យន្តហោះធុន C-130 Hercules បានជួបបញ្ហាពេលចុះចតក្នុងខេត្ត Sulu នៅថ្ងៃទី៤ ខែកក្កដា។ អ្នកដំណើរទាំង៩៦នាក់ ត្រូវបានរកឃើញទាំងអស់។ លោក Cirilito Sobejana និយាយថា មនុស្ស៤៧នាក់បានស្លាប់ ហើយ៤៦នាក់រងរបួស។ 

 

 
 

ចំណែកក្រសួងការពារជាតិហ្វីលីពីនបញ្ជាក់ថា នៅលើដីឯណេះវិញ ជនស៊ីវិលបីនាក់ក៏បានបាត់បង់ជីវិត និង៤នាក់ទៀតរបួសផងដែរ។ រដ្ឋមន្រ្តីការពារជាតិ Delfin Lorenzana បានបញ្ជាឱ្យបើកការស៊ើបអង្កេតលើករណីធ្លាក់យន្តហោះមួយនេះក្រោយប្រតិបត្តិការសង្រ្គោះបញ្ចប់។ 

 

ភាគច្រើននៃដំណើរលើយន្តហោះC-130 នេះ ជាកងទ័ពដែលត្រូវពង្រាយនៅលើកោះ Jolo ក្នុងខេត្ត Sulu ដែលនៅចម្ងាយជាង៩៥០គីឡូម៉ែត្រពីរដ្ឋធានីម៉ានីល។ កងទ័ពហ្វីលីពីន ត្រូវបានពង្រាយលើកោះ Jolo និងកោះឯទៀតក្នុងប្រតិបត្តិការប្រឆាំងក្រុមឧទ្ទាមអាប៊ូសាយ៉ាហ្វ និងក្រុមជ្រុលនិយមមួយចំនួនទៀត ដែលតែងចាប់ជម្រិតមនុស្សយកប្រាក់ និងធ្វើសកម្មភាពភេរវកម្មប្រឆាំងរដ្ឋាភិបាលនៅប៉ែកខាងត្បូងប្រទេស។

 

តាមពិតទៅ ហ្វីលីពីន ទើបទទួលបានយន្តហោះដែលផលិតដោយក្រុមហ៊ុនអាមេរិក Lockheed កាលពីខែមករាដើមឆ្នាំ២០២១នេះប៉ុណ្ណោះ ដោយដាក់លេខកូដ ៥១២៥។ យន្តហោះ ស្ថិតក្នុងចំណោមយន្តហោះពីរគ្រឿងដែលរដ្ឋាភិបាលអាមេរិកផ្ដល់ឱ្យរដ្ឋាភិបាលហ្វីលីពីនដើម្បីជំរុញការដឹកជញ្ជូនផ្លូវអាកាស៕