ជាតិ
កម្ពុជា និងបណ្តាប្រទេសអាស៊ីបូព៌ា ប្តេជ្ញាអនុវត្តតាមផែនទីបង្ហាញផ្លូវលើការគ្រប់បរិស្ថានសមុទ្រ
លោក សាយ សំអាល់ រដ្ឋមន្ត្រីក្រសួងបរិស្ថាន (កណ្តាល) ក្នុងពិធីមហាសន្និបាតសមុទ្រអាស៊ីបូព៌ាលើកទី៧នៅខេត្តព្រះសីហនុ
×![]()
ព្រះសីហនុ៖ កម្ពុជាប្តេជ្ញាចំពោះគោលការណ៍ផែនការខៀវ (Blueprint) ក្នុងការអនុវត្តប្រកបដោយចីរភាព សមធ៌ម និងភាពធន់ សម្រាប់ការអភិវឌ្ឍសេដ្ឋកិច្ច-សង្គម។ លោក សាយ សំអាល់ រដ្ឋមន្រ្តីក្រសួងបរិស្ថាន ថ្លែងដូច្នេះនៅក្នុងវេទិកាថ្នាក់រដ្ឋមន្ត្រីលើកទី៧ដែលមាន១១ប្រទេសជាសមាជិកPEMSEA ដែលបានអនុម័តផែនទីបង្ហាញផ្លូវដល់ឆ្នាំ ២០៣០ ក្នុងការគាំទ្រការងើបឡើងវិញនៃភាពបៃតង និងពង្រឹងអភិបាលកិច្ចមហាសមុទ្រនៅអាស៊ីបូព៌ា។
មហាសន្និបាតសមុទ្រអាស៊ីបូព៌ា(PEMSEA)លើកទី៧ ត្រូវបានប្រារព្ធឡើងនៅក្នុងទឹកដីខេត្តព្រះសីហនុ ពីថ្ងៃទី១-២ធ្នូ ឆ្នាំ២០២១។ នេះជាលើកដំបូងសម្រាប់កម្ពុជាក្នុងការធ្វើជាម្ចាស់ផ្ទះនៃមហាសន្និបាតសមុទ្រអាស៊ីបូព៌ា។ ក្នុងវេទិកាថ្នាក់រដ្ឋមន្ត្រីលើកទី៧ ដែលមានប្រទេសជាងសមាជិក PEMSEA ចំនួន ១១ បានអនុម័តផែនទីបង្ហាញផ្លូវដល់ឆ្នាំ ២០៣០ ក្នុងការគាំទ្រការងើបឡើងវិញនៃភាពបៃតង និងពង្រឹងអភិបាលកិច្ចមហាសមុទ្រនៅអាស៊ីបូព៌ា កាលពីព្រឹកថ្ងៃទី២ធ្នូ លោក សាយ សំអាល់ បានអះអាងដូច្នេះ៖ «កម្ពុជាប្តេជ្ញាចំពោះគោលការណ៍ផែនការ (Blueprint) ប្រកបដោយចីរភាព សមធ៌ម និងភាពធន់ សម្រាប់ការអភិវឌ្ឍសេដ្ឋកិច្ច-សង្គមរបស់យើង»។
លោករដ្ឋមន្ត្រីក្រសួងបរិស្ថាន បន្តថ្លែងថា៖ «ឥឡូវនេះយើងបានឈានចូលមកដល់ទសវត្សរ៍នៃវិទ្យាសាស្ត្រមហាសមុទ្រ និងការស្ដារប្រព័ន្ធអេកូឡូស៊ី។ ដូច្នេះយើងត្រូវចេះច្បាមចាប់យកឱកាសទាំងអស់ ដែលមាននៅចំពោះមុខ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពរួមជាមួយនឹងទស្សនវិស័យ SDS-SEA របស់យើង»។
លោក សាយ សំអាល់ រដ្ឋមន្រ្តីក្រសួងបរិស្ថាន ជាអធិបតីភាពក្នុងវេទិកាថ្នាក់រដ្ឋមន្ត្រីនៃមហាសន្និបាតសមុទ្រអាស៊ីបូព៌ាលើកទី៧ ដែលធ្វើឡើងនាព្រឹកថ្ងៃទី២ធ្នូ ឆ្នាំ២០២១ នៅខេត្តព្រះសីហនុ។
បើតាមលោក សាយ សំអាល់ ប្រវត្តិសាស្ត្រ វប្បធម៌សេដ្ឋកិច្ច និងសុខភាពក្នុងតំបន់ គឺមានទំនាក់ទំនងយ៉ាងជិតស្និទ្ធជាមួយនឹងសមុទ្ររបស់ទាំងអស់គ្នា។ ផ្អែកលើរបាយការណ៍សេដ្ឋកិច្ចពណ៌ខៀវរបស់ PEMSEA ជាមួយនឹងទិន្នន័យមកពីប្រទេសចំនួន១០ សេដ្ឋកិច្ចមហាសមុទ្រត្រូវបានគេប៉ាន់ស្មានថា មានតម្លៃប្រហែល ១,៤ ពាន់ពាន់លានដុល្លារ។ លោកបានបញ្ជាក់ថា៖ «ក្នុងនាមជាមជ្ឈមណ្ឌលនៃជីវចម្រុះសមុទ្រក្នុងពិភពលោក និងមជ្ឈមណ្ឌលពាណិជ្ជកម្មដ៏មមាញឹកបំផុត តំបន់របស់យើងដើរតួនាទីយ៉ាងសំខាន់ក្នុងសន្តិសុខស្បៀង ការបង្កើតប្រាក់ចំណូល ជីវភាពរស់នៅ ការកម្សាន្ត ការការពារច្រាំងសមុទ្រ និងបទប្បញ្ញត្តិអាកាសធាតុ ក្នុងចំណោមប្រជាជនដទៃទៀត មិនត្រឹមតែនៅក្នុងតំបន់ ប៉ុន្តែនៅក្នុងពិភពលោកទាំងមូលផងដែរ»។
សម្រាប់វេទិកាថ្នាក់រដ្ឋមន្ត្រីលើកទី៧នៃភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ានាពេលនេះ លោក សាយ សំអាល់ បាននិយាយថា គឺកាន់តែមានសារសំខាន់ថែមទៀតនៅពេលដែលបានដាក់ផែនទីបង្ហាញផ្លូវរួមគ្នាដើម្បីជួយ ឱ្យតំបន់នេះឆ្ពោះទៅថ្ងៃអនាគតដ៏ល្អប្រសើរមួយ។
យោងតាមសេចក្ដីប្រកាសរបស់វេទិកាថ្នាក់រដ្ឋមន្ត្រីលើកទី៧ គឺបានអនុម័តផែនទីបង្ហាញផ្លូវដល់ឆ្នាំ២០៣០ក្នុងការគាំទ្រ ការងើបឡើងវិញនៃភាពបៃតង និងពង្រឹងអភិបាលកិច្ចមហាសមុទ្រនៅអាស៊ីបូព៌ា។ សេចក្ដីប្រកាសនោះ បានលើកឡើងថា ជាប្រវត្តិសាស្ត្រដំបូង ដែលរដ្ឋមន្ត្រីនិងមន្ត្រីជាន់ខ្ពស់រដ្ឋាភិបាលមកពី១១ប្រទេសក្នុងតំបន់សមុទ្រអាស៊ីបូព៌ា បានជួបជុំគ្នា នៃវេទិការដ្ឋមន្ត្រីលើកទី៧ និងអង្គមហាសន្និបាតសមុទ្រអាស៊ីបូព៌ាឆ្នាំ២០២១ ដោយបានប្តេជ្ញាចិត្តក្នុង ការជំរុញតាម គោលការណ៍របស់អង្គការសហប្រជាជាតិប្រកបដោយនិរន្តរភាព គោលដៅអភិវឌ្ឍន៍ (SDGs) តាមរយៈភាពជាដៃគូ ក្នុងការគ្រប់គ្រងបរិស្ថានសម្រាប់សមុទ្រអាស៊ីបូព៌ា តាមផែនទីបង្ហាញផ្លូវទៅកាន់ឆ្នាំ២០៣០។
លោក នេត្រ ភក្រ្តា រដ្ឋលេខាធិការក្រសួងបរិស្ថាន កំពុងផ្តល់បទសម្ភាសឱ្យអ្នកសារព័ត៌មាន ក្រោយបញ្ចប់មហាសន្និបាតសមុទ្រអាស៊ីបូព៌ា នៅខេត្តព្រះសីហនុ កាលពីព្រឹកថ្ងៃទី២ធ្នូ ឆ្នាំ២០២១។
បើតាមលោក នេត្រ ភក្ត្រា រដ្ឋលេខាធិការក្រសួងបរិស្ថាន វេទិការដ្ឋមន្ត្រីលើកទី៧នៃអង្គការភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា នៃអង្គមហាសន្និបាតសមុទ្រអាស៊ីបូព៌ាឆ្នាំ២០២១ ដែលធ្វើឡើងក្នុងរយៈពេល២ថ្ងៃនៅខេត្តព្រះសីហនុមកនេះ បានដំណើការដោយរលូន និងទទួលបានលទ្ធផលជាទីមោទនៈ។ លោកថ្លែងប្រាប់អ្នកសារព័ត៌មានក្រោយបញ្ចប់មហាសន្និបាតសមុទ្រអាស៊ីបូព៌ា ថា៖« ក្នុងកិចុ្ចប្រជុំនៃមហាសន្និបាតនេះ រាប់ចាប់តាំងពីកិច្ចប្រជុំនៃរដ្ឋបាលថ្នាក់ក្រោមជាតិនៃបណ្ដាប្រទេសនៃអង្គការភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា គឺមានការចេញនូវសេចក្ដីប្រកាសរួមហើយក៏បានពិនិត្យទៅលើផែនការរបស់ខ្លួនដែលគ្រោងធ្វើចាប់ពីឆ្នាំ២០២២ ដល់ឆ្នាំ២០៣០ នៅក្នុងការគ្រប់គ្រង និងអភិរក្សតំបន់ឆ្នេររបស់ខ្លួន»។
ចំពោះសន្និសីទអន្តរជាតិរបស់រដ្ឋមន្ដ្រី PEMSEA នៅថ្ងៃទី២ធ្នូ ឆ្នាំ២០២១ គឺបានពិនិត្យឡើងវិញនូវការអនុវត្តផែនការនាពេលកន្លងទៅ។ ក្នុងចំណោមនៃប្រទេសជាសមាជិកនៃអង្គការ PEMSEA ទាំង១១
ប្រទេស ពិនិត្យទៅលើការគ្រប់គ្រង និងការអភិវឌ្ឍនៅក្នុងតំបន់ឆ្នេរសមុទ្រ ពិនិត្យទៅលើការអភិវឌ្ឍប្រកបដោយចីរភាព និងពិនិត្យទៅលើសុខុមាលភាពរបស់ប្រជាពលរដ្ឋដោយពាក់ព័ន្ធទៅលើការបង្កើនសមត្ថភាព និងបង្កើនប្រាក់ចំណូល។ លោក នេត្រ ភក្ត្រា បញ្ជាក់ថា៖«ចំពោះកិច្ចប្រជុំនៅថ្ងៃចុងក្រោយ ដែលយើងចាត់ទុកថាជាភាពជោគជ័យសំខាន់មួយទៀត គឺប្រទេសទាំង១១ ដែលជាសមាជិកនៃអង្គការ PEMSEA បានចុះហត្ថលេខាលើសេចក្ដីថ្លែងការណ៍រួមដែលហៅថា សេចក្ដីថ្លែងការណ៍នៃរដ្ឋមន្ដ្រីនៃអង្គការPEMSEA គឺសេចក្ដីថ្លែងការណ៍ទីក្រុងព្រះសីហនុ ដែលសេចក្ដីថ្លែងការណ៍នេះ បញ្ជាក់អំពីកិច្ចខិតខំប្រឹងប្រែងរបស់បណ្ដាប្រទេសទាំងអស់ជាសមាជិកនៅក្នុងការការពារនិងអភិរក្សសមុទ្រដែលវាជាអាយុជីវិតរបស់ប្រជាពលរដ្ឋរាប់រយលាននាក់នៅក្នុងតំបន់»។
សូមជម្រាបថា ក្រសួងបរិស្ថាន បានធ្វើជាម្ចាស់ផ្ទះនៃមហាសន្និបាតសមុទ្រអាស៊ីបូព៌ា ឆ្នាំ២០២១ និងវេទិកាថ្នាក់រដ្ឋមន្ត្រីលើកទី៧ នៃភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា ក្រោមប្រធានបទ «បង្កើតទសវត្សរ៍ថ្មីនៃសុខុមាលភាពសមុទ្រ មនុស្ស និងសេដ្ឋកិច្ច» ដែលប្រព្រឹត្តទៅរយៈពេល២ថ្ងៃ ចាប់ពីថ្ងៃទី១ ដល់២ ខែធ្នូឆ្នាំ២០២១ នាខេត្តព្រះសីហនុ។ គោលបំណងសំខាន់ចំនួនបី នៃការរៀបចំមហាសន្និបាតសមុទ្ររួមមាន ទីមួយ. ចែករំលែកមេរៀនជាបទពិសោធ តាមដានវឌ្ឍនភាពការងារកន្លងមក និងពង្រីកបន្ថែមនូវការអនុវត្តយុទ្ធសាស្ត្រ ដែលបានប្រតិបត្តិនៅថ្នាក់តំបន់ ជាតិ និងរដ្ឋបាលថ្នាក់ក្រោមជាតិ។
ទីពី៖ បង្កើតនិងរៀបចំឡើងវិញនូវយន្តការគ្រប់គ្រងដែលមានស្រាប់ និងជំរុញបង្កើតឱកាសថ្មីៗបន្ថែមទៀត សម្រាប់ភាពជាដៃគូក្នុងតំបន់តាមរយៈបច្ចេកវិទ្យា នវានុវត្តន៍ ការវិនិយោគ និងហិរញ្ញប្បទាន ដើម្បីបន្តនិរន្តរភាពនៃបរិស្ថានតំបន់ឆ្នេរ និងសមុទ្រ និងទីបី. កំណត់នូវផែនទីបង្ហាញផ្លូវដ៏ច្បាស់លាស់មួយ សម្រាប់ជាដំណោះស្រាយចំពោះបញ្ហាសមុទ្រនាទសត្សរ៍ខាងមុខ ដោយអនុលោមទៅតាមផែនការ១ទសវត្សរ៍របស់អង្គការសហប្រជាជាតិនៃវិទ្យាសាស្ត្រមហាសមុទ្រ របៀបវារៈរបស់អង្គការសហប្រជាតិឆ្នាំ២០៣០ អនុសញ្ញាក្របខ័ណ្ឌសហប្រជាតិស្តីពីការប្រែប្រួលអាកាសធាតុនិងក្របខ័ណ្ឌជីវចម្រុះសកលក្រោយឆ្នាំ២០២០ ព្រមទាំងបណ្តាក្របខ័ណ្ឌពាក់ព័ន្ធនានា៕
Tag:
លោក សាយ សំអាល់
ព្រះសីហនុ
PEMSEA
© រក្សាសិទ្ធិដោយ thmeythmey.com
