ឈ្នះអូស្ត្រាលី ជាជ័យជម្នះលើកទី២របស់ជប៉ុនក្នុងចំណោម៤ប្រកួត។ ឈ្នះអូស្ត្រាលីនៅជំនួបលើទី៤ នៅពូល B ធ្វើឱ្យជប៉ុនធ្លាក់ពីលេខ៣ទៅលេខ៤ក្នុងតារាងពិន្ទុវិញ ប៉ុន្តែធ្វើឱ្យគម្លាតពិន្ទុរបស់ក្រុមគូប្រជែងថយ។ 
 

ឆ្លងកាត់ការប្រកួត៤លើក ក្រុមរហស្សនាមសាម៉ូរ៉ៃរកបាន៦ពិន្ទុ ស្មើក្រុមលេខ៣អូម៉ង់ តាមពីក្រោយក្រុមលេខ២អូស្ត្រី៣ពិន្ទុ និងក្រុមកំពូលតារាងអារ៉ាប៊ីសាអូឌីត៦ពិន្ទុ។ អូម៉ង់ ឡើងពីលេខ៤ទៅលេខ៣វិញក្រោយឈ្នះវៀតណាម ៣-១ ស្របពេលអារ៉ាប៊ីសាអូឌីតរក្សាចំណាត់ថ្នាក់កំពូលតារាងពូល B មាន១២ពិន្ទុ ក្រោយបន្តឈ្នះចិន ៣-២ នៅចំនួបលើកទី៤របស់ពួកគេ។
 

ចិនដែលឈ្នះ១លើក ចាញ់៣ រកបាន៣ពិន្ទុ ស្ថិតនៅចំណាត់ថ្នាក់ទី៥ ខណៈវៀតណាមដែលមិនទាន់ស្គាល់ឈ្នះ និងស្មើសោះ ស្ថិតនៅបាតតារាងគ្មានពិន្ទុរាប់នៅឡើយ។ ចិន និងវៀតណាម ត្រូវបានគេមើលឃើញថានឹងមិនអាចរកបានកៅអីទៅ World Cup នៅប្រទេសកាតា ឆ្នាំ២០២២ឡើយ។
  

អារ៉ាប៊ីសាអូឌីត មានភាគរយខ្ពស់ក្នុងការទទួលកៅអីស្វ័យប្រវត្តិ ស្របពេលអូស្ត្រាលី អូម៉ង់ និងជប៉ុន ត្រូវប្រជែងគ្នាខ្លាំងសម្រាប់តំណែងចំណាត់ថ្នាក់ទី២ និងទី៣ក្នុងពូល។

ក្នុងវគ្គជម្រុះ World Cup តំបន់អាស៊ី ត្រូវបានចែកចេញជាពីរពូល A និង B។ ក្រុមលេខ១ និងលេខ២តាមពូលនិមួយៗ ទទួលបានកៅអីស្វ័យប្រវត្តិទៅកាតា រីឯលេខ៣សល់កៅអី play-off ដើម្បីដណ្តើមយកកន្លះកៅអី ទៅបន្តជម្រុះជាមួយទ្វីបផ្សេង។
 

ដោយឡែកនៅពូល A វិញ អ៊ីរ៉ង់នៅតែរក្សាកំពូលតារាងដដែលមាន១០ពិន្ទុ ក្រោយប្រកួតស្មើកូរ៉េខាងត្បូង ១-១ នាជំនួបជម្រុះលើកទី៤។ កូរ៉េខាងត្បូងនៅលេខ២មាន៨ពិន្ទុ តាមពីក្រោយដោយលីបង់ដែលមាន៥ពិន្ទុ។ អេមីរ៉ាត់អារ៉ាប់រួម និងអ៊ីរ៉ាក់មាន៣ពិន្ទុដូចគ្នានៅចំណាត់ថ្នាក់ទី៤និងទី៥ ខណៈស៊ីរីនៅបាតតារាងមាន១ពិន្ទុ។

ក្នុងការប្រកួតជម្រុះពូល A លើកទី៤ លីបង់ឈ្នះស៊ីរី ៣-២ ខណៈ អេមីរ៉ាត់អារ៉ាប់រួមស្មើជាមួយអ៊ីរ៉ាក់ ២-២៕