស់រដ្ឋបាលខេត្ត ក្នុងចំណោមអ្នកឆ្លងថ្មីទាំង ១៤នាក់ មាន ៤នាក់ជាពលរដ្ឋរស់នៅស្រុកឯកភ្នំ, ៤នាក់នៅស្រុកមោងឫស្សី, ៣នាក់នៅស្រុកបាណន់ ខណៈស្រុករុក្ខគិរី និងស្រុកគាស់ក្រឡមាន១នាក់រៀងខ្លួន។ អ្នកជំងឺ១នាក់ទៀត ជាពលរដ្ឋនៅឃុំអូរជ្រៅ ស្រុកអូរជ្រៅ ខេត្តបន្ទាយមានជ័យ។ បច្ចុប្បន្ន ខេត្តបាត់ដំបង មានអ្នកឆ្លងកូវីដ-១៩ ចំនួន៤៨៣នាក់ ក្នុងនោះ១៧៨នាក់បានជាសះស្បើយ។ អ្នកជំងឺ២នាក់បានស្លាប់ ខណៈ ៣០៣នាក់ទៀត នៅបន្តព្យាបាលនៅតាមមន្ទីរពេទ្យបង្អែកនានាក្នុងខេត្ត។
កំពង់ធំ៖ រកឃើញ១២នាក់ទៀត និង៦នាក់សះស្បើយ
ខេត្តកំពង់ធំ មានអ្នកឆ្លងថ្មី ចំនួន ១២នាក់ និងអ្នកជាសះស្បើយ ១២នាក់។ បើតាមសេចក្តីប្រកាសព័ត៌មានរបស់រដ្ឋបាលខេត្តកំពង់ធំ អ្នកឆ្លងភាគច្រើនជាកម្មកររោងចក្រ និងមានអ្នកត្រឡប់ពីរាជធានីភ្នំពេញ និងប្រទេសថៃផងដែរ។ ក្នុងចំណោមអ្នកវិជ្ជមានថ្មីទាំង១២នាក់នោះ មាន៦នាក់ជាពលរដ្ឋនៅស្រុកតាំងគោក ,៣នៅស្រុកស្ទោង, ២នាក់នៅក្រុងស្ទឹងសែន និង១នាក់ទៀតនៅស្រុកប្រាសាទសំបូរ។ បច្ចុប្បន្ន ខេត្តកំពង់ធំ រកឃើញអ្នកវិជ្ជមានកូវីដ-១៩ សរុប៣៧៥នាក់ ក្នុងនោះ ២០៥នាក់ បានជាសះស្បើយ និង១៦៩នាក់ទៀតកំពុងសម្រាកព្យាបាល។
ព្រះវិហារ៖ រកឃើញ៨នាក់ ដោយ៣នាក់ជាទារក និងកុមារ
ទារកអាយុ៧ខែម្នាក់ និងកុមារ២នាក់ ស្ថិតក្នុងចំណោមអ្នកវិជ្ជមានសរុប ៨នាក់ ដែលមានតេស្តវិជ្ជមានកូវីដ-១៩ នៅខេត្តព្រៃះវិហារ នៅថ្ងៃទី១០មិថុនា។ សេចក្តីប្រកាសព័ត៌មានរបស់រដ្ឋបាលខេត្តព្រះវិហារ បញ្ជាក់ថា ក្នុងចំណោមអ្នកឆ្លងថ្មីទាំង ៨នាក់នេះ មាន៦នាក់ ជាពលរដ្ឋរស់នៅភូមិស្រអែមជើង ឃុំស្រអែម ស្រុកជាំក្សាន្ត និង២នាក់ទៀត ជាអ្នកធ្វើដំណើរពីរាជធានីភ្នំពេញ ដែលមានអាសយដ្ឋាននៅភូមិអភិវឌ្ឍន៍ សង្កាត់ប៉ាលហាល ក្រុងព្រះវិហារ។ គិតត្រឹមថ្ងៃទី ១០ មិថុនា ខេត្តព្រះវិហារ រកឃើញអ្នកវិជ្ជមានកូវីដ-១៩ ចំនួន២៤នាក់ ក្នុងនោះ៥នាក់បាន ជាសះស្បើយ៥ករណី និង ១៩នាក់នៅបន្តព្យាបាល។
កោះកុង៖ ឆ្លងថ្មី៥នាក់ ជាសះស្បើយ ៤នាក់
ក្នុងចំណោមអ្នកវិជ្ជមានថ្មីទាំង៥នាក់នៅខេត្តកោះកុង នៅថ្ងៃទី១០មិថុនា មាន១នាក់នៅឃុំជីខក្រោម ស្រុកស្រែអំបិល ហើយ៤នាក់ទៀតជាពលរដ្ឋនៅឃុំប៉ាក់ខ្លង ស្រុកមណ្ឌលសីមា។ នេះបើតាមសេចក្តីប្រកាសព័ត៌មានរបស់រដ្ឋបាលខេត្ត ដែលបានបន្តថា អ្នកជំងឺ ៤នាក់ ក៏បានជាសះស្បើយផងដែរ។
ស្ទឹងត្រែង៖ រកឃើញ ១នាក់ ដែលជាអ្នកធ្វើដំណើរពីខេត្តកណ្តាល
ករណីវិជ្ជមានកូវីដ-១៩ នៅខេត្តស្ទឹងត្រែង នៅថ្ងៃទី១០ មិថុនា កើតលើបុរសវ័យ ៦៨ឆ្នាំ ដែលបានធ្វើដំណើរតាមរថយន្តផ្ទាល់ខ្លួនពីខេត្តកណ្តាល។ តាមរដ្ឋបាលខេត្ត បុរសរូបនេះ មានអាសយដ្ឋាននៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង។ បច្ចុប្បន្ន ខេត្តស្ទឹងត្រែង មានអ្នកវិជ្ជមានកូវីដ-១៩ សរុប ១៥នាក់ ក្នុងនោះ៧នាក់បានជាសះស្បើយ។
ឧត្តរមានជ័យ៖ រកឃើញ១នាក់ទៀត ជាពលករមកពីថៃ
១ករណីថ្មីនៅខេត្តឧត្តរមានជ័យ គឺជាពលករខ្មែរដែលត្រឡប់មកពីប្រទេសថៃ។ តាមរដ្ឋបាលខេត្តអ្នកជំងឺរូបនេះ ជាបុរសវ័យ ២៩ឆ្នាំ មានអាសយដ្ឋាននៅកៀនកេស២ ឃុំគោកឃ្មុំ ស្រុកថ្មគោល ខេត្តបាត់ដំបង។ បច្ចុប្បន្ន ខេត្តឧត្ដរមានជ័យ រកឃើញអ្នកវិជ្ជមានកូវីដ-១៩ សរុប ១០២នាក់ ក្នុងនោះ៩៧នាក់ ជាករណីនាំចូល។ អ្នកជំងឺ ៣០នាក់ បានជាសះស្បើយនិង៧២នាក់កំពុងសម្រាកព្យាបាល។
ទូទាំងប្រទេស៖ ឆ្លងថ្មី៦៥៥នាក់ សះស្បើយ ៨១០នាក់ និងអ្នកស្លាប់មាន១១នាក់ទៀត
ក្រសួងសុខាភិបាល ប្រកាសថាមាន របស់ មនុស្សចំនួន៦៥៥នាក់ទៀត បានឆ្លងកូវីដ-១៩ នៅកម្ពុជា ក្នុងនោះក្នុងនោះ ៤៩នាក់ជាករណីនាំចូល។ ទន្ទឹមនឹងនេះ មានអ្នកជំងឺចំនួន ៨១០នាក់បន្ថែម បានជាសះស្បើយ ហើយអ្នកស្លាប់ មាន១១នាក់ទៀត។ គិតមកដល់ពេលនេះ កម្ពុជាមានអ្នកកើតកូវីដ-១៩ សរុប ៣៧ ៣២១នាក់ ក្នុងនោះមាន៣០ ៦១៧នាក់ បានជាសះស្បើយ និងស្លាប់សរុប៣១១នាក់៕