បច្ចុប្បន្ន ក្រុមការងាររបស់លោក ហ៊ីង ប៊ុនហៀង កំពុងសម្រុកចុះប្រមូលទិញមៀនពីកសិករផ្សេងៗបន្តទៀត ដែលកំពុងជួបបញ្ហាទីផ្សារ។ លោក ហ៊ីង ប៊ុនហៀង បានបញ្ជាក់ប្រាប់សារព័ត៌មានThmeyThmey តាមទូរសព្ទយ៉ាងខ្លីដូច្នេះ៖«បច្ចុប្បន្នក្រុមការងារយើងកំពុងប្រមូលទិញមៀនពីកសិករនៅខេត្តជាប់ប្រទេសថៃ និងខេត្តផ្សេងៗ ដែលមានដាំដុះមៀនប៉ៃលិននេះ»។  
 

 

សូមជម្រាប ថា លោក ហ៊ីង ប៊ុនហៀង ចុះប្រមូលទិញមៀនពីកសិករដើម្បីជួយដោះស្រាយបញ្ហាទីផ្សារពួកគេ ក្នុងអំឡុងពេលថៃបិទខ្ទប់ទីផ្សារនាំចូល ដោយសារកូវីដ-១៩ ចាប់ពីថ្ងៃទី១៨សីហាមក ក្រោយមានការបញ្ជាផ្ទាល់ពីសម្តេច ហ៊ុន សែន។ ការប្រកាសរបស់សម្តេចនេះ បានក្លាយជានិន្នាការមួយ ដែលនាំឱ្យអ្នកជំនួញ និងអ្នកមានទ្រព្យធនជាដើមនោះ នាំគ្នាចូលរួមទិញមៀនពីកសិករដែរ។ 

បច្ចុប្បន្ន កម្ពុជាមានផ្ទៃដីដាំដុះតាង៉ែនទូទាំងប្រទេស សរុប១៣,៦០៨ហិកតា នៅក្នុងខេត្តចំនួន១៤ ហើយខេត្តដែលមានកសិករដាំដុះប្រភេទនេះច្រើនជាងគេ គឺខេត្តប៉ៃលិន បាត់ដំបង រតនៈគិរី និងបន្ទាយមានជ័យ។ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងចំណោមផ្ទៃដីដាំដុះមៀនប៉ៃលិនឬតាង៉ែនជាង១,៣ម៉ឺនហិកតានេះ គឺមាន៦,៩២៧ហិកតា ដែលកសិករត្រូវទទួលបានទិន្នផលនៅក្នុងឆ្នាំ២០២១។  
 

តាមរយៈកិច្ចសម្ភាសជាមួយទូរទស្សន៍ជាតិកម្ពុជា កាលពីថ្ងៃទី២០សីហា រដ្ឋមន្ត្រីកសិកម្មរូបនេះមានប្រសាសន៍ដូច្នេះ ៖ « តាមអ្វីដែលយើងប៉ាន់ស្មាន ផ្ទៃដីដែលអាចប្រមូលផល[ផ្លែតាង៉ែន]បាននៅក្នុងឆ្នាំ២០២១នេះ  គឺ មានប្រមាណ១១ម៉ឺនតោន ដែលយើងត្រូវប្រមូលផល»៕